.jpg)
ជនសង្ស័យជាមន្ត្រីនគរបាលសង្កាត់បាក់ខែង ខណ្ឌជ្រោយចង្វារ ដែលត្រូវបានឃាត់ខ្លួន។ រូបថត នគរបាល
កណ្តាលៈ ជនសង្ស័យជាមន្ត្រីនគរបាលសង្កាត់បាក់ខែង ខណ្ឌជ្រោយចង្វារ ដែលបានបាញ់ប្អូនថ្លៃខ្លួនស្លាប់កំពុងត្រូវបាននគរបាលព្រហ្មទណ្ឌនៃស្នងការនគរបាលខេត្តកណ្តាលសាកសួរពីម្សិលមិញ បន្ទាប់ពីចាប់ខ្លួនបាននៅខេត្តស្ទឹងត្រែង ទីដែលជនសង្ស័យរត់ទៅលាក់ខ្លួន ក្រោយបង្កហេតុកាលពីថ្ងៃទី ១៥ មេសានៅភូមិ ចុងកោះ ឃុំកោះឧកញ៉ាតី ស្រុកខ្សាច់កណ្តាលដោយផ្ដើមចេញពីការប្រចណ្ឌ។
លោក រឿន ណារ៉ា ស្នងការរងទទួលផែនព្រហ្មទណ្ឌនៃស្នងការដ្ឋាននគរបាល ខេត្តកណ្តាលប្រាប់ពីម្សិលមិញថា ជនសង្ស័យឈ្មោះ សែន រ៉ានុន ភេទប្រុស អាយុ ៣៥ ឆ្នាំ ជាមន្ត្រីនគរបាលនោះត្រូវបានសមត្ថកិច្ចបន្តសាកសួរជុំវិញបទល្មើសឃាតកម្ម ដើម្បីធ្វើរបាយការណ៍កសាងសំណុំរឿងបញ្ជូនទៅសាលាដំបូងខេត្តកណ្តាលដើម្បីចាត់ការតាមនីតិវិធីច្បាប់។
លោកថា ជនសង្ស័យត្រូវបានសមត្ថកិច្ចស្រាវជ្រាវតាមចាប់ខ្លួនបានកាលពីរសៀលថ្ងៃទី ២២ មេសា។ បន្ទាប់ពីចាប់ខ្លួនសមត្ថកិច្ចខេត្តកណ្តាលឲ្យជនសង្ស័យនាំទៅយកកាំភ្លើងខ្លី ១ ដើមដែលជាវត្ថុតាងធ្វើសកម្មភាពបាញ់ជនរងគ្រោះលាក់ទុកនៅខេត្តសៀមរាបទាំងយប់ និងបន្តដឹកជនសង្ស័យមកស្នងការដ្ឋាននគរបាលខេត្តកណ្តាលនៅយប់ថ្ងៃទី ២២ មេសានោះដដែល។
លោកប្រាប់ថា៖ «កាំភ្លើងខ្លីនោះម៉ាក k59 ក្នុងបង់មានចំនួន ៥ គ្រាប់។ គាត់បានលាក់ទុកក្នុងអាងទឹកក្នុងផ្ទះគេមុនគាត់បន្តគេចខ្លួនទៅខេត្តស្ទឹងត្រែង»។
លោក ហម ប៊ុនធែល ស្នងការរងទទួលផែនព្រហ្មទណ្ឌនៃស្នងការដ្ឋាននគរបាល ខេត្តស្ទឹងត្រែងប្រាប់ឲ្យដឹងថា មុនឈានទៅចាប់ខ្លួនជនសង្ស័យគឺនៅថ្ងៃទី ២១ មេសាសមត្ថកិច្ចខាងនាយកដ្ឋាននៃអគ្គស្នងការដ្ឋាននគរបាលជាតិ និងសមត្ថកិច្ចនៃស្នងការដ្ឋាននគរបាលខេត្តកណ្តាលបានផ្តល់ព័ត៌មានមកស្នងការដ្ឋាននគរបាល ខេត្តស្ទឹងត្រែងថា ជនសង្ស័យបានគេចមកសម្ងំលាក់ខ្លួននៅក្នុងខេត្តនេះ។ លុះដល់ថ្ងៃទី ២២ មេសា សមត្ថកិច្ចដឹកនាំដោយលោក ឯក ស៊ុនរស្មី ព្រះរាជអាជ្ញារងនៃសាលាដំបូងខេត្តកណ្តាលក៏បានចាប់ខ្លួនជនសង្ស័យ។
លោកថា៖ «ខាងសមត្ថកិច្ចខេត្តកណ្តាល និងខាងក្រសួងមហាផ្ទៃមកសហការជាមួយខ្ញុំម្សិលមិញ [ថ្ងៃទី ២២ មេសា] ប៉ុន្តែគេស្រាវជ្រាវពីហ្នឹងមកប៉ុន្មានថ្ងៃហើយ ហើយមកដល់ខាងខ្ញុំគឺ ១ ថ្ងៃហ្នឹងខ្ញុំសហការស្រាវជ្រាវចាប់ជនសង្ស័យបានតែម្តង»។
លោក ហោ វុទ្ធី ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តស្ទឹងត្រែងប្រាប់ពីម្សិលមិញដែរថា ជនសង្ស័យត្រូវបានកម្លាំងសមត្ថកិច្ចចម្រុះចាប់ខ្លួនបាននៅម៉ោងប្រហែល ៣ និង ៤០ នាទីនៅក្នុងចម្ការព្រៃស្វាយចន្ទីមួយរបស់អ្នកភូមិម្នាក់ក្នុងភូមិអន្លង់ជ្រៃ ឃុំអន្លង់ជ្រៃ ស្រុកថាឡាបរិវ៉ាត់។ ម្ចាស់ចម្ការស្វាយចន្ទីនោះមិនមែនជាបងប្អូនទេ ប៉ុន្តែជនសង្ស័យស្គាល់មិត្តភក្តិគាត់នៅខេត្តសៀមរាបហើយមិត្តភក្តិបានណែនាំជនសង្ស័យឲ្យស្គាល់ម្ចាស់ចម្ការ។
លោកថ្លែងថា៖ «ជនសង្ស័យមិនមែនមកធ្វើចម្ការស្វាយចន្ទីទេ តែមកសម្ងំលាក់ខ្លួនគេចពីការតាមចាប់របស់សមត្ថកិច្ច។ ក្នុងប្រតិបត្តិការរបស់ខ្ញុំដែលសហការជាមួយសមត្ថកិច្ចចម្រុះគឺប្រើពេលចាប់ពីម៉ោង ៦ ព្រឹករហូតដល់ម៉ោងជាង ៣ រសៀលទើបចាប់ជនសង្ស័យបាន»។
បើតាមការថតជាវីដេអូរយៈពេល ខ្លីពេលសមត្ថកិច្ចចាប់ជនសង្ស័យភ្លាមៗ ជនសង្ស័យនិយាយថា៖ «ខ្ញុំបាញ់ជនរងគ្រោះតែ ១ គ្រាប់ទេ ហើយក៏ខ្ញុំគ្មានចេតនាដែរ ខ្ញុំយកកាំភ្លើងនោះលាក់នៅក្នុងអាងទឹកក្នុងផ្ទះលក់ហ្គាស»។
ហ្វេសប៊ុករបស់ស្នងការដ្ឋាននគរបាលខេត្តកណ្តាលបង្ហាញថា ករណីនេះបានកើតឡើងនៅថ្ងៃទី ១៥ មេសា ដោយជនសង្ស័យមានទំនាស់ជាមួយប្រពន្ធខ្លួនឈ្មោះ គង់ សុខជា។ ជនសង្ស័យយកអាវុធខ្លីមិនស្គាល់ម៉ាក ភ្ជង់ប្រពន្ធខ្លួន ពេលនោះជនរងគ្រោះចេញមកឃាត់ដោយនិយាយថា៖ «ចាំយកកាំភ្លើងភ្ជង់ប្រពន្ធធ្វើអី»។
និយាយតែប៉ុណ្ណឹង ស្រាប់តែជនសង្ស័យបាញ់សំដៅទៅជនរងគ្រោះ ១ គ្រាប់ ត្រូវបំពង់កស្លាប់នៅកន្លែងកើតហេតុ។ ក្រោយមកជនសង្ស័យបានយកម៉ូតូឈ្មោះ ផល ជាអ្នកជិតខាងជិះគេចខ្លួនបាត់តែម្ដង។ ទំនាស់នេះកើតឡើងពីការប្រចណ្ឌប្រពន្ធជាមួយប្អូនថ្លៃ៕
