ភ្នំពេញ: សមត្ថកិច្ចខណ្ឌពោធិ៍សែនជ័យគ្រោងបញ្ជូនជនសង្ស័យម្នាក់ឈ្មោះ ទូច ដេវីត ទៅសាលាដំបូងរាជធានីភ្នំពេញនៅថ្ងៃនេះ បន្ទាប់ពីឃាត់ខ្លួនរឿងក្លែងឯកសណ្ឋាននគរបាលជិះម៉ូតូដេញស្ទាក់ម៉ូតូយុវជនម្នាក់សុំពិនិត្យទឹកនោម និងគំរាមយកលុយកាលពីរំលងអធ្រាត្រឈានចូលថ្ងៃទី ២៧ ខែវិច្ឆិកា នៅផ្លូវជាតិលេខ ៤ ក្នុងសង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។
លោក យឹម សារ៉ាន់ អធិការនគរបាលខណ្ឌពោធិ៍សែនជ័យបានថ្លែងថា លោកបានទទួលសំណុំរឿងនេះពីនាយប៉ុស្ដិ៍នគរបាលសង្កាត់ចោមចៅទី ៣ ហើយដោយមន្ត្រីជំនាញកំពុងសាកសួរ និងធ្វើកំណត់ហេតុដើម្បីបញ្ជូនទៅសាលាដំបូងរាជធានីភ្នំពេញនៅថ្ងៃទី ២៨ វិច្ឆិកានេះ។
លោកបន្តថា លោកនឹងចាត់វិធានការឲ្យតឹងរ៉ឹងតាមច្បាប់ព្រោះការក្លែងឯកសណ្ឋាននគរបាលបែបនេះ ធ្វើឲ្យប៉ះពាល់ដល់កិត្តិយសសមត្ថកិច្ចពិតប្រាកដ។ លើសពីនេះជនខិលខូចបានឈ្មោះនគរបាលទៅឆ្លៀតកេងប្រវ័ញ្ច ឬគំរាមពលរដ្ឋយកលុយដែលផ្ទុយពីច្បាប់។
លោក សារ៉ាន់ បញ្ជាក់ថា៖ «យើងកំពុងកសាងសំណុំរឿងដើម្បីបញ្ជូនជនសង្ស័យទៅតុលាការ ព្រោះយើងបានសាកសួររួចហើយ។ គាត់ឆ្លើយថា ស្រឡាញ់ឯកសណ្ឋានប៉ូលិសគាត់ថា ធ្វើជាប៉ូលិសសង្ហាណាស់ ហើយគាត់ក៏ទិញខោអាវប៉ូលិសពីផ្សារទឹកថ្លាមកពាក់»។
លោក ថេង កុសល នាយប៉ុស្ដិ៍នគរបាលសង្កាត់ចោមចៅទី ៣ បានថ្លែងពីម្សិលមិញថា សមត្ថកិច្ចលោកបានឃាត់ខ្លួនជនសង្ស័យឈ្មោះ ទូច ដេវីត អាយុ ២៤ ឆ្នាំ មុខរបរលក់ផលិតផលតាមអនឡាញស្នាក់នៅម្ដុំទួលទំពូងទី ២ ខណ្ឌចំការមនមានស្រុកកំណើត ស្រុកស្អាង ខេត្តកណ្ដាលដែលជិះម៉ូតូម៉ាក សង់ស៊េរី ២០១៤ ពណ៌ខ្មៅ។
លោកបន្តថា ការឃាត់ខ្លួននេះពេលគេពាក់ក្លែងឯកសណ្ឋាននគរបាលថ្នាក់អនុសេនីយ៍ឯក (ស័ក្តិ ៣) រួចជិះម៉ូតូដេញស្ទាក់ម៉ូតូម៉ាកនិចពណ៌សរបស់យុវជនរងគ្រោះឈ្មោះ ជា សុផាណាត់ អាយុ ២៤ ឆ្នាំ ជាកម្មកររោងចក្រស្នាក់នៅម្តុំវត្តអង្គ ខណ្ឌពោធិ៍សែនជ័យ។ ជនសង្ស័យជិះម៉ូតូតាមសុំពិនិត្យទឹកនោមរកសារធាតុញៀន និងគំរាមចាប់បញ្ជូនទៅខណ្ឌ បើមិនព្រមឲ្យលុយដើម្បីបញ្ចប់រឿងទេនោះ។
លោក កុសល បញ្ជាក់ថា៖ «ក្រោយពេលឃាត់ខ្លួនមកសួរ និងធ្វើរបាយការណ៍រួចខ្ញុំបានបញ្ជូនទៅអធិដ្ឋាននគរបាលខណ្ឌពោធិ៍សែនជ័យ...ខ្ញុំហួសដែនសមត្ថកិច្ចហើយ»។
យុវជនរងគ្រោះ ឈ្មោះ ជា សុផាណាត់ មិនអាចស្វែងរកប្រភពទាក់ទងសុំការបញ្ជាក់ជុំវិញករណីនេះបានទេ។
ប៉ុន្ដែបើតាមលោក ថេង កុសល ដែលបានស្រង់សម្ដីយុវជន រងគ្រោះឲ្យដឹងថា មុនកើតហេតុគាត់បានជិះម៉ូតូពីរង្វង់មូលចោមចៅតាមផ្លូវជាតិលេខ ៤ ពីកើតទៅលិច ហើយត្រូវបានបុរសពាក់ឯកសណ្ឋានប៉ូលិសពាក់ស័ក្តិ ៣ ជិះម៉ូតូដេញពីក្រោយរហូតដល់ចំណុចកើតហេតុក៏បានកាក់ម៉ូតូសុំឆែកឆេរ និងពិនិត្យទឹកនោម ប៉ុន្ដែរកមិនឃើញអ្វីទេ តែគេបានគំរាមទារលុយ ហើយថាបើមិនព្រមនឹងបញ្ជូនទៅខណ្ឌពោធិ៍សែនជ័យ។ បន្ទាប់មកបានភ្ញាក់ផ្អើលដល់អ្នកដំណើរ និងអ្នកយកព័ត៌មានហើយពេលមានការសាកសួរ បុរសនោះមិនព្រមឆ្លើយអ្វីទាំងអស់។
យុវជន ជា សុផាណាត់ បានប្រាប់សមត្ថកិច្ចថា ក្រោយមកនគរបាលមូលដ្ឋានចុះមកដល់ និងបានអញ្ជើញបុរសនោះ និងរូបគាត់មកប៉ុស្តិ៍ចោមចៅទី ៣ ដើម្បីសួរ។ បន្ទាប់ពីសួរបុរសនោះបានសារភាពថា ខ្លួនជាសមត្ថកិច្ចក្លែងក្លាយ៕