.jpg)
ជនសង្ស័យ និងវត្ថុតាងគ្រឿងញៀន និងសារធាតុផ្សំសម្រាប់ផលិតគ្រឿងញៀន ប្រមាណ ៣ តោនត្រូវសមត្ថកិច្ចចាប់ឃាត់ខ្លួន និងរឹបអូស។ រូបថត អគ្គនាយកដ្ឋានប្រយុទ្ធប្រឆាំងគ្រឿងញៀន
ភ្នំពេញ: បុរសសង្ស័យជាជនជាតិចិនតៃវ៉ាន់ចំនួន ៤ នាក់ ត្រូវបានព្រះរាជអាជ្ញានៃសាលាដំបូងរាជធានីភ្នំពេញចោទប្រកាន់ពីបទ «ដឹកជញ្ជូន ជួញដូរ កែច្នៃនិងរក្សាទុកគ្រឿងញៀន» ដោយបញ្ជូនទៅចៅក្រមស៊ើបសួរបន្តទៀត បន្ទាប់ពីឃាត់ខ្លួនពាក់ព័ន្ធគ្រឿងញៀន និងសារធាតុផ្សំសរុបជិត ៣ តោនដែលមានតម្លៃប្រមាណ ១០ លានដុល្លារនៅខេត្តព្រះសីហនុ និងភ្នំពេញ។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញថ្លែងពីម្សិលមិញថា ជនសង្ស័យ ៤ នាក់នេះ ត្រូវបានលោក ស៊ិត វណ្ណៈ ព្រះរាជអាជ្ញារងនៃសាលាដំបូងរាជធានីភ្នំពេញបានសម្រេចចោទប្រកាន់ពីបទ «ដឹកជញ្ជូន ជួញដូរ កែច្នៃ និងរក្សាទុកគ្រឿងញៀនខុសច្បាប់» តាមមាត្រា ៤០ និងមាត្រា ៤៨ នៃច្បាប់ស្ដីពីការត្រួតពិនិត្យគ្រឿងញៀន។
លោកបានបញ្ជាក់ថា៖ «បន្ទាប់ពីចោទប្រកាន់លោក ស៊ិត វណ្ណៈ បានបញ្ជូនទៅចៅក្រមស៊ើបសួរ ដើម្បីសាកសួរបន្តតាមនីតិវិធីច្បាប់»។
លោកបានថ្លែងទៀតថា៖ «ក្រោយពីបានសាកសួរហើយ ចៅក្រមបានសម្រេចឃុំខ្លួនអ្នកទាំងបួននាក់នោះតាមនីតិវិធីនៅពន្ធនាគារម ១»។
លោក ឡឹក វណ្ណៈ នាយកមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិថ្លែងពីម្សិលមិញថា កម្លាំងមន្ទីរប្រឆាំងបទល្មើសគ្រឿងញៀន បានប្រមូលវត្ថុតាងកសាងសំណុំរឿង និងជនសង្ស័យជនជាតិចិនទាំង ៤ នាក់ បញ្ជូនទៅសាលាដំបូងរាជធានីភ្នំពេញនៅថ្ងៃទី ១៤ ខែតុលា ដើម្បីចាត់ការតាមច្បាប់ពាក់ព័ន្ធគ្រឿងញៀនទម្ងន់ជាង ២ តោន និងសារធាតុគីមីផ្សំ សម្រាប់ផលិតគ្រឿងញៀន ៦០០ គីឡូក្រាមស្មើនឹងតម្លៃ ១០ លានដុល្លារ ដែលបង្ក្រាបបាននៅក្នុងភូមិសាស្ត្រខេត្តព្រះសីហនុ ៣ គោលដៅ និងនៅរាជធានីភ្នំពេញ ៤ គោលដៅ។
កិច្ចប្រតិបត្តិការនេះ មន្ត្រីជំនាញបានសហការជាមួយស្នងការដ្ឋាននគរបាលខេត្តព្រះវិហារ រាជធានីភ្នំពេញ ខេត្តព្រះសីហនុ និងនាយកដ្ឋានស៊ើបការណ៍ខាងក្រៅ និងបច្ចេកទេស ព្រមទាំងមានការសម្របសម្រួលដឹកនាំពីលោកព្រះរាជអាជ្ញាសាលាដំបូងរាជធានីភ្នំពេញ ខេត្តព្រះវិហារ ខេត្តព្រះសីហនុបានដំណើរការស្រាវជ្រាវ បង្ក្រាបករណីដឹកជញ្ជូន ជួញដូរគ្រឿងញៀនឆ្លងដែនដោយខុសច្បាប់ពីប្រទេសឡាវឆ្លងកាត់ប្រទេសកម្ពុជា ហើយនាំចេញបន្តទៅតៃវ៉ាន់។
ករណីនេះបង្ក្រាបនៅតាមគោលដៅផ្សេងៗគ្នាចាប់ពីថ្ងៃទី ៧ ខែតុលានៅក្នុងភូមិសាស្ត្រខេត្តព្រះសីហនុ ៣ គោលដៅ និងនៅរាជធានីភ្នំពេញ ៤ គោលដៅ។
លោក វណ្ណៈ បញ្ជាក់ថា៖ «ករណីនេះមន្ទីរប្រឆាំងបទល្មើសគ្រឿងញៀនយើង កំពុងបន្តស្រាវជ្រាវរកបក្ខពួកដែលនៅសេសសល់ និងសហការជាមួយសមត្ថកិច្ចនៃប្រទេសពាក់ព័ន្ធ ដើម្បីស្រាវជ្រាវបង្ក្រាបឧក្រិដ្ឋជនជាមេខ្លោងបន្ថែមទៀត»។
ជនសង្ស័យទាំង ៤ នាក់ដែលជាបុរសចិនតៃវ៉ាន់ទាំងនេះ ទី ១- CHEN CHIH CHIEH ហៅ JACKY (អ្នកបញ្ជាការដឹកជញ្ជូន) ទី ២- Zhan Qi Zhi (អ្នកដឹកជញ្ជូន) ទី ៣- YU Yao Tsung (អ្នកដឹកជញ្ជូន) និងទី ៤- Chen Pao Jiun (អ្នកដឹកជញ្ជូន)។
រីឯជនសង្ស័យម្នាក់ទៀតដែលក៏ជាចិនតៃវ៉ាន់ដែរនោះឈ្មោះ WU Chi Hsun បានកាន់គ្រឿងញៀនលួចសម្រូតតាមបង្កាន់ដៃអគារបានធ្លាក់បណ្ដាលឱ្យស្លាប់។
បើតាមរបាយការណ៍របស់មន្ទីរប្រឆាំងគ្រឿងញៀន វត្ថុតាងដែលត្រូវបានរឹបអូសនៅក្នុងការបង្ក្រាបនេះរួមមាន គ្រឿងញៀនប្រភេទមេតកាទីណូន (Methcathinone) ចំនួន ៧៦ បាវ ស្មើទម្ងន់ ១ ៩០០ គីឡូក្រាម មេតំហ្វេតាមីន (ICE) ទម្ងន់ ៥៩,៩៤ ក្រាម មេតំហ្វេតាមីន (WY) ទម្ងន់ ២,៣៦ ក្រាម និងគ្រឿងញៀនប្រភេទផ្សេងៗជាច្រើនគីឡូក្រាមទៀត រួមទាំងសារធាតុគីមីសម្រាប់ផ្សំផលិតគ្រឿងញៀន ប្រភេទ ភីអឹមខេ (អឹមឌីភីធូភី) មេទីលគ្លីស៊ីដេត PMK (MDP2P)Methyl Glycidate ចំនួន ២៤ បាវស្មើទម្ងន់ ៦០០ គីឡូក្រាម ព្រមទាំងសម្ភារផ្សេងៗជាច្រើនទៀត៕
វីដេអូ៖
