The Phnom Penh Post Search

Search form




Logo of Phnom Penh Post newspaper Phnom Penh Post - បុរស​ទេសចរ​ចិន​ ២ នាក់​ ត្រូវ​ឃាត់​ខ្លួន​អប់រំ​បណ្ដោះ​អាសន្ន ដោយ​សារ​បង្ហោះ​ដ្រូន​ក្នុង​វាំង

បុរស​ទេសចរ​ចិន​ ២ នាក់​ ត្រូវ​ឃាត់​ខ្លួន​អប់រំ​បណ្ដោះ​អាសន្ន ដោយ​សារ​បង្ហោះ​ដ្រូន​ក្នុង​វាំង

Content image - Phnom Penh Post
ជនបង្ហោះ​ដ្រូន​ត្រូវ​បាន​ឃាត់ខ្លួន​នាពេល​កន្លងមក។ រូបថត សហការី

បុរស​ទេសចរ​ចិន​ ២ នាក់​ ត្រូវ​ឃាត់​ខ្លួន​អប់រំ​បណ្ដោះ​អាសន្ន ដោយ​សារ​បង្ហោះ​ដ្រូន​ក្នុង​វាំង

ភ្នំពេញៈ បុរស​អ្នក​ទេសចរ​​ជនជាតិ​ចិន​ ២ ​នាក់ ​ដែល​ត្រូវ​បាន​កម្លាំង​នគរបាល​ឃាត់​ខ្លួន​កាលពី​ព្រលប់​ថ្ងៃ​ទី​ ១៣ ​ខែ​មករា ខណៈ​ពេល​ដែល​ពួកគេ​កំពុង​តែ​បង្ហោះ​យន្តហោះ​ប្រភេទ​ Drone ​ដែល​បំពាក់​កាមេរ៉ា​ដើម្បី​ថត​ចាប់​យក​ទិដ្ឋភាព​នានា​នៅ​តំបន់​ហាមឃាត់​នៅក្នុង​ព្រះបរមរាជវាំង ប៉ុន្តែ​ពួកគេ​នឹង​ត្រូវ​ដោះ​លែង​បន្ទាប់​ពី​សមត្ថកិច្ច​បាន​ធ្វើការ​អប់រំ​ណែនាំ​ និង​ធ្វើ​កិច្ចសន្យា​រួចរាល់​។

លោក ជា ពៅ ប្រធាន​នាយកដ្ឋាន​ប្រឆាំង​បទល្មើស​បច្ចេកវិទ្យា​នៃ​ក្រសួង​មហាផ្ទៃ​ថ្លែង​ប្រាប់​កាសែត​ភ្នំពេញ​ប៉ុស្តិ៍​កាលពី​ម្សិលមិញ​ថា​កម្លាំង​នគរបាល ប៉ុស្តិ៍​ជ័យជំនះ​ឃាត់​ខ្លួន​ជនជាតិ​ចិន​ទាំង​ ២ ​នាក់​នោះ​ធ្វើ​ឡើង​កាលពី​វេលា​ម៉ោង​ ១៧ ​និង ​១០ ​នាទី​ព្រលប់​ថ្ងៃ​ចន្ទ​ ទី​ ១៣ ខែ​មករា​ឆ្នាំ​ ២០២០ ត្រង់​ចំណុច​ក្នុង​ព្រះបរមរាជវាំង​ ភូមិ​ ១ សង្កាត់​ជ័យជំនះ ​ខណ្ឌ​ដូនពេញ រាជធានី​ភ្នំពេញ​។

លោក ពៅ បាន​ថ្លែង​ឲ្យ​ដឹង​ថា​៖ ​«​យើង​មិន​មាន​វិធានការ​អី​ទេ​មាន​តែ​វិធានការ​គ្រប់គ្រង​ Drone​។ យើង​ធ្វើការ​ណែនាំ​ពួកគាត់​ហើយ​យើង​ដោះ​លែង​»​។

លោក ធន់ កៅនី នាយ​ប៉ុស្តិ៍​ជ័យជំនះ​បាន​ឲ្យ​ដឹង​ថា ជនសង្ស័យ​ ២ ​នាក់​នោះ​ ទី​១. ឈ្មោះ CHEN YONG​ ភេទ​ប្រុស ​អាយុ​ ៥១ ​ឆ្នាំ​ជនជាតិ​ចិន និងទី​២. ឈ្មោះ WU MINGQING ​ភេទ​ប្រុស អាយុ​​ ៤៣ ​ឆ្នាំ​ ជនជាតិ​ចិន​មុខរបរ​ទេសចរណ៍​ស្នាក់នៅ​សណ្ឋាគារ WHEN THAI នៅ​សង្កាត់​បឹងរាំង ខណ្ឌ​ដូនពេញ រាជធានី​ភ្នំពេញ​បាន​​បង្ហោះ​ឧបករណ៍​ដ្រូន​បំពាក់​ដោយ​កាមេរ៉ា​ថត​រូប​បញ្ជា​ដោយ​តេឡេ​កុម្ម៉ង់​ (DRONE) ​នៅ​ក្នុង​ព្រះបរមរាជវាំង​នៅ​សង្កាត់​ជ័យជំនះ ខណ្ឌ​ដូនពេញ រាជធានី​ភ្នំពេញ​។

លោក​បាន​ឲ្យ​ដឹង​ដែរ​ថា​កម្លាំង​សមត្ថកិច្ច​បាន​រឹបអូស​វត្ថុតាង​រួម​មាន DRONE ម៉ាក dJI ពណ៌​ប្រផេះ​ចំនួន ១ ​គ្រឿង ផលិត​នៅ​​ប្រទេស​ចិន ទូរស័ព្ទដៃ iPhone ចំនួន​ ២ ​គ្រឿង ថ្ម​ចំនួន ២ ​ដុំ ម៉ាក dJI ពណ៌​ប្រផេះ តេឡេ​សម្រាប់​បញ្ជា​ចំនួន​ ១ ​គ្រឿង ម៉ាក dji ពណ៌​ខ្មៅ ១ ​គ្រឿង កាមេរ៉ា​ថតរូប ពណ៌​ខ្មៅ ១ ​គ្រឿង ហ្វ្លាស់​ថតរូប​ពណ៌​ខ្មៅ​ចំនួន​ ១​។

លោក កៅនី បាន​ឲ្យ​ដឹងថា​៖ «​មុនពេល​ឃាត់ខ្លួន​ពួកគេ​ទាំង​ ២ ​នាក់​នោះ គឺ​គាត់​ ២ ​នាក់​បាន​ចូល​ទស្សនា​នៅក្នុង​ព្រះបរមរាជវាំង ហើយ​ក៏​បើក​កាបូប​យក​យន្តហោះ​ប្រភេទ DRONE បង្ហោះ​នៅក្នុង​បរិវេណ​វាំង​ដើម្បី​ថត​ចាប់​យក​ពី​រូបភាព និង​ទិដ្ឋភាព​នានា​នៅក្នុង​វាំង​តែម្តង​ក៏​ត្រូវ​បាន​កម្លាំង​សមត្ថកិច្ច​ប្រចាំការ​ក្នុង​ព្រះបរមរាជវាំង​ឃាត់ខ្លួន​នាំមក​កាន់​ប៉ុស្តិ៍​រដ្ឋបាល​ជ័យជំនះ​។ គាត់​បាន​ប្រាប់​ថា​គាត់​អត់​ដឹង​គេ​មិន​ឲ្យ​បង្ហោះ DRONE ហើយ​គាត់​មិន​បានឃើញ​ស្លាក​សញ្ញា​មិន​ឲ្យ​បង្ហោះ DRONE ផងដែរ​»​។

កាលពី​ថ្ងៃទី​ ១១ ខែ​មេសា ឆ្នាំ​ ២០១៩ វេលា​ម៉ោង​ ១៨:៣០ ​នាទី ប៉ុស្តិ៍នគរបាល​ជ័យជំនះ​ធ្វើការ​ឃាត់ខ្លួន​ជនសង្ស័យ​ម្នាក់​ពី​បទ​បង្ហោះ​ឧបករណ៍​ដ្រូន​បំពាក់​ដោយ​កាមេរ៉ា​ថតរូប បញ្ជា​ដោយ​តេឡេកុម្ម៉ង់​ (DRONE) នៅត្រង់​ចំណុច​លើ​សួនច្បារ ព្រះបរមរាជវាំង ផ្លូវ​ស៊ីសុវត្ថិ ភូមិ​ ១ សង្កាត់​ជ័យជំនះ ខណ្ឌ​ដូនពេញ រាជធានី​ភ្នំពេញ​។

ជនសង្ស័យ​មាន​ឈ្មោះ Lin YANHE ភេទ​ប្រុស អាយុ​ 33 ​ឆ្នាំ ជនជាតិ​ចិន អ្នកទេសចរ​ស្នាក់នៅ​សណ្ឋាគារ City came food ស្ថិតនៅ​សង្កាត់​បឹងព្រលិត ខណ្ឌ​ ៧ ​មករា រាជធានី​ភ្នំពេញ​។ ក្នុង​នោះ​វត្តុតាង​ចាប់យក​មាន ដ្រូន​ចំនួន​ ១ ម៉ាក dJI ពណ៌​ស ចំនួន ១ ​គ្រឿង ផលិត​នៅ​ប្រទេស​ចិន ទូរស័ព្ទដៃ​ចំនួន ១ ​គ្រឿង iPhone7 ​ពណ៌​ក្រហម​ ១ ​គ្រឿង ថ្ម​ចំនួន ១ ​ដុំ តេឡេ​សម្រាប់​បញ្ជា​ចំនួន​ ១ ​គ្រឿង​ម៉ាក dji ពណ៌​ស ១ ​គ្រឿង​។

កាលពី​ខែ​កុម្ភៈ ឆ្នាំ ២០១៥ សាលា​រាជធានី​ភ្នំពេញ​បាន​ចេញ​លិខិត​ហាមប្រាម​ការប្រើប្រាស់​ម៉ាស៊ីនថតរូប និង​វីដេអូ​ស្វ័យប្រវត្តិ​បំពាក់​លើ​យន្តហោះ​បញ្ជា Drone ក្នុង​ភូមិសាស្ត្រ​រាជធានី​ភ្នំពេញ ព្រោះ​ការថត​ពីលើ​អាកាស​ដោយ​គ្មាន​ការអនុញ្ញាត​នេះ វា​ធ្វើឲ្យ​ប៉ះពាល់​ដល់​សន្តិសុខ​សណ្តាប់ធ្នាប់​ខ្លាច​មាន​ករណី​ភេរវកម្ម និង​ប៉ះពាល់​ដល់​សិទ្ធិសេរីភាព​បុគ្គល​ឯកជន និង​ស្ថាប័ន​កំពូល​របស់​ជាតិ​៕

អត្ថបទគួរចាប់អារម្មណ៍