ភ្នំពេញៈ សាលាដំបូងរាជធានីភ្នំពេញបានសម្រេចផ្តន្ទាទោសបុរសជាតិស្លូវ៉ាគីម្នាក់ឲ្យជាប់ពន្ធនាគារ ២ ឆ្នាំនិងឲ្យសងសំណង ៣៦ ម៉ឺនដុល្លារទៅដើមបណ្ដឹងគឺលោកស្រី ឃឹម រ៉ានី ជាភរិយា លោក កៅ គឹមហួន ម្ចាស់ស្ថានីយទូរទស្សន៍អាស៊ីអាគ្នេយ៍ បន្ទាប់ពីបើកសវនាការកាលពីថ្ងៃទី ១១ ខែ មីនា ពាក់ព័ន្ធនឹងបទឆបោកប្រាក់ប្រព្រឹត្តចាប់ពីឆ្នាំ ២០១៦ ដល់ឆ្នាំ ២០១៧ នៅរាជធានីភ្នំពេញ។
នៅក្នុងបន្ទប់សវនាការកាលពីថ្ងៃអង្គារ នៅចំពោះមុខជនជាប់ចោទនិងមេធាវីការពារជនជាប់ចោទ លោកចៅក្រម រស់ ពិសិដ្ឋ បានអានសាលក្រមថា សំណុំរឿងឆបោកប្រាក់ដែលមានជនជាប់ចោទឈ្មោះ CokovicDenisអាយុ ៥៤ ឆ្នាំ ក្រោយពីបានស្តាប់ ចម្លើយរបស់ជនជាប់ចោទនិងក្រោយពីបានស្តាប់ការសន្និដ្ឋានរបស់មេធាវីការពារសិទ្ធិឲ្យជនជាប់ចោទមក តុលាការបានសម្រេចថា ជនជាប់ចោទ ឈ្មោះ Cokovic Denis ត្រូវផ្តន្ទាទោសដាក់ពន្ធនាគារ ២ ឆ្នាំ និងត្រូវសងសំណងទៅដើមបណ្តឹង ៣៦ ម៉ឺនដុល្លារ និងសងជំងឺចិត្តឲ្យដើមបណ្តឹង ១០ លានរៀលទៀត។
លោកចៅក្រមប្រាប់ជនជាប់ចោទថា៖ «រឿងនេះប្រសិនបើជនជាប់ចោទមិនសុខចិត្តគឺអាចប្តឹងបន្តទៅសាលាឧទ្ធរណ៍បាន គិតចាប់ពីថ្ងៃប្រកាសសាលក្រមនេះរយៈពេល ១ ខែ»។
ទោះយ៉ាងណា ជនជាប់ចោទបានប្រាប់នៅក្រៅបន្ទប់សវនាការថា ការផ្តន្ទាទោសលើរូបលោកបែបនេះគឺជារឿងអយុត្តិធម៌ព្រោះលោកមិនបានប្រព្រឹត្តដូចការចោទប្រកាន់ទេ។
លោក Cokovic Denis បានថ្លែងថា៖ «ខ្ញុំនឹងប្តឹងទៅសាលាឧទ្ធរណ៍បន្តទៀត ព្រោះបើខ្ញុំមិនប្តឹងបានន័យថាខ្ញុំបានប្រព្រឹត្តហើយ»។
ចំណែកឯលោក គង់ សំអុន មេធាវីការពារសិទ្ធិឲ្យលោក Cokovic Denis បានប្រាប់ភ្នំពេញប៉ុស្តិ៍នៅក្រៅបន្ទប់សវនាការដែរថា កូនក្តីរបស់លោកបានជាប់ឃុំបាន ១៩ ខែហើយ ហើយតុលាការដាក់ទោសគាត់ ២ ឆ្នាំ ដូច្នេះនៅសល់តែ ២ ខែទៀតទេ គាត់ត្រូវចេញពីពន្ធនាគារហើយ។
លោកបញ្ជាក់ប្រាប់ថា៖ «ចំពោះតុលាការបង្គាប់ឲ្យកូនក្តីខ្ញុំសងជំងឺចិត្តទៅដើមបណ្តឹង ១០ លានរៀលនោះប្រសិនបើយើងមិនប្តឹងទៅសាលាឧទ្ធរណ៍គឺបានន័យថា យើងទទួលសងគេហើយ។ យ៉ាងណាចាំខ្ញុំពិភាក្សាជាមួយកូនក្តីខ្ញុំសិន»។
ជនជាប់ចោទបញ្ជាក់ថា ពេលសវនាការគាត់បាននិយាយថា នៅអំឡុងឆ្នាំ ២០១៦ គាត់បានស្គាល់លោក កៅ គឹមហួន ហើយបង្កើតក្រុមហ៊ុនរីសតនៅខេត្តសៀមរាប ខេត្តកែប និងខេត្តកំពត ដោយប្រើប្រាស់ប្រាក់ទុនជាង ២៣ លានដុល្លារ។ក្នុងនោះលោកកៅ គឹមហួន មានតួនាទីជាអ្នករត់ការឯកសារនានាដើម្បីអនុវត្តគម្រោងដោយក្រុមហ៊ុននេះមានទីតាំងនៅក្រុងបាងកកប្រទេសថៃផង។
ជនជាប់ចោទបានបន្តថា ដោយសារលោក កៅ គឹមហួន ជាអ្នករត់ការឯកសារនោះគាត់ [កៅ គឹមហួន ] បានទាមទារប្រាក់ពីខ្លួនម្ដងៗ ៥០ ម៉ឺនដុល្លារ ហើយភាគីដើមបណ្តឹងបានជំរុញឲ្យគាត់ (Cokovic Denis) ចេញសែកពីក្រុមហ៊ុននៅក្រុងបាងកកចំនួន ១០ សន្លឹកមានទឹកប្រាក់ចំនួន ៥៩ លានដុល្លារមកឲ្យលោក កៅ គឹម ហួន។ ប៉ុន្តែចំពោះខ្លួនគាត់ (Cokovic Denis) មិនទាន់បានចំណាយប្រាក់ទេ ដោយសារគម្រោង និងឯកសារទាំងឡាយមិនទាន់ធ្វើរួច។
ប៉ុន្តែបើតាមកំណត់ហេតុតុលាការ បានបង្ហាញថា ក្រោយពេលមានការឯកភាពគ្នាពីគម្រោងបង្កើតរីសត លោក Cokovic Denis បានខ្ចីប្រាក់សុទ្ធពីលោក កៅ គឹមហួន ជាបន្តបន្ទាប់ រហូតដល់ជាង ២៧ លានដុល្លារ រួមទាំងការទិញរថយន្តទំនើបៗ BMW រថយន្តឡិចស៊ីស ៥៧០ យកមកប្រើប្រាស់មុនផង ទើបឈ្មោះ Cokovic Denis បានចេញសែកចំនួន ១០ សន្លឹក មានទឹកប្រាក់ ៥៩ លានដុល្លារ តែសែកនោះគ្មានលុយ ទើបលោកស្រី ឃឹម រ៉ានី សម្រេចដាក់ពាក្យបណ្ដឹងតែម្ដង៕