The Phnom Penh Post Search

Search form




Logo of Phnom Penh Post newspaper Phnom Penh Post - បុរស​បើករថយន្ត​ឱ្យ​ខ្មាន់កាំភ្លើង​បាញ់សម្លាប់​មន្ត្រី​នគរបាល ​ត្រូវបាន​ឃុំខ្លួន




បុរស​បើករថយន្ត​ឱ្យ​ខ្មាន់កាំភ្លើង​បាញ់សម្លាប់​មន្ត្រី​នគរបាល ​ត្រូវបាន​ឃុំខ្លួន

Content image - Phnom Penh Post
បុរស​បើករថយន្ត​ឱ្យ​ខ្មាន់កាំភ្លើង​បាញ់សម្លាប់​មន្ត្រី​នគរបាល ​ត្រូវបាន​ឃុំខ្លួនដោយ​ចោទប្រកាន់​ ២ ​ករណី​ក្នុង​បទ ​«​សមគំនិត​ក្នុង​អំពើ​ឃាតកម្ម និង​ជួញដូរ​ដោយ​ខុសច្បាប់​នូវ​សារធាតុ​ញៀន​»។ រូបថត នគរបាល

បុរស​បើករថយន្ត​ឱ្យ​ខ្មាន់កាំភ្លើង​បាញ់សម្លាប់​មន្ត្រី​នគរបាល ​ត្រូវបាន​ឃុំខ្លួន

ភ្នំពេញៈ បុរស​បើកឡាន​ឱ្យ​ជនដៃដល់​ក្នុង​អំពើ​ឃាតកម្ម​មួយ​ត្រូវ​បាន​តុលាការ​សម្រេច​ឃុំខ្លួន ដោយ​ចោទប្រកាន់​ ២ ​ករណី​ក្នុង​បទ ​«​សមគំនិត​ក្នុង​អំពើ​ឃាតកម្ម និង​ជួញដូរ​ដោយ​ខុសច្បាប់​នូវ​សារធាតុ​ញៀន​» ​ក្រោយ​ឃាត់ខ្លួន​ពាក់ព័ន្ធ​សំណុំរឿង​បាញ់សម្លាប់​មន្ត្រីនគរបាល​នៃ​ស្នងការដ្ឋាន​នគរបាល​រាជធានី​ភ្នំពេញ​ដែល​ផ្តើមចេញពី​ទំនាស់​ពាក្យសម្តី​ដោយសារ​គ្រោះថ្នាក់​ចរាចរណ៍​។

ការឃុំខ្លួន​នេះ​ក្រោយពី​បុរស​ជនជាប់ចោទ​ជា​អ្នកបើករថយន្ត​ឱ្យ​ជនដៃដល់​បាញ់សម្លាប់​មន្ត្រី​នគរបាល​ដែល​ជា​នាយរង​ការិយាល័យ​ព្រហ្មទណ្ឌ​កម្រិត​ស្រាល​នៃ​ស្នងការដ្ឋាន​នគរបាល​រាជធានី​ភ្នំពេញ​ឈ្មោះ​ រ៉េត ស៊ីណែត ហៅ​ ញ៉ក់ កាលពី​យប់​ថ្ងៃទី​ ២៩ ធ្នូ ឆ្នាំ​ ២០២០ នៅ​ខណ្ឌ​ពោធិ៍សែនជ័យ​ត្រូវ​បាន​ចាប់ខ្លួន​កាលពី​ថ្ងៃទី​ ៤ មករា​។

លោក​ គុជ គឹមឡុង អ្នកនាំពាក្យ​សាលាដំបូង​រាជធានី​ឱ្យដឹង​ពី​ថ្ងៃ​ទី​ ៩ ​មករា ថា ជនជាប់ចោទ​ឈ្មោះ​ កែ ចាន់ មាន​ត្រូវបាន​លោក​ លី សុខា ចៅក្រម​ស៊ើបសួរ​សាលាដំបូង​រាជធានី​ចេញ​ដីកា​សម្រេច​ឃុំខ្លួន​នៅ​ពន្ធនាគារ​ព្រៃស​បណ្តោះអាសន្ន​នៅ​ថ្ងៃទី​ ៨ ខែ​មករា​។

លោក​ គុជ គឹមឡុង បញ្ជាក់ថា​៖ «​លោក​ព្រះរាជអាជ្ញារង ឆាយ ហុង បាន​ចោទប្រកាន់ ២ ​បទល្មើស ទី​១- ​សមគំនិត​ក្នុង​អំពើ​ឃាតកម្ម​» និង​ទី​២- ​ជួញដូរ​ដោយ​ខុសច្បាប់​នូវ​សារធាតុ​ញៀន ហើយ​ឥឡូវនេះ​ (​ថ្ងៃទី​ ៨ មករា​) ​លោក​ចៅក្រម​ស៊ើបសួរ​បាន​សម្រេច​ឃុំខ្លួន​ហើយ​»​។

លោក ស ថេត ស្នងការ​នគរបាល​រាជធានី​ភ្នំពេញ​ពី​ម្សិលមិញ​មិនអាច​ទាក់ទង​សុំ​ការបញ្ជាក់​ជុំវិញ​ករណី​នេះ​បានទេ ដោយ​ទូរស័ព្ទ​លោក​គ្មាន​អ្នកទទួល​។

លោក​ ង៉េង ជួ ប្រធាន​នាយកដ្ឋាន​នគរបាល​ព្រហ្មទណ្ឌ​នៃ​អគ្គស្នងការដ្ឋាន​នគរបាល​ជាតិ​ថ្លែងថា ជនសង្ស័យ​ម្នាក់​ដែល​ពាក់ព័ន្ធ​ក្នុង​សំណុំ​រឿងនេះ​ត្រូវបាន​តុលាការ​សម្រេច​ឃុំខ្លួន​រួចរាល់​ហើយ​។ ចំណែក​ជនសង្ស័យ​ម្នាក់ទៀត​សមត្ថកិច្ច​ជំនាញ​កំពុង​ធ្វើ​ការងារ​បន្ដទៀត​។

លោក​ថា​៖ «​ចំពោះ​ករណី​ជនសង្ស័យ​ដែល​កំពុង​រត់គេចខ្លួន​នោះ គឺ​យើង​កំពុង​ធ្វើការងារ​យ៉ាង​យកចិត្ត​ទុកដាក់ ប៉ុន្ដែ​ក្នុង​ស្ថានភាព​នេះ​ខ្ញុំ​មិនទាន់​អាច​អត្ថាធិប្បាយ​អ្វី​បន្ថែម​ឱ្យ​ច្រើន​ជាង​នេះ​ទៀត​ទេ គឺ​មន្ត្រី​ជំនាញ​យើង​កំពុងធ្វើការ​»​។

តាម​របាយការណ៍​របស់​ស្នងការដ្ឋាន​នគរបាល​ខេត្តបាត់ដំបង​ឱ្យដឹង​កាលពី​ថ្ងៃទី​ ៤ មករា ថា សមត្ថកិច្ច​នគរបាល​ខេត្ត​បាត់ដំបង​សហការ​ជាមួយ​សមត្ថកិច្ច​នគរបាល​នាយកដ្ឋាន​នគរបាល​ព្រហ្មទណ្ឌ​ក្រសួង​មហាផ្ទៃ និង​សមត្ថកិច្ច​នគរបាល​រាជធានី-ភ្នំពេញ​ឃាត់ខ្លួន​បុរស​ កែ ចាន់​។

បើតាម​របាយការណ៍​ជន​នេះ​មិនមាន​មុខរបរ​ពិតប្រាកដ​មាន​ទីលំនៅ​ភូមិ​អន្លង់វិល ឃុំ​អន្សា ស្រុក​កណ្តៀង ខេត្តពោធិ៍សាត់ គឺជា​អ្នកបើករថយន្ត Luxus Rx300 ពណ៌​ខ្មៅ​ដឹក​ជនដៃដល់​ឈ្មោះ អ៊ា ណារ៉េន​។ កែ ចាន់ បាន​រត់គេច​ទៅសម្ងំ​លាក់ខ្លួន​នៅ​សង្កាត់​ទួលតាឯក ក្រុង​បាត់ដំបង ខេត្ត​បាត់ដំបង​។ ក្រោយ​ធ្វើការ​ឃាត់ខ្លួន​សមត្ថកិច្ច​នគរបាល​ខេត្តបាត់ដំបង​បាន​ប្រគល់​ជូន​សមត្ថកិច្ច​នគរបាល​នាយកដ្ឋាន​នគរបាល​ព្រហ្មទណ្ឌ​ក្រសួង​មហាផ្ទៃ និង​សមត្ថកិច្ច​រាជធានី​ភ្នំពេញ ដើម្បី​បន្ត​នីតិវិធី​ច្បាប់​៕

អត្ថបទគួរចាប់អារម្មណ៍

  • ព្រះសីហនុៈ រដ្ឋបាលខេត្ត​ព្រះសីហនុ​កំពុង​ចាក់​ខ្សាច់​ថ្មី​បំពេញ​នៅតាម​កន្លែង​ជ្រលង​ទឹកហូរ​ដែលមាន​ខ្សាច់​ទាប និង​ខ្សាច់​ខ្មៅ​នៅ​ចំណុច​ឆ្នេរ​អូរឈើទាល​ក្នុង​សង្កាត់​លេខ​ ៤ ក្រុងព្រះសីហនុ ដើម្បី​កែលម្អ​សោភណភាព​ឆ្នេរ​ខ្សាច់ ក៏ប៉ុន្តែ​មន្ត្រីខេត្ត​នៅ​មិន​អាច​ប៉ាន់ប្រមាណ​ថា​នឹង​ត្រូវ​ប្រើ​ខ្សាច់​ប៉ុន្មាន​រថយន្ត​នោះទេ​។

  • ភ្នំពេញៈ ប្រទេស​ជប៉ុន​ ផ្តល់​ជំនួយ​ឥតសំណង​ដល់​កម្ពុជា​ចំនួន ១ ១៣២ ​លាន​យ៉េន​ (១០,៨ ​លាន​ដុល្លារ​) ​សម្រាប់​អនុវត្ត​គម្រោង​អភិវឌ្ឍន៍​ចរាចរណ៍​នាវា​នៅ​កំពង់ផែ​ស្វយ័ត​ក្រុងព្រះសីហនុ​ដើម្បី ​ធ្វើឱ្យ​ប្រសើរ​ឡើង​នូវ​សុវត្ថិភាព​ផ្លូវ​សមុទ្រ​។ នេះ​បើតាម​ស្ថានទូត​ជប៉ុន​ប្រចាំ​នៅ​កម្ពុជា​។

  • ភ្នំពេញ៖ កីឡាការិនី​កូន​ខ្មែរ​កាត់​បារាំង វ័យ ១៧ ឆ្នាំ ម៉ា រីយ៉ាន មាន​ចំណង់​ចំណូលចិត្ត​ខ្លាំង​ទៅ​លើ​ប្រភេទ​កីឡា​ប្រយុទ្ធ ពិសេស​ការ​ប្រណាំង​ម៉ូតូ​ហោះ ហើយ​កញ្ញា​បាន​អះអាង​ថា នឹង​មិន​បោះបង់​ចោល​ជំនាញ​នេះ​ឡើយ បើ​ទោះបី​ជា​ប្រភេទ​កីឡា​នេះ មាន​ផល​ប៉ះពាល់ និង​ធ្លាប់​ជួប​ឧបសគ្គ​គ្រោះ​ថ្នាក់​ធំ​​ក៏​ដោយ។

  • ភ្នំពេញៈ តម្លៃ​ពោត​ក្នុង​រដូវ​ប្រមូលផល​ឆ្នាំនេះ​បាន​ស្ទុះ​ឡើង ដោយសារ​តែ​ការកើនឡើង​នៃ​តម្រូវការ​សម្រាប់​ការផលិត​ចំណី​សត្វ​ក្នុងស្រុក​។ ការប្រមូលផល​ពោតក្រហម​នៅក្នុង​ខេត្ត​ត្បូងឃ្មុំ​ពេលនេះ​សម្រេច​បាន​ប្រមាណ ៥០ ​ភាគរយ​ហើយ​ដោយ​តម្លៃ​គ្រាប់ពោត​ស្ងួត​បាន​កើនឡើង​ជិត ២០ ​ភាគរយ​ បើ​ធៀប​នឹង​រយៈពេល​ដូចគ្នា​កាលពី​ឆ្នាំមុន

  • កោះកុងៈ ដី​គម្រប​ព្រៃឈើ​របស់​រដ្ឋ​រាប់ពាន់​ម៉ែត្រការ៉េ​ក្នុង​ទំហំ​ដី​បម្រុង​របស់​រដ្ឋ​ទំហំ​ប្រមាណ​ ១១ ​ហិកតា ស្ថិតនៅ​ភូមិ​កោះស្តេច ឃុំ​កោះ​ស្តេច ស្រុក​គិរីសាគរ ខេត្តកោះកុង​ត្រូវបាន​ជន​មិន​ស្គាល់​អត្តសញ្ញាណ​ចាប់ផ្ដើម​លួច​បោះបង្គោល​ថ្ម និង​ឈើ​ទន្ទ្រាន​យក​ដោយ​ខុសច្បាប់​។

  • កំពង់ស្ពឺៈ ពលរដ្ឋ​ជាង​ ៥០០ ​គ្រួសារ ​រស់នៅក្នុង​ឃុំ​ទួល​អម្ពិល​ស្រុក​បសេដ្ឋ ខេត្តកំពង់ស្ពឺ​បាន​បង្ហាញ​ក្ដីបារម្ភ​ពី​ការខ្វះ​ទឹក​សម្រាប់​ស្រោចស្រព​ស្រែចម្ការ និង​ដំណាំ​ផ្សេងៗ ខណៈ​បច្ចុប្បន្ន​មាន​ឈ្មួញ​យក​ម៉ាស៊ីន​ទៅ​បូមទឹក​ទាំងយប់​ទាំង​ថ្ងៃ​នៅក្នុង​ទំនប់​បុរាណ​ព្រៃពាយ​ដែល​ពួកគាត់​កំពុង​ប្រើប្រាស់​ជាប្រចាំ​។