.jpg)
ជនជាប់ចោទពេលនាំមកសាលាដំបូងរាជធានីភ្នំពេញ។ រូបថត ហ្វេសប៊ុក
ភ្នំពេញៈ សាលាដំបូងរាជធានីភ្នំពេញកាលពីថ្ងៃអង្គារបានប្រកាសសាលក្រមផ្តន្ទាទោសជនជាប់ចោទម្នាក់ឲ្យជាប់ពន្ធនាគារអស់ ១ ជីវិត បន្ទាប់ពីបើកសវនាការកាលពីថ្ងៃទី ១៣ វិច្ឆិកា ពាក់ព័ន្ធនឹងករណីចាក់សម្លាប់បុរសម្នាក់ដើម្បីប្លន់យកម៉ូតនៅផ្ទះសំណាក់ក្នុងភូមិឫស្សី ២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញកាលពីថ្ងៃទី ២៧ ខែមករា ឆ្នាំនេះ។
លោក អ៊ី រិន្ទ អ្នកនាំពាក្យនៃសាលាដំបូងរាជធានីភ្នំពេញបានប្រាប់កាសែតភ្នំពេញប៉ុស្តិ៍បន្ទាប់ពីប្រកាសសាលក្រមថា ជនជាប់ចោទឈ្មោះ សាន់ ទង ហៅ ធី អាយុ ២៥ ឆ្នាំ ដែលជាប់ចោទពីបទឃាតកម្មត្រូវបានលោកស្រី ចៅក្រម ស៊ លីនណា ជាប្រធានក្រុមប្រឹក្សាជំនុំជម្រះប្រកាសសាលក្រមនៅចំពោះមុខជនជាប់ចោទថា ក្រោយពីបានសួរដេញដោល និងក្រោយពីបានស្តាប់ការសន្និដ្ឋានរបស់មេធាវីការពារសិទ្ធិឲ្យជនជាប់ចោទមកតុលាការសម្រេចផ្តន្ទាទោសឲ្យជាប់ពន្ធនាគារអស់ ១ ជីវិត។
លោកបានបញ្ជាក់ថា៖ «ជននេះត្រូវចោទពីបទឃាតកម្មគិតទុកជាមុនតាមបញ្ញត្តិមាត្រា ២០០ នៃក្រមព្រហ្មទណ្ឌ»។
យោងតាមកំណត់ហេតុរបស់តុលាការបានបង្ហាញថា ជនរងគ្រោះឈ្មោះ យ៉ាន់ ជឿន គឺជាអ្នករត់ម៉ូតូឌុប ហើយមុនកើតហេតុកាលពីថ្ងៃទី ២៧ មករា ឆ្នាំ ២០១៩ ជនជាប់ចោទឈ្មោះ សាន់ ទង បានហៅជនរងគ្រោះឲ្យឌុបខ្លួន។ ប៉ុន្តែក្រោយមកជនជាប់ចោទបានបបួលជនរងគ្រោះចូលផ្ទះសំណាក់មួយមានយីហោ (ចន្ធូត្រជាក់ចិត្ត) ស្ថិតនៅផ្លូវបេតុងភូមិឫស្សី២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
កំណត់ហេតុដដែលបង្ហាញថានៅថ្ងៃកើតហេតុនោះគឺបុគ្គលិកផ្ទះសំណាក់ប្រទះឃើញជនរងគ្រោះដេកស្លាប់នៅក្នុងបន្ទប់លេខ ៣ ដោយនៅលើខ្លួនជនរងគ្រោះមានប្រឡាក់ឈាមជោក ហើយក៏រាយការណ៍ប្រាប់សមត្ថកិច្ច។
ជនរងគ្រោះត្រូវបានជនជាប់ចោទចាក់ត្រូវខ្លួនជាច្រើនកាំបិតប្លន់យកម៉ូតូ ១ គ្រឿងម៉ាក HONDA C125 ពណ៌ខ្មៅពាក់ស្លាកលេខ ភ្នំពេញ 1FL9986 និងចិញ្ចៀន ១ វង់ ហើយរត់គេចខ្លួនបាត់។
លុះដល់ថ្ងៃទី ៣១ ខែ មករា ឆ្នាំ ២០១៩ សមត្ថកិច្ចនគរបាលខេត្តបាត់ដំបងសហការជាមួយនគរបាលក្រសួងមហាផ្ទៃស្រាវជ្រាវចាប់ខ្លួនបាននៅភូមិស្វាយធំ ឃុំបឹងរាំង ស្រុកកំរៀង ខេត្តបាត់ដំបង ខណៈជនជាប់ចោទប៉ុនប៉ងឆ្លងដែនទៅប្រទេស ថៃ ហើយបានបញ្ជូនមករាជធានីភ្នំពេញវិញ៕
