.jpg)
ជនសង្ស័យដែលកាប់សម្លាប់ក្មេងអាយុជាង ១ ឆ្នាំ នៅខេត្តកំពង់ស្ពឺ។ រូបថត នគរបាល
កំពង់ស្ពឺៈ ជនសង្ស័យម្នាក់ដែលប្រពន្ធអះអាងថា កើតមានជំងឺផ្លូវចិត្តជាច្រើនឆ្នាំមកហើយ ដែលបានយកកាំបិតផ្គាក់ កាប់ក្មេងប្រុសអាយុជាង ១ ខួបម្នាក់ស្លាប់ ហើយអារកខ្លួនឯងជាក្រោយ តែមិនស្លាប់នៅភូមិអំពិលផ្អែម ឃុំរលាំងចក ស្រុកសំរោងទង ខេត្តកំពង់ស្ពឺ កាលពីថ្ងៃទី ១៤ ខែមីនា កំពុងសម្រាកព្យាបាលនៅមន្ទីរពេទ្យខេត្តកំពង់ស្ពឺ ដោយមានកម្លាំងនគរបាលយាមកាម។
លោក ភោក សម្បត្តិ នាយការិយាល័យនគរបាលបច្ចេកទេសវិទ្យាសាស្រ្ត នៃស្នងការដ្ឋាននគរបាលខេត្តកំពង់ស្ពឺប្រាប់ពីម្សិលមិញថា ជនសង្ស័យឈ្មោះ អ៊ាង រ៉ាដូ ភេទប្រុសអាយុ ៤០ ឆ្នាំ មានប្រពន្ធ និងមានកូន ៣ នាក់ ដែលកូនប្រុសច្បងអាយុ ១៦ ឆ្នាំ រីឯកូនស្រីពៅអាយុ ៦ ឆ្នាំ។ចំណែកក្មេងប្រុសរងគ្រោះឈ្មោះ ភ.ដ.ណ អាយុ ១ ឆ្នាំ ២ ខែ ដែលមានម្តាយឈ្មោះ ផ. ស.ន. អាយុ ៣០ ឆ្នាំ ជាកម្មការិនីរោងចក្រកាត់ដេរ ដែលមានឪពុកឈ្មោះ ភ. ស.ណ. អាយុ ៣០ ឆ្នាំ រស់នៅក្នុងភូមិ-ឃុំ កើតហេតុខាងលើ។
លោកប្រាប់ថា៖ «ជនសង្ស័យម្នាក់នោះ កំពុងសម្រាកព្យាបាលរបួស ប៉ុន្តែសមត្ថកិច្ចយើងនៅយាមគាត់ក្នុងបន្ទប់នៅមន្ទីរពេទ្យនោះដែរ ព្រោះបន្ទាប់ពីកាប់ក្មេងហើយ ជនសង្ស័យអារកខ្លួនឯង។ អ៊ីចឹងគាត់ក៏មានរបួសដែរ»។
បើតាមលោក សម្បត្តិ ក្មេងរងគ្រោះត្រូវបានជនសង្ស័យកាប់ត្រូវក្បាល ១ កាំបិត និងនៅផ្នែកត្រង់ក ១ កាំបិត ទើបបណ្តាលឱ្យក្មេងស្លាប់ភ្លាមៗនៅកន្លែងកើតហេតុ។
លោក យ៉ាវ កាន់ នាយនគរបាលប៉ុស្តិ៍ឃុំរលាំងចក ប្រាប់តាមសម្តីស្រ្តីជាម្តាយក្មេងរងគ្រោះពីម្សិលមិញថា រវាងផ្ទះជនល្មើស (សង់ពីឥដ្ឋប្រក់ស័ង្កសីផ្ទាល់ដី) និងផ្ទះក្មេងរងគ្រោះ នៅទល់ខ្នងគ្នាក្នុងភូមិ-ឃុំ កើតហេតុខាងលើហើយនៅមុនពេលកើតហេតុ នៅវេលាប្រមាណជាម៉ោង ១ រសៀល ថ្ងៃទី ១៤ ខែមីនា ក្មេងរងគ្រោះបានដើរលេងនៅក្បែរផ្ទះជនសង្ស័យ។
ពេលនោះស្រាប់តែជនសង្ស័យចេញពីផ្ទះរបស់ខ្លួន ដោយក្នុងដៃកាន់កាំបិតផ្គាក់ ១ បានទៅកាប់ក្មេងរងគ្រោះចំក្បាល ១ កាំបិត និងត្រង់ក ១ កាំបិត ធ្វើឱ្យក្មេងរងគ្រោះដួលដេកស្តូកស្តឹងនៅនឹងកន្លែងកើតហេតុ។
ពេលនោះម្តាយយាយ និងមីងរបស់ក្មេងរងគ្រោះ បាននាំគ្នាដេញតាមជនសង្ស័យ ខណៈក្មេងរងគ្រោះបានដាច់ខ្សល់ស្លាប់បាត់ទៅហើយ។
បន្ទាប់ពីបង្កហេតុជនសង្ស័យបានកាន់កាំបិតរត់ចូលក្នុងផ្ទះរបស់ខ្លួនវិញ ហើយប្រជាពលរដ្ឋបានរាយការណ៍ប្រាប់ទៅសមត្ថកិច្ច។
លោក ឃុត សុផល អធិការនគរបាលស្រុកសំរោងទង បានដឹកនាំកម្លាំងចុះដល់ទីតាំងកើតហេតុ។
ដំបូងឡើយ សមត្ថកិច្ចបានព្យាយាមហៅជនសង្ស័យ ឱ្យចេញប្រគល់ខ្លួនឱ្យសមត្ថកិច្ចតាមសម្រួល តែជនសង្ស័យមិនព្រមចេញពីផ្ទះឡើយ ដែលសមត្ថកិច្ចប្រើពេលជិត ២ ម៉ោងមិនទទួលបានលទ្ធផល ទើបលោកស្នងការខេត្ត សំ សាមួន បានបញ្ជាឱ្យកម្លាំងពិសេសរបស់ស្នងការដ្ឋាននគរបាលខេត្តកំពង់ស្ពឺ បាញ់គ្រាប់បែកផ្សែងចូលក្នុងផ្ទះ ធ្វើឱ្យជនសង្ស័យឈ្លក់ផ្សែងទើបសមត្ថកិច្ចចាប់បានតែម្តង។
លោកឱ្យដឹងថា៖ «ពេលនោះជនសង្ស័យកាន់កាំបិតនៅជាប់នឹងដៃ ហើយបើយើងចូលចាប់ដោយមិនប្រើជំនាញទេ គឺជនសង្ស័យកាប់សមត្ថកិច្ចយើងជាមិនខាន»។
អ្នកស្រី ពិន គីម អាយុ ៣៨ ឆ្នាំ ជាប្រពន្ធជនសង្ស័យ បានប្រាប់ពីម្សិលមិញថា ប្តីរបស់អ្នកស្រីមានរបរជាអ្នកស៊ីឈ្នួលបើកបររថយន្តដឹកសព ហើយកើតមានជំងឺផ្លូវចិត្តតាំងពីឆ្នាំ ២០១២ មកម៉្លេះ។
ពេលដឹងថា ប្តីអ្នកស្រីមានស្មារតីមិនប្រក្រតីបែបនេះ អ្នកស្រីតែងនាំប្តីទៅពិនិត្យជំងឺនៅមន្ទីរពេទ្យមិត្តភាពខ្មែរ-សូវៀត ហើយគ្រូពេទ្យប្រាប់ថា ប្តីអ្នកស្រីមានជំងឺផ្លូវចិត្ត។ តាំងពីពេលនោះមក ប្តីរបស់អ្នកស្រីត្រូវគ្រូពេទ្យឱ្យលេបថ្នាំជាប្រចាំច្រើនឆ្នាំមកហើយ។
តែដោយលេបថ្នាំមិនទទួលបានលទ្ធផល អ្នកស្រីក៏យកប្តីទៅឱ្យគ្រូខ្មែរព្យាបាលម្តងវិញ ហើយគ្រូខ្មែរប្រាប់ថា ប្តីអ្នកស្រីមានជំងឺកំរោលចូល ដោយសារគាត់ជាអ្នកបើកបររថយន្តដឹកសព ហើយវិញ្ញាណសពទាំងនោះបាននៅសណ្ឋិតក្នុងខ្លួនប្តីអ្នកស្រីមិនចេញឡើយ។
អ្នកស្រីបន្តថា៖ «ខ្ញុំរកទាំងគ្រូខ្មែរ ទាំងពេទ្យនៅតែមើលមិនជា។ ប្តីខ្ញុំចេះតែរករឿងខ្ញុំ ក៏ខ្ញុំនាំកូនៗទៅរស់នៅផ្ទះខាងម្តាយបង្កើតខ្ញុំទៅ។ ប៉ុន្តែ ១ អាទិត្យ ខ្ញុំនាំកូនៗមកលេងគាត់ម្តង។ គាត់នៅមានស្មារតីចាំ នៅហៅឈ្មោះកូនៗត្រូវទាំងអស់។ តែខ្ញុំក៏មិននឹកស្មានថា ជំងឺរបស់ប្តីខ្ញុំ វិវឌ្ឍខ្លាំងដល់ថ្នាក់កាប់សម្លាប់ក្មេងទេ»។
អ្នកស្រីបញ្ជាក់ថា ដោយសារប្តីអ្នកស្រីមានជំងឺបែបនេះ ទើបអ្នកស្រីទុកឱ្យប្តីនៅផ្ទះតែឯង តែមានឪពុកម្តាយរបស់គាត់មានផ្ទះនៅក្បែរនោះជួយមើលឱ្យបាយនំចំណីហូបរាល់ថ្ងៃដែរ។
ចំណែកកាំបិតដែលប្តីអ្នកស្រីកាប់ក្មេងនោះ គឺទុកកាប់អុសដុត ដែលមាននៅក្នុងផ្ទះយូរមកហើយ។ ចំពោះក្មេងប្រុសដែលស្លាប់នោះ ម្តាយក្មេងក៏ត្រូវជាក្មួយជីដូនមួយនឹងប្តីអ្នកស្រីដែរ មិនមែនជាសាច់ឆ្ងាយទេ៕
