.jpg)
បុរសម្នាក់ទៀតបានស្លាប់ភ្លាមៗ ដោយសារដីខ្សាច់បាក់សង្កត់លើនៅក្នុងរណ្ដៅដីអាជីវកម្មបូមខ្សាច់មួយកន្លែង។
បុរសម្នាក់ទៀតបានស្លាប់ភ្លាមៗ ដោយសារដីខ្សាច់បាក់សង្កត់លើនៅក្នុងរណ្ដៅដីអាជីវកម្មបូមខ្សាច់មួយកន្លែង ស្ថិតនៅភូមិល្វា ឃុំស្វាយរំពា ស្រុកកំពង់លែង ខេត្តកំពង់ឆ្នាំង ដែលនេះជាករណីស្លាប់លើកទី ២ ហើយនៅដើមឆ្នាំ ២០២១ នេះ។
លោក ប៉ាល់ ជឿន អធិការស្រុកកំពង់លែង បានប្រាប់ភ្នំពេញប៉ុស្តិ៍នៅល្ងាចថ្ងៃទី ២៥ ខែមេសាថា ហេតុការណ៍នេះបានកើតឡើងកាលពីវេលាម៉ោង ១០ ព្រឹក ថ្ងៃទី ២៣ ខែមេសា ឆ្នាំ ២០២១។
ជនរងគ្រោះឈ្មោះ មុត គន្ធា ភេទប្រុស អាយុ ៤០ ឆ្នាំជាម្ចាស់រណ្ដៅដីអាជីវកម្មបូមខ្សាច់ខាងលើនេះ និងមានទីលំនៅភូមិច្រែស ឃុំត្រងិល ស្រុកកំពង់លែង ខេត្តកំពង់ឆ្នាំង។
តាមការបញ្ជាក់របស់ឈ្មោះ មុត កុសល អាយុ ៣៥ ឆ្នាំដែលជាប្អូនប្រុសបង្កើតជនរងគ្រោះបានឱ្យដឹងថា មុនពេលកើតហេតុ ពួកគេទាំង ២ នាក់បានទៅរៀបចំបូមខ្សាច់ចេញពីរណ្ដៅដីរបស់ពួកគេ ដើម្បីគរទុកលក់ដូចសព្វដង ដោយជនរងគ្រោះបានចុះទៅពិនិត្យក្បាលទុយោបូមខ្សាច់ និង បញ្ឆេះម៉ាស៊ីន ដើម្បីបូមខ្សាច់។
ប៉ុន្តែជាអកុសលនៅពេលដែលគាត់ចុះទៅទាញទុយោ ដើម្បីប្ដូរក្បាលបូមក៏ស្រាប់តែបាក់ច្រាំងរណ្ដៅដីបូមខ្សាច់នោះ សង្កត់លើគាត់ធ្លាក់ចូលទៅក្នុងរណ្ដៅដីនោះតែម្ដង។
លោក ប៉ាល់ ជឿន បានបញ្ជាក់ថា៖ «ភ្លាមៗនោះប្អូនប្រុសរបស់គាត់ និង អ្នកភូមិបានព្យាយាមចុះកាយដីរកជនរងគ្រោះ និងស្រង់ចេញពីក្នុងរណ្ដៅដីនោះ ដើម្បីជួយសង្គ្រោះជីវិតផងដែរ ប៉ុន្តែនៅពេលស្រង់ចេញផុតពីក្នុងទឹកនៃរណ្ដៅដីនោះ ជនរងគ្រោះបានដាច់ខ្យល់ស្លាប់បាត់ទៅហើយ»។
បើតាមលោក ប៉ាល់ ជឿន នេះជាករណីទី ២ ហើយនៅក្នុងឆ្នាំនេះ ដែលមានជនរងគ្រោះស្លាប់ក្នុងករណីបាក់ដីនៅក្នុងមូលដ្ឋានឃុំស្វាយរំពានៃស្រុកកំពង់លែង ដែលករណីលើកទី ១ បានកើតឡើងកាលពីអំឡុងខែមករា ឆ្នាំ ២០២១។
លោកបានបន្ថែមថា៖ «ជាទូទៅ ការធ្វើអាជីវកម្មបូមខ្សាច់ជាលក្ខណៈគ្រួសារ នៅក្នុងតំបន់នេះ អ្នកភូមិធ្វើឡើងដោយគ្មានលក្ខណៈបច្ចេកទេសត្រឹមត្រូវនោះទេ គឺធ្វើតាមការចេះដឹងតៗគ្នាប៉ុណ្ណោះ»៕
