បន្ទាយមានជ័យៈ បុរសម្នាក់ឈ្មោះ យឿន រ៉ន អាយុ ៣៣ ឆ្នាំ បានរងរបួសដាច់ជើងស្ដាំនៅចំណុចអូរលៀងកាលពីថ្ងៃទី ១៤ ខែកុម្ភៈ ខណៈពេលកំពុងព្យាយាមលួចឆ្លងដែនចូលមកតាមដងព្រៃពីប្រទេសថៃចូលមកកម្ពុជា។
លោក ស៊ា សៅឌី នាយនគរបាលវរការពារព្រំដែនគោកប៉ុស្តិ៍ព្រៃគប់នៃអង្គភាពវរសេនាតូចលេខ ៩១១ បានប្រាប់ ភ្នំពេញ ប៉ុស្តិ៍ថា កាលពីព្រលប់ថ្ងៃទី ១៤ ខែ កុម្ភៈ ឆ្នាំ ២០២១ មានសំឡេងផ្ទុះគ្រាប់នៅចំណុចអូរលៀង ក្នុងភូមិសាស្ត្រ ភូមិព្រៃគប់ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
លោក សៅឌី ថ្លែងថា៖ «នៅពេលឮសំឡេងផ្ទុះ ក្រុមសមត្ថកិច្ចយើងបាននាំគ្នាទៅពិនិត្យ ក៏ប្រទះឃើញជនរងគ្រោះដេកដួលទៅលើដី ដោយរងរបួសដាច់កជើងខាងស្ដាំ និងមានស្នាមរបួសដាច់សាច់កំភួនជើង និងភ្លៅខាងស្ដាំជាច្រើនកន្លែង»។
លោក សៅឌី បានឱ្យដឹងថាជនរងគ្រោះត្រូវបានក្រុមការងាររបស់លោកសែងពីព្រៃ ហើយដឹកតាមរថយន្តយកទៅកាន់មន្ទីរពេទ្យបង្អែកក្រុងប៉ោយប៉ែតដើម្បីព្យាបាលរបួស។ ប៉ុន្តែដោយសាររបួសធ្ងន់ពេក ជនរងគ្រោះបានសន្លប់បាត់ស្មារតី ហើយដោយសារខាងមន្ទីរពេទ្យក៏ខ្វះឧបករណ៍សម្ភារវះកាត់ផងដែរនោះក្រុមគ្រូពេទ្យក៏បានបញ្ជូនបន្តទៅកាន់មន្ទីរពេទ្យខេត្តបន្ទាយមានជ័យ។
លោក សិទ្ធ ឡោះ ស្នងការខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា នៅពេលនេះ ជនរងគ្រោះកំពុងស្ថិតក្រោមការពិនិត្យ វះកាត់ និងព្យាបាលរបួសពីក្រុមគ្រូពេទ្យជំនាញ។
លោកនាយករដ្ឋមន្ត្រី ហ៊ុន សែន នៅព្រឹកថ្ងៃម្សិលមិញបានជំរុញឱ្យអាជ្ញាធរពាក់ព័ន្ធទាំងអស់រួមទាំងអាជ្ញាធរខេត្តជាប់ព្រំដែនថៃ ឡាវ និងវៀតណាម បង្កើនការទាក់ទងផ្លាស់ប្ដូរព័ត៌មានគ្នាឱ្យបានជាប់ជាប្រចាំជាមួយអាជ្ញាធរខេត្តនៃប្រទេសទាំង ៣ ដោយរឹតបន្តឹង ឬហាមឃាត់ឱ្យបាននូវការលួចឆ្លងដែនតាមច្រករបៀងតូចៗដោយខុសច្បាប់ដើម្បីបញ្ចៀសឱ្យបានការឆ្លងរីករាលដាលនៃជំងឺកូវីដ ១៩ ពីក្រៅប្រទេសចូលមកក្នុងសហគមន៍ក្នុងកម្ពុជា និងគ្រោះថ្នាក់ផ្សេងៗជាយថាហេតុ។
លោកថា៖ «កាលពីថ្ងៃទី ១៤ កុម្ភៈ មានពលករខ្មែរយើងម្នាក់ ឆ្លងដែនខុសច្បាប់រហូតដល់ជាន់មីនដាច់ជើង។ ក្រៅពីពិការ ក៏អាចនឹងចម្លងកូវីដ ១៩»៕