លោក ប៉ែន លឹម ត្រូវបានសមត្ថកិច្ចឃាត់ខ្លួនយកមកធ្វើការអប់រំ ករណីប្រេីប្រាស់ស្លាកលេខមិនត្រឹមត្រូវ និងបានប្រេីប្រាស់សម្តីមិនសមរម្យនៅលេីបណ្តាញសង្គម។ រូបថត ប៉ូលិស
ភ្នំពេញ៖ បុរសម្នាក់ឈ្មោះ ប៉ែន លឹម អាយុ ៤៩ ឆ្នាំ ដែលគេស្គាល់ថា ជាឧកញ៉ារស់នៅសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ដែលបានប្រើប្រាស់ស្លាកលេខរថយន្តមិនត្រឹមត្រូវបំពាក់លើរថយន្តរបស់ខ្លួនម៉ាក Highlander ពណ៌ស ត្រូវបានសមត្ថកិច្ចឃាត់ខ្លួន និងធ្វើការណែនាំអប់រំ។
ចំណាត់ការនេះ ធ្វើឡើងបន្ទាប់ពីក្រសួងសាធារណការ និងដឹកជញ្ជូន បានបញ្ជូនករណីនេះ ទៅអគ្គស្នងការដ្ឋាននគរបាលជាតិ ដើម្បីចាត់ការតាមផ្លូវច្បាប់ ដោយចាត់ទុកថា ទង្វើបែបនេះ ធ្វើឱ្យប៉ះពាល់ដល់សេចក្តីថ្លៃថ្នូររបស់ក្រសួង ដែលមិនមានគោលការណ៍ចេញស្លាកលេខពិសេសបែបនេះឡើយ។
សមត្ថកិច្ចនៃអធិការដ្ឋាននគរបាលខណ្ឌឫស្សីកែវ កាលពីថ្ងៃទី ២៤ មេសា វេលាម៉ោង ៤ រសៀល បានឃាត់ម្ចាស់រថយន្តម៉ាក Highlander ពណ៌ស ដែលបានបំពាក់ស្លាកលេខ «កម្ពុជា ឯកឧត្តម អ្នកឧកញ៉ា ប៉ែន លឹម» និងភ្ជាប់ Logo របស់គណបក្សប្រជាជនកម្ពុជា។
ក្រសួងសាធារណការ និងដឹកជញ្ជូន ចាត់ទុកករណីនេះ ជាទង្វើខុសច្បាប់។ សមត្ថកិច្ចបានឱ្យដឹងថា៖ «បុរសម្នាក់នេះ ក៏បានទទួលស្គាល់នូវកំហុសនេះ និងបានដោះស្លាកលេខមិនត្រឹមត្រូវនេះចេញ ដោយបានធ្វើកិច្ចសន្យា និងសុំទោសជាសារធាណ:ចំពោះការពាក់ស្លាកលេខមិនត្រឹមត្រូវនេះ ហើយក៏បានធ្វើការថតជាវីដេអូសុំទោសជាសាធារណៈ ចំពោះការប្រើប្រាស់ពាក្យសម្តីមិនសមរម្យនៅលើបណ្តាញសង្គម»។
សមត្ថកិច្ចបន្តថា៖ «ដោយមូលហេតុសុខភាពលើសឈាមផង ស្លាប់មួយចំហៀងខ្លួនផង និងកំពុងលេបថ្នាំសរសៃប្រសាទផង ក្រោយពីធ្វើការណែនាំអប់រំ ធ្វើកិច្ចសន្យា និងសុំទោសរួចរាល់សមត្ថកិច្ចក៏បានអនុញ្ញាតឲ្យគាត់វិលត្រឡប់ទៅគេហដ្ឋានវិញ»។ នេះបើតាមគេហទំព័រអង្គស្នងការដ្ឋាននគរបាលជាតិ។
ក្នុងវីដេអូសុំទោសជាសាធារណៈនោះ លោក ប៉ែន លឹម បានថ្លែងថា៖ «ដោយសារខ្ញុំមានការខឹងសម្បារជាមួយកូនចៅរបស់ខ្ញុំ ពីមុននៅជាមួយខ្ញុំ ក្រោយមកទៅនៅថៃ ហើយបង្ហោះស្លាកលេខខ្ញុំចូលទៅក្រសួងសាធារណការ ខ្ញុំឃើញក៏ខឹងហើយជេរវា ហើយក៏រាលដាលដល់ថ្នាក់ដឹកនាំមួយចំនួន។ ដូច្នេះ ខ្ញុំសុំការអភ័យទោស និងសុំទោសជាចាំបាច់ ដោយសារខឹងពេក ព្រោះជំងឺសរសៃប្រសាទរាលដាល»។
បុរសររូបនេះបន្តថា៖ «ចំពោះបញ្ហាស្លាកលេខឡាននេះ ខ្ញុំក៏បានដោះទុក ហើយចាប់ពីថ្ងៃនេះទៅខ្ញុំឈប់ប្រើហើយ»។
ភ្នំពេញ ប៉ុស្តិ៍ មិនទាន់អាចសុំអត្ថាធិប្បាយបន្ថែមពីអធិការនគរបាលខណ្ឌឫស្សីកែវបាននៅឡើយទេ។
ឡានដែលបំពាក់ស្លាកលេខមិនត្រឹមត្រូវ។ រូបថត ប៉ូលិស
រដ្ឋលេខាធិការក្រសួងសាធារណការ និងដឹកជញ្ជូន លោក គង់ វិមាន ប្រាប់ ភ្នំពេញ ប៉ុស្តិ៍ថា ស្លាកលេខដែលបុគ្គលនោះបានបំពាក់លើរថយន្ត គឺជាស្លាកលេខក្លែងក្លាយ។
លោកថា៖ «ទី១ ការបំពាក់ស្លាកលេខបែបនេះ គឺប៉ះពាល់ដល់ស្ថាប័នរដ្ឋ ក្រសួងមិនមានជាគោលការណ៍ អនុញ្ញាតឱ្យប្រើប្រាស់ជាផ្លូវការចំពោះស្លាកលេខបែបនេះ ហើយអ្នកប្រើប្រាស់គឺខុសច្បាប់»។
លោក វិមាន បន្តថា៖ «ទី២ ប៉ះពាល់រឿងគណបក្ស ជាគោលការណ៍គណបក្សប្រជាជន មិនមានការអនុញ្ញាតឱ្យបុគ្គលណាយក Logo ស្លាកសញ្ញារបស់គណបក្សទៅប្រើប្រាស់ជាលក្ខណៈឯកជន ដើម្បីបម្រើផលប្រយោជន៍ខ្លួនឯងនោះទេ ករណីនេះដូចស្លាកលេខអ៊ីចឹង»។
បើតាមលោក គង់ វិមាន សមត្ថកិច្ចធ្លាប់បានហៅបុគ្គលឈ្មោះ ប៉ែន លឹម មកធ្វើការអប់រំ និងណែនាំម្តងរួចមកហើយ កាលពីឆ្នាំ ២០២០ ប៉ុន្តែថ្មីៗនេះបុរសរូបនេះ បានយកស្លាកលេខដដែលមកប្រើប្រាស់ម្តងទៀត។
លោកថា៖ «នៅខែមីនា ឆ្នាំ ២០២០ មានករណីនេះម្តងរួចហើយ យើងបានរាយការណ៍ទៅស្នងការនគរបាលរាជធានីភ្នំពេញ ដើម្បីសហការ និងដោះស្រាយភ្លាមៗនាពេលនោះរួចម្តងមកហើយ។ ស្រាប់តែថ្មីៗនេះភ្លេចៗខ្លួនឃើញគាត់យកមកប្រើម្តងទៀត។ ដូច្នេះបងប្អូនប្រជាពលរដ្ឋប្រទះឃើញ និងសរសេរប្តឹងមកក្រសួង ហើយយើងចាត់ការបន្តដោយបញ្ជូនករណីនេះទៅឱ្យសមត្ថកិច្ចដែលមានការពាក់ព័ន្ធ និងបានដោះស្រាយភ្លាម»។
ទន្ទឹមនឹងនេះដែរ លោកអំពាវនាវដល់សប្បុរសជនដែលទិញរថយន្តជាអំណោយប្រគេនជូនចៅអធិការវត្តនានា ត្រូវទៅចុះបញ្ជីស្លាកលេខឱ្យបានត្រឹមត្រូវជាមុនសិន ចៀសវាងការប្រើប្រាស់រថយន្តដោយខុសច្បាប់។
លោកថា៖ «ជាពិសេសម្ចាស់សប្បុរសជនដែលទិញរថយន្តប្រគេនលោកសង្ឃ ត្រូវបំពេញកាតព្វកិច្ចចុះបញ្ជីឱ្យបានត្រឹមត្រូវ និងធ្វើស្លាកលេខឱ្យស្របច្បាប់សិន មុនប្រគេនជូនលោកចៅអធិការ បើយើងយកឡានមិនបានចុះបញ្ជីប្រគេនលោកសង្ឃ គឺព្រះសង្ឃមិនដឹងធ្វើយ៉ាងម៉េច មានតែដាក់ស្លាកលេខវត្តនេះ វត្តនោះ អ៊ីចឹងដាក់ស្លាកលេខបែបនេះ គឺខុសនឹងច្បាប់»។
លោក គង់ វិមាន ក៏បានគូសបញ្ជាក់ដែរថា៖ «ពាក់ព័ន្ធស្លាកលេខពិសេសផ្ទាល់ខ្លួននេះ គឺមានចែងក្នុងច្បាប់រួចហើយ យើងដាក់ពាក្យកម្ពុជានៅពីលើ ចំណែកលេខ និងឈ្មោះនៅខាងក្រោម»៕
.jpg)
