The Phnom Penh Post Search

Search form

Logo of Phnom Penh Post newspaper Phnom Penh Post - បុរស​ម្នាក់​ដែល​ចាប់​ខ្លួន​ក្នុង​រឿង​ជម្លោះ​ដីធ្លី​ត្រូវ​បាន​ដោះលែង​វិញ




បុរស​ម្នាក់​ដែល​ចាប់​ខ្លួន​ក្នុង​រឿង​ជម្លោះ​ដីធ្លី​ត្រូវ​បាន​ដោះលែង​វិញ

Content image - Phnom Penh Post
តំណាង​ពលរដ្ឋ​លោក សៀន វី នៅ​សាលា​ដំបូង​ខេត្ត​បន្ទាយមានជ័យ​កាលពី​ម្សិលមិញ​។ រូបថត អាដហុក

បុរស​ម្នាក់​ដែល​ចាប់​ខ្លួន​ក្នុង​រឿង​ជម្លោះ​ដីធ្លី​ត្រូវ​បាន​ដោះលែង​វិញ

បន្ទាយមានជ័យៈ តំណាង​ពលរដ្ឋ​មា្នក់​ត្រូវ​បាន​សាលា​ដំបូង​ខេត្ត​ដោះលែង​ឲ្យ​នៅ​ក្រៅ​ឃុំ​កាលពី​ល្ងាច​ថ្ងៃ​អង្គារ​បន្ទាប់ពី​ឃុំ​​ខ្លួន និង​ចោទប្រកាន់​ពី​បទ​ធ្វើឲ្យ​ប៉ះពាល់​កម្មសិទ្ធិ​ឯកជន និង​បំផ្លាញ​ទ្រព្យសម្បត្តិ​អ្នក​ដទៃ​ក្នុង​រឿង​ជម្លោះ​ដីធ្លី​ដ៏រ៉ាំរ៉ៃ​ជាមួយ​សែ​ស្រឡាយ​មន្ត្រី​ជាន់ខ្ពស់​គណបក្ស​ប្រជាជន​។

លោក ស៊ុំ ចន្ទគា អ្នក​សម្របសម្រួល​សមាគម​សិទ្ធិ​មនុស្ស​អាដហុក​ខេត្ត​បន្ទាយមានជ័យ​បាន​ឲ្យ​ដឹង​ថា លោក សៀន វី អាយុ ៥១ ឆ្នាំ ដែល​​នគរបាល​ចាប់​ឃាត់​ខ្លួន​ទាក់ទង​នឹង​រឿង​ដី​ទំនាស់​មួយ​កន្លែង​ស្ថិត​នៅ​សង្កាត់​និមិត្ត ក្រុង​ប៉ោយប៉ែត​កាលពី​ថ្ងៃ​ទី​ ៤ ខែ​កក្កដា​ខណៈ​ដែល​ប្រជាពលរដ្ឋ​ចូល​ទៅ​​សង់​ខ្ទម​លើ​ដី​ជម្លោះ​នោះ​ត្រូវ​បាន​ដោះលែង​វិញ​ហើយ ប៉ុន្តែ​បាន​ដាក់​​ «ឲ្យ​ស្ថិត​ក្រោម​ការ​ត្រួតពិនិត្យ​តាម​ផ្លូវ​​តុលាការ»។

ដីទំនាស់​ដែល​បាន​អូសបន្លាយ​ជាង ១០ ឆ្នាំ​មក​ហើយ​នេះ​ត្រូវ​បាន​ពលរដ្ឋ​អះអាង​ថា​ជា​របស់​ខ្លួន​ខណៈ​ដែល​ពលរដ្ឋ​ទាំងនេះ​ត្រូវ​បាន​គេ​​បណ្តេញ​ចេញ​តាំងពី​ឆ្នាំ ២០០០ ​​មក​ហើយ​ដី​នេះ​បាន​ក្លាយ​ជា​​កម្មសិទ្ធិ​​របស់​លោកស្រី ម៉ៅ ម៉ាឡៃ ភរិយា លោក កែ គឹមយ៉ាន តំណាងរាស្ត្រ​គណបក្ស​ប្រជាជន​។ បើ​តាម​អាដហុក​ដី​នេះ​ត្រូវ​បាន​លោកស្រី រិន ចាន់រ៉េត ជា​ប្អូនស្រី​បង្កើត​របស់​លោកស្រី ម៉ៅ ម៉ាឡៃ មើល​ការ​ខុស​ត្រូវ​នៅ​ទី​នោះ និង​ជា​ដើម​បណ្តឹង​ដែល​នាំឲ្យ​មាន​ការ​ចាប់​ខ្លួន​លោក សៀន វី។

លោក សៀន វី ថ្លែង​ថា​ការ​ឃាត់​ខ្លួន​លោក​ធ្វើ​ឡើង​ដោយ​​គ្មាន​ដីកា​តុលាការ​គឺជា​ការ​ឃាត់​ខ្លួន​ខុស​នីតិវិធី​។ «ពី​ដើម​ដី​នេះ​ជា​របស់​ពលរដ្ឋ​តែ​អ្នក​មាន​អំណាច​គេ​មក​រំលោភ​យក។ យើង​ជា​ពលរដ្ឋ​តូចតាច​យើង​ជា​អ្នក​ចាញ់​រហូត​»។

មិន​អាច​ទាក់ទង​លោក ផាន់ ភិរម្យ ព្រះរាជ​អាជ្ញារង​ខេត្ត​បន្ទាយមានជ័យ​ដែល​ជា​អ្នក​ចោទប្រកាន់​​តំណាង​ពលរដ្ឋ​រូប​នេះ​បាន​ទេ​កាលពី​ម្សិលមិញ។

បើ​តាម​មន្ត្រី​អាដហុក​ករណី​ទំនាស់​ដីធ្លី​នេះ​មិន​គួរ​មាន​ការ​ចាប់​ខ្លួន​ហើយ​​ចោទប្រកាន់​ពលរដ្ឋ​នោះ​ទេ ដោយសារ​ដី​នេះ​ភាគី​អ្នកស្រី​ រិន ចាន់រ៉េត ជា​ប្អូន​បង្កើត​លោកស្រី​ ម៉ៅ ម៉ាឡៃ ​មិន​ទាន់​មាន​ប្លង់​កម្មសិទ្ធិ​ទេ​ដោយ​គ្រាន់តែ​មាន​ប្លង់​ផែនទី​គោល​ចុះ​ហត្ថលេខា​ដោយ​ភូមិបាល​ក្រុង​ប៉ោយប៉ែត​ដែល​ដំណោះស្រាយ​ស្ថិត​នៅក្នុង​យន្តការ​គណៈកម្មការ​សុរិយោដី​។

បើ​តាម​អភិបាល​ខេត្ត​បន្ទាយមានជ័យ​លោក គោ ស៊ុំសារឿត ដី​នេះ​ជា​ការ​ទិញ​ចូល​គ្នា​រវាង​លោកស្រី ម៉ៅ ម៉ាឡៃ ​និង​ក្រុមហ៊ុន​ឆាយឆាយ អ៊ិនវេសមិន​ដែល​ដី​នេះ​ជា​ផ្នែក​មួយ​នៃ​ដី​តំបន់​សេដ្ឋកិច្ច​ពិសេស​ក្រុង​ប៉ោយប៉ែត៕

អត្ថបទគួរចាប់អារម្មណ៍