ព្រះសីហនុ៖ តុលាការខេត្តព្រះសីហនុនៅថ្ងៃទី ៤ ខែឧសភា បានសម្រេចផ្តន្ទាទោសបុរសម្នាក់ដាក់ពន្ធនាគារ ១ ឆ្នាំ ពាក់ព័ន្ធករណីជួបជុំផឹកគ្រឿងស្រវឹងក្នុងផ្ទះ ហើយបង្ហោះតាមហ្វេសប៊ុក ផ្គើននឹងវិធានការរបស់រដ្ឋាភិបាលក្នុងការទប់ស្កាត់ការរាលដាលជំងឺកូវីដ ១៩។
កាលពីថ្ងៃទី ២ ឧសភា សមត្ថកិច្ចអាវុធហត្ថខេត្តព្រះសីហនុ បានឃាត់ខ្លួនជនសង្ស័យ ១ នាក់ មានឈ្មោះ អ៊ូយ សម្បត្តិ ភេទប្រុស អាយុ ៣៣ ឆ្នាំ ជនជាតិខ្មែរ មុខរបរជាអាជីវករ ស្នាក់នៅក្រុមទី១៣ ភូមិ ៤ សង្កាត់ ១ ក្រុងព្រះសីហនុ ពាក់ព័ន្ធនឹងករណីមិនគោរពវិធានការរដ្ឋបាលរបស់សាលាខេត្តព្រះសីហនុ ដែលបានប្រព្រឹត្តឡើងកាលពីវេលាម៉ោង ១៩ និង ៣០ នាទីយប់ ថ្ងៃទី ១ ខែ ឧសភា ឆ្នាំ ២០២១។
បន្ទាប់ពីត្រូវបានឃាត់ខ្លួននៅថ្ងៃទី ៣ ឧសភា សមត្ថកិច្ចក៏បានបញ្ជូនបុគ្គលរូបនេះ ទៅកាន់អយ្យការអមសាលាដំបូងខេត្ត ពាក់ព័ន្ធនឹងករណីមិនគោរពវិធានការរដ្ឋបាល ផឹកស៊ីបង្ហោះវីដេអូតាមបណ្តាញសង្គមហ្វេសប៊ុក និងករណីប្រើប្រាស់ដោយខុសច្បាប់នូវសារធាតុញៀន។
លោក ហួត វិចិត្រ ព្រះរាជអាជ្ញារងនៃអយ្យការអមសាលាដំបូងខេត្តបានប្រាប់ ភ្នំពេញ ប៉ុស្តិ៍ នៅថ្ងៃនេះថា បុគ្គលរូបនេះ ត្រូវបានតុលាការបើកសវនាការជំនុំជម្រះកាលពីរសៀលថ្ងៃទី ៤ ឧសភា ដោយសម្រេចផ្តន្ទាទោសរយៈពេល ១ ឆ្នាំ។
លោកបញ្ជាក់ថា៖ «ការសម្រេចនេះ តាមរយៈសកម្មភាពល្មើសរបស់គាត់ ដែលគេហាមមិនឲ្យផឹកស៊ី ហើយគាត់នៅតែប្រព្រឹត្ត ហើយឡាយវីដេអូក្នុងបណ្តាញសង្គម ឌឺដងដាក់សមត្ថកិច្ចយើងទៀត។ យើងបានបញ្ចូនគាត់ទៅពន្ធនាគារហើយ ដោយសេចក្តីសម្រេចនេះ យើងទុកសិទ្ធិឲ្យគាត់ប្តឹងតវ៉ាក្នុងរយៈពេល ១ ខែ ទៅឧទ្ធរណ៍»។
បើតាមលោក ហួត វិចិត្រ ក្នុងការអនុវត្តវិធានការរដ្ឋបាលរបស់រដ្ឋាភិបាលក្នុងរយៈពេលនៃការផ្ទុះការឆ្លងកូវីដក្នុងសហគមន៍ ២០ កុម្ភៈនេះ លោកបានចាត់វិធានការទៅលើបុគ្គលដែលល្មើស នឹងបម្រាមនេះចំនួន ៧ ករណីហើយ។ បទល្មើសទាំងនេះ គឺមានច្រើនករណីទៀត ដែលមានព្រះរាជអាជ្ញាផ្សេងជាអ្នកទទួលបន្ទុក៕