ភ្នំពេញ៖ ព្រឹកនេះ នគរបាលរាជធានីភ្នំពេញបានបញ្ជូនជនសង្ស័យម្នាក់ដែលបង្ហោះវីដេអូតាមបណ្ដាញសង្គម TikTok ប្រឌិតរឿងចាក់វ៉ាក់សាំងប្រឆាំងកូវីដ ១៩ ថា បានស្លាប់ជាបន្ដបន្ទាប់ ទៅសាលាដំបូងរាជធានីភ្នំពេញ ក្រោយពីចាប់ឃាត់ខ្លួនបានកាលពីម្សិលមិញ។
លោក សាន សុខសីហា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ប្រាប់ ភ្នំពេញ ប៉ុស្តិ៍ នៅព្រឹកនេះថា សមត្ថកិច្ចជំនាញនៃស្នងការដ្ឋាននគរបាលរាជធានីភ្នំពេញ បានឃាត់ខ្លួនជនដែលបានបង្ហោះវីដេអូ TikTok បំពុលសង្គមនោះកាលពីរសៀលថ្ងៃទី ១២ ខែមេសា នៅក្នុងការដ្ឋានសំណង់មួយនៅផ្លូវ ៦០ ម៉ែត្រក្នុងខណ្ឌមានជ័យ។
លោកថ្លែងថា៖ «ព្រឹកហ្នឹងយើងនឹងបញ្ជូនទៅហើយ ព្រោះម្សិលមិញយើងចាប់យកមកដល់វាល្ងាចណាស់ទៅហើយ អ៊ីចឹងព្រឹកហ្នឹងយើងរៀបចំសំណុំឯកសារ បញ្ជូនទៅ (តុលាការ) តែម្តង»។
ទោះយ៉ាងណា លោក សុខសីហា មិនបានបញ្ជាក់ច្បាស់ទេថា តើជនរូបនេះ ត្រូវបញ្ជូន ទៅតុលាការ ក្រោមការចោទប្រកាន់ពីបទអ្វីឱ្យប្រាកដនោះទេ។ លោកបញ្ជាក់ថា៖ «បើតាមការសម្របសម្រួល និងបញ្ជាក់ពីព្រះរាជអាជ្ញា គាត់គ្រាន់តែបញ្ជាក់ថា យើងអាចផ្តោតលើចំណុចមាត្រា ១១ នៃបទរារាំងដល់ការអនុវត្តវិធានការ (ទប់ស្កាត់ការរីករាលដាលកូវីដ) អ៊ីចឹងពេលទៅដល់តុលាការ ការសិក្សាមើល ហើយការដាក់បន្ទុកយ៉ាងម៉េចអាហ្នឹង ជាឆន្ទានុសិទ្ធិរបស់តុលាការ»។
បើតាមលោក សុខសីហា ជនសង្ស័យរូបនេះ ត្រូវបានចាប់ខ្លួនដោយកម្លាំងសមត្ថកិច្ចផែនសន្តិសុខ សហការជាមួយកម្លាំងអធិការដ្ឋាននគរបាលខណ្ឌមានជ័យ តាមបញ្ជារបស់លោក ស ថេត អគ្គស្នងការរង និងជាស្នងការដ្ឋាននគរបាលរាជធានីភ្នំពេញ ដោយមានការសម្របសម្រួលពី លោក សេង ហៀង ព្រះរាជអាជ្ញារងអមសាលាដំបូងរាជធានីភ្នំពេញ។
ជនសង្ស័យមានឈ្មោះ គង់ សម្បតិ្ត ម្ចាស់គណនី TikTok ឈ្មោះ «ចង្ហាន់ហុយ» បានបង្ហោះសារដែលមានខ្លឹមសាររារាំងដល់ការអនុវត្តវិធានការ ចាក់វ៉ាងសាំងកូវីដ ១៩៕