.jpg)
ជនសង្ស័យដែលសម្លាប់មិត្តភក្ដិរបស់ខ្លួនដោយញញួរ ត្រូវបានសមត្ថកិច្ចឃាត់ខ្លួនកាលពីថ្ងៃទី ១០ តុលា។ រូបថត នគរបាល
ភ្នំពេញ៖ បុរសម្នាក់ដែលយកញញួរវាយសម្លាប់មិត្តភក្តិនៅសង្កាត់គីឡូម៉ែត្រលេខ ៦ ខណ្ឌឫស្សីកែវ កាលពីថ្ងៃទី ៧ តុលា ហើយត្រូវសមត្ថកិច្ចចាប់បាននៅខេត្តស្ទឹងត្រែង កាលពីថ្ងៃទី ១០ តុលា នឹងត្រូវនគរបាលខណ្ឌឫស្សីកែវ បញ្ជូនទៅសាលាដំបូងរាជធានី នៅថ្ងៃទី ១២ ខែតុលា នេះ។
លោក អ៊ីវ ឈុនផេង អធិការរងទទួលផែនការងារព្រហ្មទណ្ឌនៃអធិការដ្ឋាននគរបាលខណ្ឌឫស្សីកែវ ប្រាប់ពីម្សិលមិញថា ជនសង្ស័យឈ្មោះ ផល បញ្ញា អាយុ ៣១ ឆ្នាំ ដែលពាក់ព័ន្ធបទល្មើសឃាតកម្មនោះ សមត្ថកិច្ចទើបរៀបចំសំណុំរឿងរួចរាល់នៅថ្ងៃម្សិលមិញ ហើយនឹងបញ្ជូនជនសង្ស័យទៅសាលាដំបូងរាជធានីភ្នំពេញនៅថ្ងៃទី ១២ ខែតុលា។
លោកថ្លែងថា៖ «ហើយខ្ញុំបញ្ជូនជនម្នាក់នោះទៅតុលាការនៅថ្ងៃស្អែកនេះ (ថ្ងៃទី ១២ តុលា) ដើម្បីឱ្យតុលាការចាត់ការទៅតាមនីតិវិធីច្បាប់»។
ជុំវិញរឿងរ៉ាវនៃអំពើឃាតកម្មនេះ លោក ញាណ ពុទ្ធា នាយប៉ុស្តិ៍រដ្ឋបាលគីឡូម៉ែត្រលេខ ៦ ហើយដែលលោកទទួលព័ត៌មានបានពីសាក្សីនៅកន្លែងកើតហេតុបានប្រាប់លោកថា ជនរងគ្រោះឈ្មោះ ហន ចាន់រស្មី និងជនល្មើសឈ្មោះ ផល បញ្ញា ជាកម្មករធ្វើនំដូចគ្នា ហើយពួកគេស្នាក់នៅក្នុងហាងធ្វើនំនៅចំណុចហាងដែលមានយីហោ «ផ្ទះនំខេក» ស្ថិតនៅតាមបណ្តោយផ្លូវជាតិលេខ ៥ ក្នុងភូមិក្រោលគោ សង្កាត់គីឡូម៉ែត្រលេខ ៦ ខណ្ឌឫស្សីកែវ។
លោករំឭកប្រាប់ថា ជនរងគ្រោះមានស្រុកកំណើតនៅភូមិ-ឃុំអណ្តូងទឹក ស្រុកបទុមសាគរ ខេត្តកោះកុង ដែលប្រពន្ធរបស់គាត់បានយកកូនប្រុសតូចម្នាក់អាយុប្រហែល ៣ ឆ្នាំ មកលេងប្តី (ជនរងគ្រោះ) ដែលស្នាក់នៅក្នុងហាងនំនោះដែរ។ ចំពោះជនសង្ស័យ និងជនរងគ្រោះ គឺមានទំនាស់គ្នាយូរខែកន្លងមកម្តងហើយ ប៉ុន្តែពួកគេទាំង ២ នាក់ មិនបានបង្កជាសកម្មភាពឈ្លោះទាស់ទែងគ្នាអីទេ។ លុះដល់ថ្ងៃទី ៧ ខែ តុលា ឆ្នាំ ២០២០ មុនកើតហេតុពេលព្រលប់ គេឃើញជនរងគ្រោះចេញទៅក្រៅផឹកស៊ី ហើយក៏ត្រឡប់ចូលមកក្នុងហាងវិញប្រហែលជាម៉ោង ៨ យប់។ ពេលនោះគេបានឮជនរងគ្រោះនិយាយសំឡេងខ្លាំងៗ ធ្វើឱ្យជនសង្ស័យខឹងព្រោះរំខានដល់ការដេកពួនរបស់គេ ហើយជនសង្ស័យបានស្តីបន្ទោសបង្កឱ្យមានជម្លោះទាស់ទែងគ្នា។
នៅពេលនោះ ជនសង្ស័យបានយកញញួរវាយក្បាលជនរងគ្រោះត្រូវចំសៀតផ្កា ១ ញញួរ និងចំក្បាលផ្នែកខាងក្រោយ ១ ញញួរទៀត បណ្តលឱ្យស្លាប់នៅកន្លែងកើតហេតុ។ បន្ទាប់មកជនសង្ស័យបានរត់គេចខ្លួនពីកន្លែងកើតហេតុ នៅយប់នោះដែរ។ ដូច្នេះមូលហេតុនៃករណីឃាតកម្មសម្លាប់មនុស្សនេះ គឺសមត្ថកិច្ចសន្និដ្ឋានថា អាចបណ្តាលមកពីគំនុំចាស់ និងជម្លោះពាក្យសម្តីគ្នាក្នុងយប់កើតហេតុ។
លោកថ្លែងថា៖ «អំពើហិង្សាសម្លាប់មនុស្សនេះ អាចមកពីគំនុំចាស់ផង និងថ្មីផង»។
ចំពោះការតាមចាប់ខ្លួនជនសង្ស័យវិញ ត្រូវបានលោក ជាវ វិបុល អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃឱ្យដឹងពីម្សិលមិញថា ជនសង្ស័យឈ្មោះ ផល បញ្ញា ត្រូវសមត្ថកិច្ចរបស់លោក និងនគរបាលខេត្តស្ទឹងត្រែង និងមានការសម្របសម្រួលផ្នែកផ្លូវច្បាប់ ពីខាងអយ្យការអមសាលាដំបូងខេត្តស្ទឹងត្រែង ស្រាវជ្រាវចាប់ខ្លួនជនសង្ស័យបាននៅរំលងអធ្រាត្រឈានចូលថ្ងៃទី ១០ ខែតុលា ខណៈដែលជននេះ បានលាក់ខ្លួននៅផ្ទះបងស្រីរបស់គេ ក្នុងភូមិរាជានុកូល សង្កាត់-ក្រុងស្ទឹងត្រែង៕
