ព្រៃវែងៈ បុរសសង្ស័យញៀនថ្នាំញៀនម្នាក់ត្រូវបានសមត្ថកិច្ចតាមចាប់ខ្លួនកាលពីរំលងអធ្រាត្រចូលថ្ងៃទី ១១ មីនា ពាក់ព័ន្ធវាយសម្លាប់លោកគ្រូបង្រៀនម្នាក់ប្រព្រឹត្តនៅភូមិឆ្វាង ឃុំប្រធាតុ ស្រុកកំពង់ត្របែក ខេត្តព្រៃវែងកាលពីថ្ងៃទី ១០ មីនា។
លោក សួន សំអឿន អធិការនគរបាលស្រុកកំពង់ត្របែកបានឱ្យដឹងពីម្សិលមិញថា ជនសង្ស័យឈ្មោះ ឃឹម ខឿន ហៅ ក្រឡិច ភេទប្រុស អាយុ ២២ ឆ្នាំ ជាអ្នកលាងម៉ូតូមានលំនៅ ភូមិត្រម៉ុត ឃុំប្រធាតុ ស្រុកកំពង់ត្របែក ខេត្តព្រៃវែង។
ចំណែកជនរងគ្រោះឈ្មោះ សេក មុន្នី ភេទ ប្រុស អាយុ ៣០ ឆ្នាំ ជាគ្រូបង្រៀននៅសាលាបឋមសិក្សាពោធិក្នុងភូមិឆ្វាង ឃុំប្រធាតុ ស្រុកកំពង់ត្របែកខេត្តព្រៃវែង។
លោកប្រាប់ថា ជនសង្ស័យ និងជនរងគ្រោះជាមនុស្សរាប់អានគ្នា ហើយរឿងនេះបើតាមស្តាប់ទៅដូចជាមិនធ្ងន់ធ្ងរអីទេ ព្រោះជនល្មើសថា ជនរងគ្រោះនិយាយដើមគេរឿងនេះគ្រាន់តែប៉ុណ្នឹង។ ជនសង្ស័យ និងជនរងគ្រោះជាអ្នករស់នៅក្នុងភូមិជាមួយគ្នា។
លោក សំអឿន ថ្លែងថា៖ «ជនសង្ស័យទាស់សម្តីជាមួយជនរងគ្រោះហើយបានយកឈើជ្រុងវាយក្បាលពីក្រោយរបស់ជនរងគ្រោះបណ្តាលឱ្យដួលសន្លប់។ ពេលនោះក្រុមគ្រួសារបានដឹកជនរងគ្រោះទៅមន្ទីរពេទ្យបង្អែកស្រុកកំពង់ត្របែក តែត្រូវគ្រូពេទ្យប្រាប់ថាជនរងគ្រោះបានដាច់ខ្យល់ស្លាប់បាត់ទៅហើយ»។
លោក សំអឿន ថ្លែងដោយយោងតាមកោសល្យវិច័យពិនិត្យឃើញថា នៅផ្នែកក្បាល ខាងក្រោយរបស់ជនរងគ្រោះបានប៉ះទង្គិចធ្ងន់ធ្ងរនឹងវត្ថុរឹង។ ចំណែកជនសង្ស័យនឹងត្រូវបញ្ជូនទៅសួរចម្លើយនៅស្នងការដ្ឋាននគរបាលខេត្តព្រៃវែង នៅព្រឹកថ្ងៃទី ១២ មីនា៕