.jpg)
ជនសង្ស័យប្រមាថថ្នាក់ដឹកនាំបង្ហាញខ្លួនក្នុងការិយាល័យនគរបាល។ រូបថត នគរបាល
បាត់ដំបងៈ នគរបាលព្រហ្មទណ្ឌខេត្តបាត់ដំបងពីម្សិលមិញបានកសាងសំណុំរឿងបញ្ជូនបុរសម្នាក់ទៅសាលាដំបូងខេត្តបាត់ដំបងបន្ទាប់ពីឃាត់ខ្លួនកាលពីថ្ងៃទី ២៩ មីនា ដែលជនសង្ស័យរស់នៅភូមិគគីរ ឃុំភ្នំព្រឹក ស្រុកភ្នំព្រឹក ខេត្តបាត់ដំបង។
លោក លឹម ពុទ្ធីឡា ស្នងការរងទទួលផែនការងារនគរបាលព្រហ្មទណ្ឌខេត្តបានឱ្យ ភ្នំពេញ ប៉ុស្តិ៍ ដឹងកាលពីថ្ងៃម្សិលមិញថា ជនសង្ស័យឈ្មោះ ហួន បូរី ភេទប្រុស អាយុ ៣២ ឆ្នាំ រស់នៅ ភូមិគគីរ ឃុំភ្នំព្រឹក ស្រុកភ្នំព្រឹក ខេត្តបាត់ដំបង។ ជនម្នាក់នេះត្រូវសមត្ថកិច្ចរបស់លោកចាប់បញ្ជូនបន្តទៅសាលាដំបូងខេត្តបាត់ដំបងនៅរសៀលថ្ងៃទី ៣០ មីនា។
លោកស្នងការថ្លែងបន្តថា ជនសង្ស័យម្នាក់នេះកាលពីថ្ងៃទី ២៩ មីនា បានប្រើប្រាស់គណនីហ្វេសប៊ុកដោយប្រើឈ្មោះ បូរី ហើយជនសង្ស័យមិនត្រឹមតែដាក់រូបរបស់សម្តេចនាយករដ្ឋមន្ត្រី ហ៊ុន សែន ទេ តែរូបគេថែមទាំងបានសរសេរសារអមដោយខ្លឹមសារជេរប្រមាថធ្ងន់ធ្ងរដល់អាជ្ញាធរស្រុកភ្នំព្រឹក ពិសេសសម្តេចនាយករដ្ឋមន្ត្រី ហ៊ុន សែន តែម្តង។
បន្ទាប់ពីបានឃើញ និងត្រួតពិនិត្យតាមគណនីហ្វេសប៊ុកឈ្មោះ បូរី នោះមកលោកស្នងការរងសុំយោបល់ពីលោក សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង និងសុំគោលការណ៍ពីលោក ប៊ុណ្ណារ៉ា ព្រះរាជអាជ្ញាអមសាលាដំបូងខេត្តបាត់ដំបងចុះចាប់ខ្លួនជនសង្ស័យដល់មូលដ្ឋានរបស់គេដែលកំពុងរស់នៅតែម្តង។
លោកថ្លែងថា៖ «តាមពិតទៅជនសង្ស័យម្នាក់នេះត្រូវសមត្ថកិច្ចយើងហៅមកធ្វើការអប់រំម្តងមកហើយ ដោយសារកាលពីលើកទី១ គាត់បានសរសេរសាររិះគន់ថ្នាក់ដឹកនាំប្រទេស និងអាជ្ញាធរស្រុកតែគាត់ប្រើពាក្យស្រាលៗទេ។ តែលើកនេះគាត់ជេរតែម្តងអីចឹងយើងត្រូវតែចាប់គាត់»។
លោកបញ្ជាក់ប្រាប់ថាក្រោយចាប់ខ្លួនជនសង្ស័យបានសារភាពប្រាប់សមត្ថកិច្ចថា រូបគេពិតជាបានសរសេរសាររិះគន់ និងជេរប្រមាថថ្នាក់ដឹកនាំប្រទេសពិតប្រាកដមែន។ ដោយយោងទៅលើការសារភាពរបស់ជនសង្ស័យហើយម្យ៉ាងទៀតដោយសារតែជនសង្ស័យមានកំហុសម្តងហើយតែមិនព្រមកែខ្លួនទើបសមត្ថកិច្ចលោកសម្រេចអនុវត្តតាមច្បាប់តែម្តង។
ពាក់ព័ន្ធបញ្ហានេះត្រូវបានលោក សឹង សែនករុណ អ្នកនាំពាក្យសមាគមការពារសិទ្ធិមនុស្ស អាដហុក ប្រាប់ពីម្សិលមិញថា តាមពិតការបញ្ចេញមតិអ្វីមួយនៅក្នុងបណ្តាញសង្គមហ្វេសប៊ុកដែលជាការរិះគន់ត្រូវតែមានមូលដ្ឋានហើយបើការបញ្ចេញមតិនោះប្រកបដោយរឿងមិនពិតគឺលោកមិនគាំទ្រទេ។ ប៉ុន្តែបើការបញ្ចេញមតិរបស់បុគ្គលនោះបែរជាមិនមានអ្វីកើតឡើងគឺជាបញ្ហារបស់បុគ្គលនោះព្រោះគាត់មិនគួរណាសរសេរសារបែបហ្នឹងទេ។
លោកថា៖ «តាមពិតការបញ្ចេញមតិវាចេះតែមានហើយក៏ប៉ុន្តែជាការបញ្ចេញមតិមួយដែលធ្វើឡើងក្នុងការរិះគន់ដើម្បីស្ថាបនាតែយើងមិនគួរបង្កើតរឿងមិនពិតហើយធ្វើឱ្យមានបញ្ហាទេ។ យើងក៏មិនចង់ឱ្យមានវិធានការផ្លូវច្បាប់ទេអាចគ្រាន់តែជាការអប់រំគាត់អំពីបញ្ហាទាំងអស់នោះទៅគួរកុំប្រើវិធានការផ្លូវច្បាប់»៕
