.jpg)
បុរសម្នាក់ត្រូវបានកម្លាំងការិយាល័យព្រហ្មទណ្ឌនៃកងរាជអាវុធហត្ថរាជធានីភ្នំពេញចាប់ឃាត់ខ្លួនភ្លាមៗ បន្ទាប់ពីប្រើហិង្សាវាយទាត់ធាក់ស្ត្រីជាប្រពន្ធរហូតដល់ដួលសន្លប់ និងស្លាប់ពេលបញ្ជូនទៅកាន់មន្ទីរពេទ្យ។ រូបថត នគរបាល
ភ្នំពេញៈ បុរសម្នាក់ត្រូវបានកម្លាំងការិយាល័យព្រហ្មទណ្ឌនៃកងរាជអាវុធហត្ថរាជធានីភ្នំពេញចាប់ឃាត់ខ្លួនភ្លាមៗ បន្ទាប់ពីប្រើហិង្សាវាយទាត់ធាក់ស្ត្រីជាប្រពន្ធរហូតដល់ដួលសន្លប់ និងស្លាប់ពេលបញ្ជូនទៅកាន់មន្ទីរពេទ្យ។ ហេតុការណ៍នេះបានកើតឡើងកាលពីរសៀលថ្ងៃទី ២៦ ខែ កក្កដា ឆ្នាំ ២០២០ នៅចំណុចភូមិក្រាំងដូនទៃ សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ។
លោក ម៉ាំង សុខលុច្យ នាយការិយាល័យព្រហ្មទណ្ឌនៃកងរាជអាវុធហត្ថ រាជធានីភ្នំពេញបានប្រាប់ភ្នំពេញប៉ុស្តិ៍នៅថ្ងៃចន្ទថា ជនសង្ស័យឈ្មោះ ឆែម ងិហ៍ អាយុ ៣០ ឆ្នាំ មានលំនៅក្នុងភូមិកណ្ដាល ឃុំផ្ទះរូង ស្រុកភ្នំក្រវាញ ខេត្តពោធិ៍សាត់ត្រូវបានចាប់ខ្លួនពីបទបង្កហិង្សាលើស្ត្រីជាប្រពន្ធ ឈ្មោះ សុខ ឃុន អាយុ ៣៩ ឆ្នាំ បណ្ដាលឲ្យស្លាប់ ដែលករណីនេះបានប្រព្រឹត្តក្នុងរាជធានីភ្នំពេញកាលពីរសៀលថ្ងៃអាទិត្យនៅចំណុចរោងតង់កម្មករនៃការដ្ឋានសំណង់មួយស្ថិតក្នុងសង្កាត់ចោមចៅ ២ ខណ្ឌពោធិ៍សែនជ័យ។
លោកបានថ្លែងថា៖ «ករណីហិង្សានេះផ្ដើមចេញពីបុរសជាប្ដីស្រវឹងស្រា ខឹងប្រពន្ធមិនព្រមទៅចាក់ទឹកយកមកឲ្យផឹក ក៏ស្ទុះទៅទាត់ស្ត្រីជាប្រពន្ធ ១ ជើងចំកណ្ដាលខ្នង បណ្ដាលឲ្យដួលប្រកាច់សន្លប់ស្តូកស្ដឹងនៅនឹងកន្លែង ហើយស្លាប់នៅពេលកំពុងបញ្ជូនទៅកាន់មន្ទីរពេទ្យ»។
លោក សុខលុច្យ បានបន្តថា នៅពេលនេះជនសង្ស័យកំពុងត្រូវបានមន្ត្រីជំនាញការិយាល័យព្រហ្មទណ្ឌ កងរាជអាវុធហត្ថរាជធានីភ្នំពេញធ្វើការសាកសួរ ដើម្បីកសាងសំណុំរឿងបញ្ជូនទៅសាលាដំបូងរាជធានី-ភ្នំពេញ ចាត់វិធានការបន្តតាមនីតិវិធីច្បាប់។
លោក ជា សុវណ្ណ អធិការរងនគរបាលខណ្ឌពោធិ៍សែនជ័យឲ្យដឹងថា ក្រោយពីមានករណីហិង្សាកើតឡើង លោកបានដឹកនាំកម្លាំងនគរបាលជំនាញផ្នែកកោសល្យវិច័យចុះទៅដល់ទីតាំងកើតហេតុ ដើម្បីប្រមូលព័ត៌មានជុំវិញករណីនេះពីប្រជាពលរដ្ឋ និងកម្មករដែលរស់នៅក្បែរកន្លែងកើតហេតុ និងបន្តចុះទៅកាន់មន្ទីរពេទ្យបង្អែកខណ្ឌពោធិ៍សែនជ័យ ដើម្បីធ្វើកោសល្យវិច័យសាកសពស្ត្រីរងគ្រោះផងដែរ។
លោកថ្លែងថា៖ «យោងតាមលទ្ធផលនៃការធ្វើកោសល្យវិច័យសពស្ត្រីរងគ្រោះមានស្នាមជាំផ្នែកខ្នង និងគ្រាំក្នុងដែលទំនងជាធ្លាប់រងការវាយដំដោយហិង្សាជាច្រើនលើកពីបុរសជាប្ដីនាពេលកន្លងមក។ លទ្ធផលនេះគឺស្របគ្នាទៅនឹងការឆ្លើយបំភ្លឺរបស់សាច់ញាតិស្ត្រីរងគ្រោះ និងកម្មករនៅទីនោះ ដែលអះអាងថាជារឿយៗនៅពេលស្រវឹងស្រា ជនសង្ស័យតែងប្រើហិង្សាវាយទៅលើស្ត្រីរងគ្រោះជាប្រពន្ធរហូតធ្លាក់ខ្លួនមានជំងឺរ៉ាំរ៉ៃប្រចាំកាយគឺជំងឺខ្សោយបេះដូង និងលើសឈាម»។
លោក សុវណ្ណ បានថ្លែងឲ្យដឹងទៀតថា តាមចម្លើយរបស់សាក្សីនៅថ្ងៃកើតហេតុស្ត្រីរងគ្រោះមានអាការគ្រុនក្ដៅខ្លួន ប៉ុន្តែបុរសជាប្ដីមិនបានយកចិត្តទុកដាក់មើលថែនាងឡើយ បែរជាទៅផឹកស្រាជាមួយមិត្តភក្ដិ លុះដល់ពេលស្រវឹងត្រឡប់មកផ្ទះ ក៏រករឿងបង្កជម្លោះ និងប្រើហិង្សាវាយទាត់ធាក់ទៅលើនាងរហូតស្លាប់។
សពជនរងគ្រោះត្រូវបានប្រគល់ឲ្យសាច់ញាតិនាំយកទៅធ្វើបុណ្យតាមប្រពៃណី៕
