បាត់ដំបងៈ ប្រធានអង្គការការពារបរិស្ថាន និង អភិវឌ្ឍន៍ លោក ទេព ពេជ្រ ហៅ ទេព វិសាល ត្រូវបានកម្លាំងសមត្ថកិច្ចនៃមន្ទីរយុត្តិធម៌កងរាជអាវុធហត្ថខេត្តបាត់ដំបង ចាប់ខ្លួនពាក់ព័ន្ធករណីឆបោកលុយជាង ១ ម៉ឺនដុល្លារពីប្រជាពលរដ្ឋចំនួន ៤ នាក់ ដោយសន្យាថា ជួយរត់ការឲ្យពួកគេបានចូលបម្រើការងារកងទ័ព។
លោក តូ ឌី ប្រធានមន្ទីរយុត្តិធម៌នៃបញ្ជាការដ្ឋានកងរាជអាវុធហត្ថខេត្តបាត់ដំបង បានប្រាប់ភ្នំពេញប៉ុស្តិ៍ថា ជនសង្ស័យត្រូវបានចាប់ខ្លួនកាលពីរសៀលថ្ងៃទី ២៥ ខែមករា ឆ្នាំ ២០១៩ តាមបណ្ដឹងរបស់ប្រជាពលរដ្ឋរងគ្រោះចំនួន ៤ នាក់ដែលបានប្ដឹងចូលមកមន្ទីរយុត្តិធម៌កងរាជអាវុធហត្ថខេត្ត ឲ្យជួយអន្តរាគមន៍ទាមទារយុត្តិធម៌សម្រាប់ពួកគេ កាលពីចុងខែធ្នូ ឆ្នាំ ២០១៨ ដោយចោទប្រកាន់ថា ជនសង្ស័យឈ្មោះ ទេព ពេជ្រ ហៅ ទេព វិសាល បានបោកប្រាស់យកលុយរបស់ពួកគេសរុប ១០ ៦០០ ដុល្លារ ដោយសន្យាថា ជួយរត់ការឲ្យពួកគេបានចូលបម្រើកងទ័ព។
លោកបានបញ្ជាក់ថា៖ «នៅពេលសាកសួរ ជនសង្ស័យបានឆ្លើយបដិសេធថា គាត់មិនបានឆបោកពួកគេនោះទេ គឺ គាត់ពិតជាបានជួយរត់ការឲ្យពួកគេមែន ប៉ុន្តែមន្ត្រីយោធាជាន់ខ្ពស់ម្នាក់ដែលគាត់ស្គាល់ និងសុំឲ្យជួយលើកិច្ចការនេះបានទទួលលុយពីគាត់ហើយមិនព្រមជួយឲ្យកិច្ចការនេះបានសម្រេច»។
លោក ឌី បានបន្ថែមថា ទោះយ៉ាងណា ជនសង្ស័យមិនបានប្រាប់អំពីអត្តសញ្ញាណមន្ត្រីយោធាជាន់ខ្ពស់ ដែលបានបោកប្រាស់យកលុយពីគាត់បន្តនោះទេ។ ជាមួយគ្នានេះ ជនសង្ស័យក៏បានបដិសេធផងដែរថា គាត់មិនដែលប្រាប់គេថា គាត់ជានាយទាហានពាក់ផ្កាយ ១ នោះទេ តែបានប្រាប់ជនរងគ្រោះថា គាត់ស្គាល់នាយទាហានជាន់ខ្ពស់ជាច្រើននាក់ ដែលគាត់អាចពឹងពាក់ឲ្យជួយរត់ការដាក់បញ្ចូលឈ្មោះពួកគេនៅក្នុងក្របខ័ណ្ឌជាមន្ត្រីយោធាបាន។
លោក ឌី បានថ្លែងថា ៖ «ក្រោយការស៊ើបសួរអស់រយៈពេល ២ ថ្ងៃ ជនសង្ស័យឈ្មោះ ទេព ពេជ្រ ហៅ ទេព វិសាល មានតួនាទី ជាប្រធានអង្គការការពារបរិស្ថាន និងអភិវឌ្ឍន៍ ត្រូវបានមន្ត្រីជំនាញយើងកសាងសំណុំរឿងចោទប្រកាន់ពីបទឆបោក និងបានបញ្ជូនខ្លួនទៅតុលាការខេត្តបាត់ដំបង នៅរសៀលថ្ងៃចន្ទ ដើម្បីចាត់ការបន្តតាមនីតិវិធីច្បាប់»។
លោកបានបន្តថា ប៉ុន្តែកាលពីថ្ងៃចន្ទតំណាងអយ្យការមិនមានពេលគ្រប់គ្រាន់ក្នុងការសាកសួរចម្លើយជនសង្ស័យនោះទេ និងបានបង្គាប់ឲ្យមន្ត្រីកងរាជអាវុធហត្ថនាំខ្លួនជនសង្ស័យត្រឡប់មកវិញ។ ទោះបីជាបែបណា នៅព្រឹកថ្ងៃអង្គារ[ម្សិលមិញ] ជនសង្ស័យត្រូវបានបញ្ជូនទៅតុលាការជាថ្មីម្ដងទៀត ដើម្បីសាកសួរចម្លើយ។
យោងតាមរបាយការណ៍របស់មន្ទីរយុត្តិធម៌កងរាជអាវុធហត្ថខេត្តបាត់ដំបង ដែលភ្នំពេញប៉ុស្តិ៍ទទួលបានកាលពីថ្ងៃម្សិលមិញ សមត្ថកិច្ចបានចំណាយពេលជិត ១ ខែ ក្នុងការស្វែងរកចាប់ខ្លួនជនសង្ស័យ ក្រោយពីទទួលបានបណ្ដឹងពីប្រជាពលរដ្ឋរងគ្រោះ កាលពីចុងខែធ្នូ ឆ្នាំ ២០១៨។
ជនរងគ្រោះដែលបានប្ដឹងប្រឆាំងនឹងជនសង្ស័យខាងលើនេះ រួមមានឈ្មោះ គឹម ហឿង ភេទប្រុស អាយុ ៣០ ឆ្នាំ មុខរបរលក់ដូរ រស់នៅស្រុកថ្មគោល ខេត្តបាត់ដំបង, ឈ្មោះ ឈីវ ប៊ុនឆៃ ភេទប្រុស អាយុ ៥៦ ឆ្នាំ មុខរបរសំណង់ រស់នៅស្រុកស្វាយចេក ខេត្តបន្ទាយមានជ័យ, ឈ្មោះ ប្រាក់ សំអេន ភេទប្រុស អាយុ ៥៥ ឆ្នាំ ប្រកបមុខរបរ ធ្វើស្រែ រស់នៅក្រុងពោធិ៍សាត់ ខេត្តពោធិ៍សាត់ និង ឈ្មោះ ប៉ាសូវៀត ភេទប្រុស អាយុ ៣០ ឆ្នាំ មុខរបរ លក់ដូរ រស់នៅក្រុងសិរីសោភ័ណ ខេត្តបន្ទាយមានជ័យ។
របាយការណ៍បានបន្តថា តាមបណ្ដឹងរបស់ជនរងគ្រោះ ជនសង្ស័យបានប្រាប់ពួកគាត់ថា ដោយក្រសួងត្រូវការជ្រើសកងទ័ព ជាច្រើនរយនាក់បន្ថែមទៀត ដូច្នេះគាត់អាចជួយរត់ការឲ្យចូលក្នុងក្របខ័ណ្ឌកងទ័ពជាតិបាន តែត្រូវបង់លុយឲ្យមន្ត្រីយោធាជាន់ខ្ពស់មួយចំនួន។ ក្រុមជនរងគ្រោះ ដែលមានបំណងចង់បានក្របខ័ណ្ឌក្នុងជួរកងទ័ពបានសម្រេចបង់លុយឲ្យជនសង្ស័យជួយរត់ការឲ្យដោយក្នុងម្នាក់ៗអស់ជាង ២ ៥០០ ដុល្លារ។ ប៉ុន្តែក្រោយពីទទួលបានលុយពីក្រុមជនរងគ្រោះគ្រប់ចំនួនហើយនោះ ជនសង្ស័យក៏បានធ្វើការគេចខ្លួន ហើយទូរស័ព្ទមិនលើក។
ទាក់ទងករណីចាប់ខ្លួន លោក ទេព ពេជ្រ ប្រធានអង្គការការពារបរិស្ថាន និងអភិវឌ្ឍន៍នេះដែរ លោក យស សាម៉ន អគ្គលេខាធិការរងនៃអង្គការនេះ បានប្រាប់ភ្នំពេញប៉ុស្តិ៍នៅថ្ងៃម្សិលមិញថា មិនជាប់ពាក់ព័ន្ធនឹងសកម្មភាពការងាររបស់អង្គការនោះទេ ដោយលោកបានចាត់ទុកករណីនេះថាជាករណីបុគ្គល។
លោកសាម៉ន បានថ្លែងថា៖ «យើងខ្ញុំជាបុគ្គលិក ក្រោមឱវាទរបស់គាត់ [លោក ទេព ពេជ្រ] មានការភ្ញាក់ផ្អើល និង ហួសចិត្តខ្លះដែរ ក្រោយពីទទួលបានដំណឹងថា ថ្នាក់ដឹកនាំរបស់ខ្លួនត្រូវបានសមត្ថកិច្ចចាប់ខ្លួនពីបទឆបោកលុយពីប្រជាពលរដ្ឋ ប៉ុន្តែករណីវាមិនប៉ះពាល់ដល់សកម្មភាពការងាររបស់អង្គការយើងនោះទេ ព្រោះវាជាករណីបុគ្គល»។
ទោះជាបែបណាក្ដី នៅល្ងាចថ្ងៃម្សិលមិញនេះ តុលាការនៅមិនទាន់បញ្ចប់ការស៊ើបសួរ ទៅលើជនសង្ស័យនៅឡើយទេ និងត្រូវបានបញ្ជូនត្រឡប់មកឃុំខ្លួននៅបញ្ជាការដ្ឋានកងរាជអាវុធហត្ថវិញ ដើម្បីរង់ចាំការសួរចម្លើយបន្តទៀតនៅព្រឹកថ្ងៃពុធនេះ។ យោងតាមអ្នកស្រី ទៀង សំបូរ ប្រធានលេខារដ្ឋានរដ្ឋបាលសាលាដំបូងខេត្តបាត់ដំបង៕