.jpg)
បុរសជាជនសង្ស័យត្រូវបានសមត្ថកិច្ចឃាត់ខ្លួន ក្នុងករណីសម្លាប់ប្រពន្ធខ្លួនឯង។ រូបថត នគរបាល
បាត់ដំបងៈ បុរសជាជនសង្ស័យក្នុងអំពើឃាតកម្មសម្លាប់ប្រពន្ធរបស់ខ្លួនត្រូវបានបញ្ជូនទៅសាលាដំបូងខេត្តបាត់ដំបងកាលពីថ្ងៃទី ១២ ខែមេសា ក្រោយពីនគរបាលចាប់ខ្លួនបាន។
លោក ជេត វណ្ណនី ស្នងការរងនគរបាលខេត្តបាត់ដំបងទទួលផែនព្រហ្មទណ្ឌ បានឲ្យដឹងកាលពីម្សិលមិញថា ជនសង្ស័យមានឈ្មោះ សោម គង់ អាយុ ៤១ ឆ្នាំ ប្រព្រឹត្តបទល្មើសសម្លាប់ប្រពន្ធខ្លួនហើយបានគេចចេញពីស្រុក ប៉ុន្តែត្រូវបានចាប់ខ្លួននៅស្រុកសំឡូត ក្រោយពីការស្រាវជ្រាវរបស់កម្លាំងនគរបាលជំនាញ។
លោក វណ្ណនី ថ្លែងថា៖ «ជនសង្ស័យបានបង្កបទល្មើសជាក់ស្តែង និងសារភាពពីកំហុសផងហើយក្នុងរបាយការណ៍សំយោគដែលដាក់ជូនទៅព្រះរាជអាជ្ញាគឺពាក់ព័ន្ធឃាតកម្ម»។
លោក សន និល អធិការនគរបាលស្រុករតនមណ្ឌលរំឭកឲ្យដឹងពីម្សិលមិញដែរថា ស្ត្រីរងគ្រោះជាប្រពន្ធឈ្មោះ វី ឆក អាយុ ២៨ ឆ្នាំ មានកូនប្រុសម្នាក់អាយុ ១០ ឆ្នាំ ពួកគេរស់នៅភូមិអូរល្មូន ឃុំផ្លូវមាស ស្រុករតនមណ្ឌល។
លោកបន្តសម្តីសាក្សីថា នៅថ្ងៃកើតហេតុមុនជនសង្ស័យបង្កបទល្មើសសម្លាប់ប្រពន្ធនោះគឺជនសង្ស័យបានចេញពីផ្ទះទៅផឹកស្រាជាមួយអ្នកភូមិហើយពេលត្រឡប់មកផ្ទះវិញជនសង្ស័យមានសភាពស្រវឹងខ្លាំង និងបានជេរស្ត្រីរងគ្រោះដែលជាប្រពន្ធផង។
ចំណែកឯស្ត្រីរងគ្រោះក៏បានឈ្លោះជជែកតបទៅវិញបង្កជាទំនាស់ពាក្យសម្តីកាន់តែខ្លាំង។ គ្រានោះប្រហែលជាជាតិស្រាចូលក្នុងខ្លួនបាត់បង់ស្មារតីផងទើបជនសង្ស័យស្ទុះទៅទាញយកកាំបិត កកុក ដែលនៅក្បែរខ្លួនកាប់ទៅលើស្ត្រីរងគ្រោះមួយទំហឹងមិនដកដៃបណ្តាលឲ្យស្ត្រីរងគ្រោះដួលស្លាប់នៅកន្លែងកើតហេតុ។
ក្រោយបង្កហេតុជនសង្ស័យបានរត់គេចខ្លួនបាត់ហើយប្រជាពលរដ្ឋបានរាយការណ៍ទៅនគរបាលប៉ុស្តិ៍ឃុំផ្លូវមាស និងបានចុះដល់កន្លែងកើតហេតុពិនិត្យលើសាកសពស្ត្រីរងគ្រោះឃើញមានស្នាមកាប់ត្រូវក្បាល ដងខ្លួន កញ្ចឹងក។
លោក លន សំណាង អធិការស្រុកសំឡូត ប្រាប់ពីម្សិលមិញថា ករណីនេះលោកបានសុំកិច្ចសហការពីអធិការដ្ឋាននគរបាលស្រុករតនមណ្ឌលព្រោះសមត្ថកិច្ចស្រុករតនមណ្ឌល ស្រាវជ្រាវដឹងថា ជនសង្ស័យរត់គេចមកលាក់ខ្លួននៅក្នុងដែនដីស្រុកសំឡូត ទើបសមត្ថកិច្ចរបស់លោកស្រាវជ្រាវចាប់ជនសង្ស័យតាមភិនភាគដែលខាងសមត្ថកិច្ចស្រុករតនមណ្ឌលបង្ហាញ ទើបចាប់ជនសង្ស័យបញ្ជូនទៅទឹកដីដែលគេប្រព្រឹត្តបទល្មើស៕
