.jpg)
ជនរងគ្រោះ ដែលត្រូវបានប្ដីសម្លាប់រួចទម្លាក់ក្នុងស្រះទឹក។ រូបថត ហ្វេសប៊ុក
កំពង់ធំៈ ជនសង្ស័យជាប្តីត្រូវនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពង់ធំចាប់ខ្លួនកាលពីម្សិលមិញ បន្ទាប់ពីប្រជាពលរដ្ឋប្រទះឃើញសាកសពនៅក្នុងស្រះទឹក ១ កន្លែងនៅភូមិខ្វាន់ទៀង ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំកាលពីថ្ងៃទី ២១ កក្កដា។
លោក ជា ពឿន ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពង់ធំឲ្យដឹងពីម្សិលមិញថា ជនសង្ស័យឈ្មោះ ធល ធារិទ្ធ អាយុ ៣០ ឆ្នាំរីឯប្រពន្ធឈ្មោះ ស្រ៊ុន ចន្ទ្រា អាយុ ២៩ ឆ្នាំមានរបរជាពេទ្យពួកគេមានកូនប្រុស ២ នាក់ និងកូនស្រីម្នាក់។ ចំពោះជនសង្ស័យសមត្ថកិច្ចកំពុងសាកសួរបន្តទៀតពាក់ព័ន្ធនឹងអំពើឃាតកម្មនេះ។
លោកថ្លែងថា៖ «ខ្ញុំមិនទាន់អាចប្រាប់លម្អិតបានទេពេលនេះ ព្រោះនគរបាលយុត្តិធម៌យើងកំពុងសាកសួរជនសង្ស័យ»។
ទោះយ៉ាងណាបើតាមមន្ត្រីម្នាក់ជានគរបាលយុត្តិធម៌ខេត្តកំពង់ធំសុំមិនឲ្យបញ្ចេញឈ្មោះប្រាប់ថា កាលពីព្រឹកថ្ងៃទី ២១ កក្កដា ឆ្នាំ ២០២០ ប្តីរបស់ស្ត្រីរងគ្រោះបានបាត់ប្រពន្ធហើយបានប្រាប់បងប្អូនឲ្យនាំគ្នាដើររក។ រីឯប្តីរបស់ស្ត្រីរងគ្រោះបានដើរទៅស្រះទឹក ១ កន្លែងក្រោយផ្ទះដែលមានចម្ងាយប្រហែល ៦០ ម៉ែត្រ។
ក្រោយពីប្រទះឃើញសព ប្តីស្ត្រីរងគ្រោះបានរាយការណ៍ប្រាប់សមត្ថកិច្ចហើយសមត្ថកិច្ចផ្នែកជំនាញកោសល្យវិច័យខេត្ត និងគ្រូពេទ្យបានចុះដល់កន្លែងកើតហេតុធ្វើកោសល្យវិច័យលើសាកសពដោយពិនិត្យឃើញថា ត្រូវជនសង្ស័យជាប្តីកាប់ចំ ក ក្រោមត្រចៀករយះស្ទើរដាច់ ១ ចំហៀងក។
ក្រោយពីពិនិត្យសាកសពរួចមក សមត្ថកិច្ចនគរបាលស្រុកប្រាសាទបល្ល័ង្កបានហៅប្តីរបស់ស្ត្រីរងគ្រោះ និងឪពុកបង្កើតរបស់ស្ត្រីរងគ្រោះទៅសាកសួរនៅអធិការដ្ឋាននគរបាលស្រុកប្រាសាទបល្ល័ង្ក ទើបជនសង្ស័យសារភាពចំណែកឪពុកបង្កើតរបស់ស្ត្រីរងគ្រោះបានអនុញ្ញាតឲ្យត្រឡប់ទៅផ្ទះវិញ។
មន្ត្រីបញ្ជាក់ប្រាប់ថា ជនសង្ស័យបានសារភាពថា រូបគេបានយកកាំបិតផ្កាក់កាប់ស្ត្រីរងគ្រោះនៅពេលយប់ ពេលនោះពួកគេបានឈ្លោះប្រកែកគ្នា។ ក្រោយពីសម្លាប់ហើយ គាត់បានអូសស្ត្រីរងគ្រោះទៅទម្លាក់ចោលក្នុងស្រះទឹកនៅខាងក្រោយផ្ទះហើយបានដើរត្រឡប់មកផ្ទះវិញ។
លុះព្រឹកឡើងថ្ងៃទី ២១ កក្កដាជនសង្ស័យបានឆោឡោបាត់ប្រពន្ធហើយធ្វើជាដើររក។ ជនសង្ស័យបានសារភាពប្រាប់សមត្ថកិច្ចថា មូលហេតុដែលរូបគេសម្លាប់ប្រពន្ធបែបនេះដោយសារជនសង្ស័យស៊ើបដឹងថា ប្រពន្ធខ្លួនលួចមានស្នេហាផិតក្បត់៕
