.jpg)
សមត្ថកិច្ចចាប់ឃាត់ខ្លួនបុរសម្នាក់ និងវត្ថុតាងត្រាក់ទ័រ១ គ្រឿង ក្នុងបទល្មើសឈូសឆាយទន្រ្ទានដីព្រៃក្នុងតំបន់អភិវឌ្ឍន៍ស្ថានីយផ្សព្វផ្សាយនិងស្តារព្រៃឈើ ក្នុងសង្កាត់កូនក្រៀល ក្រុងសំរោង។ រូបថត ហ្វេសប៊ុក
ឧត្តរមានជ័យៈ កម្លាំងជំនាញរដ្ឋបាលព្រៃឈើ ក្រោមកិច្ចសហការសម្របសម្រួលផ្នែកច្បាប់ ពីតំណាងអយ្យការអមសាលាដំបូង ខេត្តឧត្តរមានជ័យ បានចាប់ឃាត់ខ្លួនបុរសម្នាក់ និងវត្ថុតាងត្រាក់ទ័រ១ គ្រឿង ក្នុងបទល្មើសឈូសឆាយទន្រ្ទានដីព្រៃក្នុងតំបន់អភិវឌ្ឍន៍ស្ថានីយផ្សព្វផ្សាយនិងស្តារព្រៃឈើ ក្នុងសង្កាត់កូនក្រៀល ក្រុងសំរោង។
លោក អ៊ឹម សាវរិទ្ធិ នាយខណ្ឌរដ្ឋបាលព្រៃឈើខេត្តឧត្តរមានជ័យ ប្រាប់ភ្នំពេញប៉ុស្តិ៍ នៅថ្ងៃទី២៨ មេសា ថា ជនសង្ស័យឈ្មោះ យ៉ា ឃឹម អាយុ ១៩ឆ្នាំ មានទីលំនៅ ភូមិគីរីមង្គល សង្កាត់សំរោង ក្រុងសំរោង ត្រូវបានមន្ត្រីសង្កាត់រដ្ឋបាលព្រៃឈើសំរោង ចាប់ឃាត់ខ្លួន ខណៈកំពុងបើកត្រាក់ទ័រ គូបូតា ១ គ្រឿងឈូសឆាយដីព្រៃក្នុងតំបន់អភិវឌ្ឍន៍ស្ថានីយផ្សព្វផ្សាយនិងស្តារព្រៃឈើនៅចំណុចអូរបាត់មាន់ ស្ថិតក្នុងសង្កាត់កូនក្រៀល ក្រុងសំរោង កាលពីរសៀលថ្ងៃទី ២៧ មេសា។
លោកបញ្ជាក់ថា៖«នៅពេលនេះ ជនសង្ស័យនិងវត្ថុតាង ត្រាក់ទ័រគូបូតា ១គ្រឿង ត្រូវបានបញ្ជូនមកកាន់ខណ្ឌរដ្ឋបាលព្រៃឈើខេត្ត ហើយមន្ត្រីជំនាញខណ្ឌរដ្ឋបាលព្រៃឈើកំពុងរៀបចំកសាងសំណុំរឿងបញ្ជូនជនសង្ស័យទៅតុលាការ ដើម្បីចាត់វិធានការបន្តតាមនីតិវិធីច្បាប់»។
លោកស្រី ធាម ច័ន្ទពិលីកា អ្នកនាំពាក្យតុលាការខេត្តឧត្តរមានជ័យ បានប្រាប់ភ្នំពេញ ប៉ុស្តិ៍ នៅថ្ងៃទី២៨ មេសា ថា ជនសង្ស័យក្នុងសំណុំរឿងបទល្មើសបំផ្លិចបំផ្លាញធនធានធម្មជាតិខាងលើនេះ ត្រូវបានតុលាការខេត្តឧត្តរមានជ័យសម្រេចចោទប្រកាន់ក្នុង «បទល្មើសធនធានធម្មជាតិថ្នាក់ទី៤ តាមបញ្ញតិមាត្រា ៥៦ និងមាត្រា ៦២ នៃច្បាប់ស្ដីពីតំបន់ការពារធនធានធម្មជាតិ» និងបានបញ្ជាឲ្យនាំយកទៅឃុំខ្លួនក្នុងពន្ធនាគារខេត្តជាបណ្ដោះអាសន្ន។
យោងតាមបទចោទ និង មាត្រាទាំង ២ ខាងលើនេះ ជនសង្ស័យនឹងត្រូវប្រឈមការផ្ដន្ទាទោសជាប់ពន្ធនាគារពី ៥ឆ្នាំ ដល់ ១០ឆ្នាំ និងពិន័យជាប្រាក់ពី ១៥លានរៀល ដល់ ១៥០លានរៀល។ ចំណែកវត្ថុតាងនៃបទល្មើសត្រូវរឹបអូសទុកជាសម្បត្តិរដ្ឋ។
កាលពីថ្ងៃទី២៣ ខែមេសា កម្លាំងសមត្ថកិច្ចខណ្ឌរដ្ឋបាលព្រៃឈើខេត្តឧត្តរមានជ័យ ក៏បានចាប់ឃាត់ខ្លួនបុរសម្នាក់ ឈ្មោះលឿម វិត អាយុ១៦ឆ្នាំ មានទីលំនៅភូមិបន្ទាយជ័រ ឃុំពង្រ ស្រុក ចុងកាល់ ដោយរឹបអូសវត្ថុតាងត្រាក់ទ័រគូប៊ូតា ១គ្រឿង ខណៈកំពុងធ្វើសកម្មភាពឈូសឆាយភ្ជួរដីស្ថានីយផ្សព្វផ្សាយនិងស្ថានីយស្តារព្រៃឈើ នៅត្រង់ចំណុចចុងរាំង ឃុំពង្រ ស្រុកចុងកាល់។ នេះបើយោងតាមលោក សាវរិទ្ធិ។
បន្ទាប់មកនៅថ្ងៃទី២៥ ខែមេសា តុលាការខេត្តឧត្តរមានជ័យ ក៏បានសម្រេចឃុំខ្លួន ជនសង្ស័យឈ្មោះ លឹម វិត ពីបទឈូសឆាយទន្ទ្រានដីរដ្ឋ ធ្វើជាកម្មសិទ្ធិឯកជនខុសច្បាប់ តាមបញ្ញតិមាត្រា ៥៦ និង មាត្រា ៦២នៃច្បាប់ការពារធនធានធម្មជាតិ។
ដោយឡែក នៅឯខេត្តមណ្ឌលគិរី កម្លាំងបញ្ជាការឯកភាពស្រុកកែវសីមា នៅថ្ងៃទី២៧ ខែមេសា សហការជាមួយក្រុមការងារអភិរក្សរបស់ដែនជម្រក សត្វព្រៃកែវសីមា ចុះល្បាតក្នុងភូមិសាស្រ្តដែនជម្រកសត្វព្រៃកែវសីមា និងក្នុងតំបន់អនុវត្តគម្រោង REDD+ ដែលគាំទ្រដោយគម្រោងរបស់អង្គការ WCS។
ក្នុងការល្បាតនេះ បានឃាត់ខ្លួនពលរដ្ឋម្នាក់ យកមកធ្វើការអប់រំណែនាំ និងផាកពិន័យអន្តរការណ៍ បន្ទាប់ពីពលរដ្ឋរូបនោះបានធ្វើសកម្មភាពកាប់រានដីព្រៃក្នុងតំបន់ដែនជម្រកសត្វព្រៃកែវសីមា ដើម្បីពង្រីកផ្ទៃដីដាំដុះកសិកម្មជាលក្ខណៈគ្រួសារដោយខុសច្បាប់។ នេះបើតាមលោក ហឿន សុខណា អភិបាលរងស្រុកកែវសីមា នៅថ្ងៃទី២៨ មេសា។
លោកថ្លែងថា៖ «ក្នុងប្រតិបត្តិការនេះ ក្រុមការងារបានរកឃើញដីដែលបានកាប់រានខុសច្បាប់ប្រមាណជាង ១០ហិកតា ដែលដីនោះប្រមាណ ៥០ភាគរយ កំពុងត្រូវបានគេដាំដុះដំឡូងមី។ កម្លាំងសមត្ថកិច្ចជំនាញ កំពុងកសាងសំណុំរឿង បញ្ជូនទៅតុលាការ ដើម្បីចាត់វិធានការដកហូតដីទាំងនោះមកជាសម្បត្តិរដ្ឋវិញ ទៅតាមនីតិវិធីច្បាប់»៕
