.jpg)
សមត្ថកិច្ចចុះត្រួតពិនិត្យកន្លែងកើតហេតុ ដែលជនសង្ស័យរាយចរន្តអគ្គិសនីព័ទ្ធដីស្រែ ដើម្បីចាប់សត្វកណ្ដុរ។ រូបថត KBN
សៀមរាបៈ បុរសម្នាក់ត្រូវបានកម្លាំងនគរបាលស្រុកពួកចាប់ឃាត់ខ្លួនភ្លាមៗ បន្ទាប់ពីអន្ទាក់អគ្គិសនីរបស់គាត់ដែលរាយព័ទ្ធជុំវិញដីស្រែរបស់គាត់ ដើម្បីចាប់សត្វកណ្ដុរបានបង្កឲ្យអ្នកភូមិម្នាក់ស្លាប់ និងម្នាក់ទៀតរងរបួសធ្ងន់។ យោងតាមប្រភពមន្ត្រីនគរបាលមូលដ្ឋានកាលពីថ្ងៃអាទិត្យ។
លោក ទេព ពុំសែន អធិការស្រុកពួកបានប្រាប់ភ្នំពេញប៉ុស្ដិ៍ថា បុរសសង្ស័យឈ្មោះ យ៉ៃ យឿត អាយុ ៥៧ ឆ្នាំមានទីលំនៅ ភូមិអំពិលពាម ឃុំខ្នាត ស្រុកពួក ខេត្តសៀមរាប ត្រូវបានចាប់ខ្លួនកាលពីយប់ថ្ងៃទី ២១ ខែសីហា ឆ្នាំ ២០២០ ពាក់ព័ន្ធករណីរាយអន្ទាក់ខ្សែលួសភ្ជាប់ដោយចរន្តអគ្គិសនី បណ្ដាលឲ្យឆក់ស្លាប់ និងរបួសបុរស ២ នាក់ដែលជាអ្នកភូមិរបស់គាត់។
ជនរងគ្រោះទាំង ២ នោះ គឺជាបងប្អូនប្រុសបង្កើតនឹងគ្នារួមមានឈ្មោះ ភួន ផង់ អាយុ ៣៥ ឆ្នាំ ស្លាប់ និងម្នាក់ទៀតឈ្មោះ ភួន ភីត អាយុ ២១ ឆ្នាំ ដួលសន្លប់បាត់ស្មារតី ត្រូវបានក្រុមគ្រួសារ និងសាច់ញាតិជួយសង្គ្រោះជីវិតទាន់ពេល។
លោកបានបញ្ជាក់ថា៖ «ជនសង្ស័យបានសារភាពថា គាត់ពិតជាបានរាយអន្ទាក់ខ្សែលួសភ្ជាប់ដោយចរន្តអគ្គិសនីហ៊ុមព័ទ្ធដីស្រែនោះមែន ប៉ុន្តែគ្មានបំណងឆក់បុរសទាំង ២ នោះទេ។ គាត់រាយអន្ទាក់អគ្គិសនីនោះ គឺដើម្បីចាប់សត្វកណ្ដុរតែប៉ុណ្ណោះ»។
លោក ភឹង ចិន្តារ៉េត ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តសៀមរាបបានថ្លែងថា៖ «ប៉ុន្តែច្បាប់មិនអនុញ្ញាតឲ្យគាត់ធ្វើបែបនេះឡើយ»។
លោកបានឲ្យដឹងថា យោងតាមសារាចរណែនាំរបស់ក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ការរាយអន្ទាក់ខ្សែលួសភ្ជាប់ចរន្តអគ្គិសនីនៅតាមវាលស្រែនៅក្នុងទឹក និងនៅតាមដងព្រៃនានា ដើម្បីស្ទាក់ចាប់សត្វត្រូវបានហាមឃាត់ជាដាច់ខាត។
លោក ចិន្តារ៉េត ថ្លែងថា៖ «គាត់ក៏ត្រូវបានតុលាការសម្រេចចោទប្រកាន់ពីបទមនុស្សឃាតដោយអចេតនា និងបានបង្គាប់ឲ្យនាំយកទៅឃុំខ្លួនជាបណ្ដោះអាសន្ន ដើម្បីជំនុំជម្រះទោសនៅពេលក្រោយ»។
លោក ឆាយ នួន ជាបងថ្លៃប្រុសជនរងគ្រោះបានឲ្យដឹងថា គ្រួសារជនសង្ស័យបានព្យាយាមធ្វើការសម្របសម្រួលដំណោះស្រាយក្រៅប្រព័ន្ធតុលាការជាសំណងទឹកប្រាក់ ៥ ពាន់ដុល្លារ ប៉ុន្តែក្រុមគ្រួសារជនរងគ្រោះមិនព្រម ទុកឲ្យច្បាប់ដោះស្រាយ៕
