បន្ទាយមានជ័យ៖ បុរសម្នាក់ត្រូវបានតុលាការខេត្តបន្ទាយមានជ័យ ឃុំខ្លួនក្នុងពន្ធនាគារកាលពីថ្ងៃទី ២៦ មេសា បន្ទាប់ពីសមត្ថកិច្ចចាប់ខ្លួន ១ ថ្ងៃ ពាក់ព័ន្ធការរំលោភសេពសន្ថវៈកូនចុងរបស់ខ្លួនបានសម្រេច ១ លើក ប្រព្រឹត្តនៅឃុំបន្ទាយឆ្មា ស្រុកថ្មពួក ខេត្តបន្ទាយមានជ័យ។
លោកស្រី ឌី សុជាតិ ស្នងការរងទទួលការងារផែនប្រឆាំងការជួញដូរមនុស្ស ខេត្តបន្ទាយមានជ័យឱ្យដឹងនៅថ្ងៃទី ២៧ មេសាថា បុរសឈ្មោះ ចាន់ រៈយ៉ា អាយុ ៤៤ ឆ្នាំ ត្រូវបានបញ្ជូនទៅឃុំខ្លួនក្នុងពន្ធនាគារខេត្តហើយ កាលពីរសៀលថ្ងៃទី ២៦ មេសា។ ទាំងតំណាងអយ្យការទាំងចៅក្រមបានប្រើពេលជាច្រើនម៉ោង ដើម្បីសួរចម្លើយជនសង្ស័យ មុនសម្រេចចេញដីកាឃុំ។
លោកស្រីថ្លែងថា៖ «មុននឹងតុលាការសម្រេចឃុំខ្លួនជនណាម្នាក់ គឺតុលាការស៊ើបអង្កេតរឿងនោះល្អិតល្អន់ណាស់។ តុលាការចោទបទរួមភេទជាមួយអនីតិជនក្រោមអាយុ ១៥ ឆ្នាំ តាមមាត្រា ៤២»។
បើយោងមាត្រា ៤២ ច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ បើតុលាការរកឃើញថា ជនសង្ស័យប្រព្រឹត្តមែននោះ នឹងត្រូវផ្តន្ទាទោសដាក់ពន្ធនាគារពី ៥ ទៅ ១០ ឆ្នាំ។
ករណីនេះត្រូវបានលោក ផែ សាវិត នាយនគរបាលប៉ុស្តិ៍រដ្ឋបាលឃុំបន្ទាយឆ្មា ប្រាប់នៅថ្ងៃទី ២៧ មេសាថា ក្មេងស្រីរងគ្រោះឈ្មោះ យ.រ អាយុ ១០ ឆ្នាំ។ នាងមានបងប្រុសម្នាក់ ហើយនាងជាកូនប្អូន។
លោកប្រាប់ថា៖ «រឿងនេះម្តាយក្មេងស្រីរងគ្រោះជាអ្នកប្តឹងផ្ទាល់ ព្រោះតែក្មេងរងគ្រោះប្រាប់ម្តាយនាង»។
លោកប្រាប់តាមសម្តីស្រ្តីម្តាយក្មេងថា ម្តាយក្មេងរងគ្រោះជាស្រ្តីមេម៉ាយមានជីវភាពក្រីក្រខ្លាំង។ ដោយគ្មានអ្វីជាទីពឹងគាត់បានយកបុរសជាប់ចោទគ្រាន់ពឹងពាក់ក្នុងការមើលខុសត្រូវកូនៗ ព្រោះថាកូននៅតូចៗនៅឡើយ។
នៅព្រឹកថ្ងៃទី ២៤ មេសា ម្តាយក្មេងរងគ្រោះបានទៅស៊ីឈ្នួលបេះស្វាយឱ្យគេនៅក្បែរភូមិ ហើយទុកកូនៗនៅចាំផ្ទះ។ ប៉ុន្តែពេលនោះជនសង្ស័យដែលមិនបានទៅជាមួយប្រពន្ធ បានចាប់ក្មេងស្រីរងគ្រោះរំលោភបានសម្រចតែម្តងទៅ។
លុះពេលស្រ្តីម្តាយក្មេងរងគ្រោះត្រឡប់មកពីស៊ីឈ្នួលបេះស្វាយវិញ ក៏ត្រូវក្មេងរងគ្រោះយំប្រាប់ម្តាយ។ ពេលនោះស្រ្តីជាម្តាយបានទៅប្តឹងនគរបាលវរសេនាតូចការពារព្រំដែនគោកលេខ ៨០៧ ព្រោះនៅជិតផ្ទះ។
បន្ទាប់មកនគរបាលព្រំដែនគោកលេខ ៨០៧ បានចាប់ជនសង្ស័យដឹកមកប្រគល់ឱ្យនគរបាលប៉ុស្តិ៍រដ្ឋបាលឃុំបន្ទាយឆ្មា។
លោកបញ្ជាក់ថា៖ «ភូមិកើតហេតុនៅឆ្ងាយពីប៉ុស្តិ៍នគរបាលខ្ញុំប្រហែលជា ១ គីឡូម៉ែត្រ។ ឯនគរបាលវរសេនាតូចការពារព្រំដែនគោកលេខ ៨០៧ នៅជិតជាងខ្ញុំ»៕