.jpg)
បុរសម្នាក់ត្រូវបានសមត្ថកិច្ចឃាត់ខ្លួនកាលពីថ្ងៃទី ១៧ ឧសភា ករណីរំលោភកូនស្រីបង្កើត។ រូបថត ប៉ូលិស
ពោធិ៍សាត់ៈ តុលាការខេត្តពោធិ៍សាត់បានឃុំខ្លួនបុរសម្នាក់ក្នុងពន្ធនាគារ កាលពីថ្ងៃទី ១៩ ឧសភា បន្ទាប់ពីចាប់ខ្លួន កាលពីថ្ងៃទី ១៧ ឧសភា ករណីរំលោភកូនស្រីបង្កើតរបស់ខ្លួនអាយុ ១៤ ឆ្នាំ បានសម្រេចដល់ទៅ ៤ ដង ប្រព្រឹត្តនៅឃុំព្រងិល ស្រុកភ្នំក្រវាញ។
លោកស្រី ស៊ឹម លន់ ស្នងការរងទទួលផែនការងារប្រឆាំងការជួញដូរមនុស្ស និងការពារអនីតិជនខេត្តពោធិ៍សាត់ឱ្យដឹងនៅរសៀលថ្ងៃទី ២០ ឧសភា ថា បុរសឈ្មោះ ប៉ក់ បូរី អាយុ ៣៥ ឆ្នាំ ត្រូវបានចៅក្រមស៊ើបសួរនៃសាលាដំបូងខេត្តពោធិ៍សាត់ សម្រេចចេញដីកាឃុំខ្លួនក្នុងពន្ធនាគារខេត្តហើយ នៅថ្ងៃទី ១៩ ឧសភា។ រីឯក្មេងស្រីរងគ្រោះឈ្មោះ ម.ស. អាយុ ១៤ ឆ្នាំ។
លោកស្រីថ្លែងថា៖ «ចៅក្រមស៊ើបសួរឃុំខ្លួនជនត្រូវចោទម្នាក់នេះ តាមបញ្ញត្តិមាត្រា ៤២ ច្បាប់ ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ»។
បើតាមបញ្ញត្តិមាត្រា ៤២ ច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទនេះ ប្រសិនបើតុលាការរកឃើញថា ជនត្រូវចោទពិតជាបានប្រព្រឹត្តលើក្មេងរងគ្រោះមែននោះនឹងត្រូវផ្តន្ទាទោសដាក់ពន្ធនាគារពី ៥ ទៅ ១០ ឆ្នាំ។
លោក ហ៊ុន ចាន់ធា នាយផ្នែកព្រហ្មទណ្ឌនៃអធិការដ្ឋាននគរបាលស្រុកភ្នំក្រវាញបានប្រាប់នៅថ្ងៃទី ២០ ឧសភា ដែរថា ជនសង្ស័យឈ្មោះ ប៉ក់ បូរី មានប្រពន្ធ និងមានកូនចំនួន ៤ នាក់ ប្រុស ២ នាក់ ស្រី ២ នាក់ ហើយក្មេងស្រីរងគ្រោះជាកូនទី៣ ក្នុងគ្រួសារ។ ចំពោះស្ថានភាពគ្រួសារមួយនេះជាគ្រួសារក្រីក្រ ដូច្នេះកូនៗក៏ដូចជាម្តាយក្មេងរងគ្រោះតែងចេញទៅប្រកបការងារផ្សេងៗមិនសូវបាននៅផ្ទះជាប់លាប់ទេដែលជនសង្ស័យមានឱកាសក្នុងការប្រព្រឹត្តបទល្មើស។
លោកប្រាប់តាមសម្តីម្តាយក្មេងរងគ្រោះថា ជនសង្ស័យជាឪពុកបង្កើតនោះ បានប្រព្រឹត្តលើកូនស្រីខ្លួនឯង (ក្មេងរងគ្រោះ) ម្តងរួចមកហើយគឺនៅពេលយប់។ ប៉ុន្តែគាត់ (ម្តាយ) មិនបានចាំថ្ងៃខែទេ ហើយពេលនោះគាត់បានស្តីបន្ទោសជនសង្ស័យកុំឲ្យប្រព្រឹត្តនូវអំពើមិនគប្បីដូច្នេះទៀត ព្រោះខ្លួនជាឪពុកបង្កើត និងផ្តល់ភាពកក់ក្តៅដល់កូនៗ។
មន្ត្រីប៉ូលិសរូបនេះបន្តថា នៅថ្ងៃទី ១៧ ឧសភា មុនពេលកើតហេតុ ជនសង្ស័យបានបង្ខំឱ្យកូនប្រុសម្នាក់ចេញទៅព្រៃដោយប្រាប់ថា ទៅរកអុសយកមកទុកដុត ហើយកូនប្រុសនោះក៏ចេញទៅរកអុសតាមបញ្ជារបស់ឪពុក។ ប៉ុន្តែដោយមានការសង្ស័យ កូនប្រុសម្នាក់នោះក៏ត្រឡប់មកផ្ទះវិញ ក៏ឃើញឪពុកកំពុងតែរំលោភលើប្អូនស្រីរបស់ខ្លួន ទើបរត់ទៅប្រាប់ម្តាយរបស់ខ្លួនតែម្តង។ ភ្លាមៗនោះស្រ្តីម្តាយក្មេងរងគ្រោះបានមកប្តឹងនគរបាលប៉ុស្តិ៍ឃុំព្រងិល ហើយសមត្ថកិច្ចបានចុះឃាត់ខ្លួនជនសង្ស័យនៅថ្ងៃទី ១៧ ឧសភាតែម្តង។
លោក ចាន់ធា បញ្ជាក់ថា ក្រោយឃាត់ខ្លួនជនសង្ស័យបានសារភាពថា គាត់បានរំលោភកូនស្រីរបស់គាត់បានសម្រេច ៤ ដង ហើយលើកចុងក្រោយនេះ ក៏ត្រូវបែកការណ៍ដោយសារកូនប្រុសរបស់គាត់ឃើញនៅពេលគាត់កំពុងធ្វើសកម្មភាពរំលោភកូនស្រីគាត់៕
