.jpg)
សព្វបុរសម្នាក់ត្រូវបានគេប្រទះឃើញស្លាប់ នៅចំណុចវាលស្រែប្រាំង ១ កន្លែង។ រូបថត សហការី
កំពតៈ បុរសម្នាក់ត្រូវបានគេប្រទះឃើញស្លាប់នៅចំណុចវាលស្រែប្រាំង ១ កន្លែង ដែលមានចម្ងាយប្រមាណជាង ២០០ ម៉ែត្រពីភូមិពងទឹក ឃុំ-ស្រែចែង ស្រុកជុំគិរី ខេត្តកំពត បន្ទាប់ពីមានករណីដុតជញ្ជ្រាំងស្រូវហើយឆេះរាលដាលដល់ស្រូវប្រាំង ដែលមិនទាន់បានច្រូតកាត់អស់ជាច្រើនហិកតា។ នេះបើតាមការអះអាងពីមន្ត្រីនគរបាលមូលដ្ឋានកាលពីម្សិលមិញ។
លោក ម៉ី សុខុម អធិការស្រុកជុំគិរី បានប្រាប់ភ្នំពេញប៉ុស្តិ៍នៅថ្ងៃព្រហស្បតិ៍ថា ជនរងគ្រោះឈ្មោះ ជា ថន អាយុ ៤៨ ឆ្នាំ មានលំនៅក្នុងភូមិពងទឹក។ មុនពេលកើតហេតុកាលពីរសៀលថ្ងៃទី ៧ ខែ មករា ឆ្នាំ ២០២០ ជនរងគ្រោះបានជិះម៉ូតូទៅស្រែដែលមានចម្ងាយជាង ២០០ ម៉ែត្រពីភូមិក្នុងគោលបំណងដុតជញ្ជ្រាំងស្រូវ ដើម្បីងាយស្រួលភ្ជួររាស់ដី ដាំត្រឡាច និងត្រសក់ ដើម្បីលក់ដូរឲ្យទាន់រដូវបុណ្យចូលឆ្នាំចិនដែលនឹងចូលមកដល់នៅចុងខែមករា ឆ្នាំ ២០២០ នេះ។
លោកបាននិយាយថា៖ «ជនរងគ្រោះបានបាត់ខ្លួន ១ យប់ [យប់ថ្ងៃអង្គារ] បន្ទាប់ពីគាត់បានដុតគល់ជញ្ជ្រាំងក្នុងដីស្រែរបស់គាត់ ហើយឆេះរាលដាលដល់ស្រូវអ្នកភូមិផ្សេងទៀតដែលមិនទាន់ច្រូតកាត់អស់ជិត ៣ ហិកតា។ លុះព្រឹកឡើងក្រុមគ្រួសាររបស់គាត់បានចេញទៅរកគាត់នៅឯស្រែ ក៏ប្រទះឃើញគាត់ដេកស្លាប់នៅលើដីស្រែ ដែលមានភ្លើងឆេះនោះ»។
លោក សុខុម បានបន្ថែមថាយ៉ាងណាក៏ដោយក្រោយពីចុះពិនិត្យដល់កន្លែងកើតហេតុ និងការធ្វើកោសល្យវិច័យលើសាកសពជនរងគ្រោះរួចក្រុមមន្ត្រីនគរបាល និងគ្រូពេទ្យជំនាញពីថ្នាក់ខេត្តបានសន្និដ្ឋានថា ការស្លាប់របស់ជនរងគ្រោះ គឺបណ្ដាលមកពី «កង្វះខ្យល់អុកស៊ីហ្ស៊ែននៅក្នុងខួរក្បាល» ព្រោះគល់ជញ្ជ្រាំងដែលគាត់បានដុតនោះបានឆេះរាលដាលបង្កើតជាផ្សែងខ្មៅខ្មួលអាប់ឡើងធ្វើឲ្យគាត់ថប់ដង្ហើមដួលសន្លប់នៅកណ្ដាលស្រែ ដោយគ្មាននរណាម្នាក់បានដឹង និងជួយសង្គ្រោះទើបបណ្ដាលឲ្យគាត់ស្លាប់តែម្ដង។
ជុំវិញករណីនេះបងប្រុសរបស់ជនរងគ្រោះគឺលោក ជា ដោក នាយនគរបាលប៉ុស្តិ៍ឃុំស្រែចែងបានប្រាប់ភ្នំពេញប៉ុស្តិ៍ថា ជនរងគ្រោះកាលពីនៅរស់មានជំងឺហឺត ហើយដោយសារសុខភាពរបស់គាត់មិនសូវរឹងមាំ កិច្ចការជាច្រើនត្រូវធ្លាក់បន្ទុកលើស្ត្រីជាប្រពន្ធ ជាអ្នករ៉ាប់រងធ្វើស្ទើរតែទាំងអស់ដែលរាប់បញ្ចូលទាំងការភ្ជួរស្រែផងដែរ។
លោកដោកបាននិយាយថា៖ «យើងក៏សង្ស័យវា [ជនរងគ្រោះ] ឈ្លក់ផ្សែងភ្លើងស្លាប់ដូចការសន្និដ្ឋានរបស់សមត្ថកិច្ចជំនាញដែរ ព្រោះវាមានជំងឺហឺតស្រាប់ផង»។
បើតាមលោក ដោក សពជនរងគ្រោះត្រូវបានក្រុមគ្រួសាររៀបចំពិធីបុណ្យ និងបូជាតាំងពីរសៀលថ្ងៃពុធ។
គួរបញ្ជាក់ថាកាលពីអំឡុងខែធ្នូ ឆ្នាំ ២០១៩ ក្រសួងបរិស្ថានបានចេញសេចក្ដីជូនដំណឹងស្ដីពី «ការបង្ការទប់ស្កាត់ បញ្ហាភ្លើងឆេះព្រៃ» ដោយបានព្រមានចាត់វិធានការតឹងរ៉ឹងតាមផ្លូវច្បាប់ ចំពោះជនទាំងឡាយណាដែលដុតរានដីព្រៃក្នុងគោលបំណងទន្ទ្រានយកដីព្រៃរបស់រដ្ឋធ្វើជាកម្មសិទ្ធិឯកជន និងការដុតភ្លើងដើម្បីយកទឹកឃ្មុំព្រៃដោយខ្វះការប្រុងប្រយ័ត្ន ដែលនាំឲ្យមានការឆេះរាលដាលដល់ព្រៃឈើ និងលំនៅឋានអ្នកដទៃព្រមទាំងការដុតគល់ជញ្ជ្រាំង ដែលនាំឲ្យមានការឆេះរាលដាលដល់ស្រូវអ្នកដទៃផងដែរ។
សេចក្ដីជូនដំណឹងដដែលរបស់ក្រសួងបរិស្ថានបានធ្វើឡើងបន្ទាប់ពីប្រជាកសិករនៅឯស្រុកកញ្ជ្រៀច ខេត្តព្រៃវែង បាននាំគ្នាដុតគល់ជញ្ជ្រាំង ដើម្បីប្រញាប់យកដីស្រែដាំឪឡឹក ហើយបង្កឲ្យមានការឆេះរាលដាលដល់ស្រែដែលមិនទាន់ច្រូតកាត់ស្រូវអស់ជាង ៨ ហិកតា៕
