.jpg)
សាកសពបុរសជនរងគ្រោះដែលរថភ្លើងកិនស្លាប់។ រូបថត ហ្វេសប៊ុក
បាត់ដំបងៈ បុរសម្នាក់ត្រូវបានរថភ្លើងកិនដាច់ជើងទាំងសងខាងបណ្ដាលឲ្យស្លាប់ ខណៈជនរងគ្រោះស្រវឹងស្រា ហើយទៅដេកលើផ្លូវរថភ្លើងកាលពីទៀបភ្លឺថ្ងៃទី ៦ មករានៅភូមិ-សង្កាត់ទួលតាឯកក្រុង-ខេត្តបាត់ដំបង។
លោក ឆាង វណ្ណឆៃ អធិការនគរបាលក្រុងបាត់ដំបងប្រាប់ពីថ្ងៃអង្គារថា បុរសរងគ្រោះនោះ ឈ្មោះ អ៊ុន សុគន្ធា អាយុ ៣១ ឆ្នាំ ជាអ្នកកាប់ជ្រូក រស់នៅភូមិ-ឃុំកើតហេតុខាងលើ។
លោកបានបញ្ជាក់ថា៖ «បុរសនោះគាត់ស្រវឹងស្រាបាត់បង់ស្មារតី ហើយ រឿងនេះមិនមែនអំពើមនុស្សឃាតអីឡើយ »។
លោក វណ្ណឆៃ បានឲ្យដឹងតាមរយៈសម្តីសាច់ញាតិបុរសនោះថា ជនរងគ្រោះមានរបរជាអ្នកស៊ីឈ្នួលកាប់ជ្រូកឲ្យគេ ប៉ុន្តែគាត់តែងស្រវឹងខួបដោយដើរផឹកស្រា មិនសូវលស់ពេលឡើយ។ កាលពីម៉ោង ៤ ទៀបភ្លឺថ្ងៃទី ៦ មករា ជនរងគ្រោះមិនបាននៅផ្ទះទេ ប៉ុន្តែក្រុមគ្រួសារក៏មិនរកគាត់ដែរព្រោះគិតថាជាទម្លាប់គាត់ ។
លោកបន្តថា ក្រោយពីទទួលបានព័ត៌មានពីពលរដ្ឋនៅក្បែរកន្លែងកើតហេតុ រូបលោក និងមន្ត្រីជំនាញផ្នែកកោសល្យវិច័យខេត្តបានចុះទៅដល់ទីនោះ។ តាមការសន្និដ្ឋានរបស់សមត្ថកិច្ច និងតាមស្ថានភាពរបស់ជនរងគ្រោះបានបង្ហាញថា ជនរងគ្រោះបានដេកដោយយកជើងទាំង ២ ទៅគងនៅលើផ្លូវរថភ្លើង ហើយដងខ្លួនរបស់គាត់នៅខាងក្រៅ ។
លោកថា៖ «បុរសនោះហូរឈាមច្រើនធ្វើឲ្យខ្សោះឈាមស្លាប់។ ខ្ញុំទើបចូលកាន់ជាអធិការនគរបាលក្រុងបាត់ដំបងបានតែ ៣ ខែ ដូច្នេះខ្ញុំមិនដឹងថាកន្លងមកធ្លាប់មានករណីបែបនេះឬយ៉ាងណាទេ» ។
ទោះជាយ៉ាងណាលោក ប៉ាង ហៀង អតីតអធិការនគរបាលក្រុងបាត់ដំបងបានប្រាប់កាលពីថ្ងៃអង្គារថា ផ្លូវរថភ្លើងឆ្លងកាត់នៅភូមិទួលតាឯកជាចំណតស្ថានីយដែលតែងមានមនុស្សជុំគ្នាច្រើន ។ ប៉ុន្តែមិនដែលមានអ្នកគ្រោះថ្នាក់ដោយរថភ្លើងកិនស្លាប់ទេ។
លោកថា៖ «ពេលរថភ្លើងឆ្លងកាត់ផ្លូវម្តងៗគឺសមត្ថកិច្ចតែងតែដាក់បារ៉ាស់មិនឲ្យរថយន្ត ឬមនុស្សឆ្លងកាត់ឡើយ»៕
