.jpg)
អ្នកជំនាញស៊ីម៉ាក់ និងអ្នកភូមិមើលត្រាក់ទ័រដែលរងការខូចខាត។ រូបថត FN
ប៉ៃលិនៈ បុរសម្នាក់បានរងរបួសធ្ងន់ ហើយត្រូវបានក្រុមគ្រួសារដឹកយកទៅមន្ទីរពេទ្យ ដើម្បីព្យាបាលរបួស បន្ទាប់ពីគាត់បើកត្រាក់ទ័រភ្ជួរដីប៉ះចំគ្រាប់មីនតោនបណ្ដាលឱ្យផ្ទុះកាលពីព្រឹកថ្ងៃទី ៣ ខែ មេសា ឆ្នាំ ២០២១ នៅចំណុចចម្ការដំឡូងមីស្ថិតក្នុងភូមិភ្នំស្ពង់ ឃុំសាលាក្រៅ។
លោក ប៊ុន វណ្ណី នាយនគរបាលប៉ុស្តិ៍សាលាក្រៅ ប្រាប់ ភ្នំពេញ ប៉ុស្តិ៍ថា ជនរងគ្រោះឈ្មោះ ប៊ន សាមិត្ត អាយុ ២៩ ឆ្នាំ មានលំនៅភូមិអូររអិល ឃុំស្ទឹងកាច់ ស្រុកសាលាក្រៅ។ មុនពេលកើតហេតុគាត់ត្រូវបានប្រជាកសិករក្នុងភូមិកើតហេតុ ជួលឱ្យទៅភ្ជួរដី ដើម្បីដាំដំឡូងមី ប៉ុន្តែជាអកុសល គាត់ក៏ភ្ជួរចំលើគ្រាប់មីនតោន ដែលត្រូវបានគេកប់ចោលកាលពីសម័យសង្គ្រាម បណ្ដាលឱ្យផ្ទុះ បង្កឱ្យរងរបួសយ៉ាងធ្ងន់ធ្ងរ។
លោកបានថ្លែងថា៖ «គាត់បានរងរបួសភ្នែកខាងឆ្វេងធ្ងន់ធ្ងរ ប៉ុន្តែដងខ្លួន និងជើងរបួសស្រាល។ ចំណែកត្រាក់ទ័រភ្ជួរដីរងការខូចខាតយ៉ាងដំណំ»។ ក្រោយកើតហេតុ គាត់ត្រូវបានក្រុមគ្រួសារ និងសាច់ញាតិ នាំយកទៅកាន់មន្ទីរពេទ្យខេត្តប៉ៃលិន ដើម្បីព្យាបាល ប៉ុន្តែដោយសារមុខរបួសភ្នែកធ្ងន់ធ្ងរពេក ខាងមន្ទីរពេទ្យខេត្តបានបញ្ជូនបន្តទៅមន្ទីរពេទ្យខេត្តបាត់ដំបងវិញ។
កាលពីម្សិលមិញ ម្ដាយជនរងគ្រោះ គឺ អ្នកស្រី កឹស គុំ អាយុ ៤៥ ឆ្នាំ ប្រាប់ ភ្នំពេញ ប៉ុស្តិ៍ថា ក្រុមគ្រូពេទ្យជំនាញបានលាងសម្អាត និងដេរមុខរបួសកូនប្រុសរបស់គាត់ [ប៊ន សាមិត្ត] រួចរាល់អស់ហើយ។ ទោះយ៉ាងណានៅពេលនេះកូនប្រុសរបស់គាត់នៅមិនទាន់ចេញពីបន្ទប់សង្គ្រោះបន្ទាន់នោះនៅឡើយទេ។ «នៅពេលនេះកូនប្រុសរបស់ខ្ញុំបានដឹងខ្លួនពីសន្លប់វិញហើយ ប៉ុន្តែភ្នែករបស់វាមិនដឹងជាត្រូវពិការឬយ៉ាងណានោះទេ។ គ្រូពេទ្យប្រាប់ថា របួសភ្នែកធ្ងន់ធ្ងរបែបនេះគឺមិនអាចធានាមើលឃើញដូចដើមវិញទេ»។
បើតាមអ្នកស្រី ទីតាំងដីចម្ការដែលអ្នកភូមិបានជួលកូនប្រុសគាត់ទៅភ្ជួរដើម្បីដាំដំឡូងមីនោះគឺកូនប្រុសគាត់បានទៅភ្ជួររាស់ឱ្យជារៀងរាល់ឆ្នាំដែលគិតមកទល់ពេលនេះមានរយៈពេល ៨ ឆ្នាំមកហើយ ប៉ុន្តែមិនដែលប៉ះចំគ្រាប់មីននោះទេ។
លោក យ៉េង សុគន្ធា ប្រធានអង្គភាពកំចាត់មីននៃមជ្ឈមណ្ឌលសកម្មភាពកំចាត់មីនកម្ពុជា ខេត្តប៉ៃលិនថ្លែងថា ទីតាំងខាងលើនេះមិនទាន់មានមន្ត្រីជំនាញណាមួយចូលទៅរាវរក និងបោសសម្អាតគ្រាប់យុទ្ធភណ្ឌមិនទាន់ផ្ទុះ និងគ្រាប់មីននៅឡើយទេ។ ប៉ុន្តែកន្លងមកមានសេចក្ដីរាយការណ៍ថាមានប្រជាពលរដ្ឋជាអតីតកងទ័ពបានរាវដោះគ្រាប់មីន ដោយខ្លួនឯងដើម្បីយកដីសាងសង់លំនៅឋាន និងដាំដំណាំអាស្រ័យផល។
លោកថ្លែងថា៖ «យើងមិនលើកទឹកចិត្តឱ្យពួកគាត់ ព្យាយាមរាវរក និងដោះគ្រាប់មីនដោយខ្លួនឯង ដោយខ្វះឧបករណ៍បច្ចេកទេសនោះទេ បើទោះជាពួកគាត់ធ្លាប់ធ្វើជាទាហាន និងចេះបច្ចេកទេសដោះមីនខ្លះក៏ដោយ ព្រោះវានឹងបង្កឱ្យមានគ្រោះថ្នាក់ដល់ជីវិតហើយក៏ជាអំពើខុសច្បាប់ដែរ»។ បន្ទាប់ពីមានករណីនេះកើតឡើង លោកនឹងសុំគោលការណ៍ទៅថ្នាក់លើដើម្បីចុះទៅបោសសម្អាតមីននៅតំបន់ខាងលើឱ្យអស់ចៀសវាងគ្រោះថ្នាក់ដល់ប្រជាពលរដ្ឋទៅថ្ងៃក្រោយទៀត៕
