.jpg)
ជនសង្ស័យក្នុងករណីឃាតកម្មនៅខេត្តព្រះសីហនុដែលចាប់ខ្លួនបានថ្ងៃទី ២៣ សីហា។ រូបថត ប៉ូលិស
ព្រះសីហនុៈ បុរសជាជនសង្ស័យក្នុងករណីឃាតកម្មម្នាក់ត្រូវបានសមត្ថកិច្ចបញ្ជូនទៅតុលាការពីម្សិលមិញ ក្រោយពីចាប់ខ្លួនបានកាលពីថ្ងៃទី ២៣ សីហា ពាក់ព័ន្ធនឹងការសម្លាប់មិត្តភក្តិនៅភូមិឫទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុកាលពីយប់ថ្ងៃទី ១៥ ខែសីហា។
លោក កុល ផាលី ស្នងការរងនៃស្នងការដ្ឋាននគរបាលខេត្តព្រះសីហនុទទួលផែនព្រហ្មទណ្ឌប្រាប់ភ្នំពេញប៉ុស្តិ៍ពីម្សិលមិញថា ករណីជនសង្ស័យសម្លាប់បុរសម្នាក់នៅស្រុកស្ទឹងហាវ គឺនគរបាលជំនាញនៃការិយាល័យព្រហ្មទណ្ឌបញ្ជូនទៅសាលាដំបូងខេត្តព្រះសីហនុនៅព្រឹកថ្ងៃទី ២៥ សីហារួចហើយ។
លោកប្រាប់ថា៖ «ជនសង្ស័យពាក់ព័ន្ធនឹងបទល្មើសឃាតកម្មសម្លាប់មនុស្ស ហើយនៅក្នុងកំណត់ហេតុបឋមរបស់ខ្ញុំដែលបញ្ជូនទៅតុលាការក៏សរសេរថាជាបទល្មើសឃាតកម្មដែរ»។
លោក រស់ កី អធិការនគរបាលស្រុកស្ទឹងហាវប្រាប់កាលពីថ្ងៃទី ២៤ សីហា ថា ជនសង្ស័យឈ្មោះ ថៃ រ៉េត ហៅ គុន អាយុ ៣៧ ឆ្នាំ។ រីឯបុរសរងគ្រោះឈ្មោះ ទូច ចក់ អាយុ ៣១ ឆ្នាំ ពួកគេជាកម្មករ និងរស់នៅក្នុងភូមិឃុំ កើតហេតុខាងលើ។ លោកបញ្ជាក់ថា សមត្ថកិច្ចបានបញ្ជូនជនសង្ស័យបន្តទៅស្នងការដ្ឋាននគរបាលខេត្តហើយកាលពីថ្ងៃត្រង់ម្សិលមិញ។
លោកប្រាប់ថា៖ «ជនម្នាក់នេះសមត្ថកិច្ចខ្ញុំបានធ្វើកំណត់ហេតុ និងបញ្ជូនគេទៅស្នងការ [ដ្ឋាន] នគរបាលខេត្តហើយ ហើយបើតាមខ្ញុំដឹងមន្ត្រីជំនាញព្រហ្មទណ្ឌកំពុងចាត់ការបន្ត»។
បើតាមការរៀបរាប់របស់លោកអធិការដែលផ្អែកតាមចម្លើយរបស់ជនសង្ស័យឲ្យដឹងថា មូលហេតុដែលជនសង្ស័យសម្លាប់ជនរងគ្រោះគឺដោយសារខឹងនឹងជនរងគ្រោះធ្លាប់ជេរម្តាយរបស់ជនសង្ស័យ ហើយជនសង្ស័យក៏មានគំនុំគិតក្នុងចិត្តថានឹងសម្លាប់ជនរងគ្រោះនៅថ្ងៃណាមួយឲ្យបាន។ លុះដល់យប់ថ្ងៃទី ១៥ សីហា មុនកើតហេតុ ជនសង្ស័យបានបបួលជនរងគ្រោះផឹកស្រាជាមួយបុរសម្នាក់ទៀតជាអ្នកភូមិជាមួយគ្នា។
លោកបន្តថា អំឡុងពេលផឹកស្រានោះ ពួកគេមានគ្នា ៣ នាក់ជជែកគ្នាលេងបណ្តើរ ផឹកស្រាបណ្តើរ តាមធម្មតា ពិសេសជនសង្ស័យមិនបានបញ្ចេញអាកប្បកិរិយាណាមួយឲ្យជនរងគ្រោះដឹងថា គេមានគំនុំនោះទេ។ បន្ទាប់ពីផឹកស្រាហើយជនរងគ្រោះបានដើរទៅផ្ទះមុន។ ខណៈនោះជនសង្ស័យបានដើរតាមពីក្រោយ ហើយស្ទុះទៅក្រៀកកជនរងគ្រោះជាប់ ហើយជនសង្ស័យក៏ដោះខ្សែក្រវាត់ពីចង្កេះរបស់ខ្លួនរឹតកជនរងគ្រោះរហូតដាច់ខ្យល់ស្លាប់។
លោកបានឲ្យដឹងទៀតថា ក្រោយពីសម្លាប់ជនរងគ្រោះរួចហើយ ជនសង្ស័យមិនបានរត់គេចខ្លួនទៅណាទេ រហូតដល់ថ្ងៃទី ២៣ សីហា ទើបសមត្ថកិច្ចចាប់ខ្លួនបានតែម្តង៕
