បន្ទាយមានជ័យៈ បុរសម្នាក់បានរងរបួសដាច់ដៃម្ខាង បន្ទាប់ពីគាត់បានបញ្ជាគ្រឿងចក្រច្រូតស្រូវនៅលើដីស្រែមួយកន្លែងដែលស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្ដបន្ទាយមានជ័យ ហើយបានកិនចំគ្រាប់មីនតោន បណ្ដាលឲ្យផ្ទុះដែលករណីនេះបានកើតឡើងកាលពីរសៀលថ្ងៃចន្ទ។ នេះបើតាមការប្រាប់ឲ្យដឹងពីអាជ្ញាធរមូលដ្ឋាន។
លោក តុល សារិន មេឃុំអូរបីជាន់ដែលបានចុះទៅពិនិត្យទីតាំងដីស្រែខាងលើជាមួយក្រុមកម្លាំងសមត្ថកិច្ចចម្រុះស្រុកអូរជ្រៅក្រោយហេតុការណ៍ផ្ទុះមីនតោននោះ បានប្រាប់ភ្នំពេញប៉ុស្តិ៍នៅព្រឹកថ្ងៃអង្គារថា បុរសរងគ្រោះឈ្មោះ ជ្រុន ធឿន អាយុ ៣៨ ឆ្នាំមានទីលំនៅភូមិកុំក្រោម ឃុំឬស្សីក្រាំង ស្រុកមោងឫស្សី ខេត្ដបាត់ដំបង។ ជនរងគ្រោះ គឺជាម្ចាស់ និងជាអ្នកបើកបរគ្រឿងចក្រច្រូតស្រូវដែលត្រូវបានម្ចាស់ស្រែឈ្មោះ ប៊ុត ប៊ុនថន ជួលមកដើម្បីច្រូតកាត់ និងប្រមូលផលស្រូវលើផ្ទៃដីប្រមាណជាង ២ ហិកតានៅក្នុងតំបន់កើតហេតុនេះ។
លោក សារិន បានបញ្ជាក់ថា៖ «ការច្រូតកាត់នៅមិនទាន់រួចរាល់ផង ជនរងគ្រោះក៏បានបើកគ្រឿងចក្រកិនចំពីលើគ្រាប់មីនតោន ដែលជាកាកសំណល់នៃសង្គ្រាមកប់ក្នុងដីស្រែនោះបណ្ដាលឲ្យផ្ទុះឡើងប៉ើងគ្រឿងចក្រច្រូតស្រូវក្រឡាប់ផ្ងារជើង ហើយគាត់រងរបួសដាច់ដៃខាងស្ដាំត្រឹមគល់ក្លៀក និងមានរបួសជើង និងដងខ្លួនមួយចំនួនផងដែរ»។
លោក សារិន បានបន្តថា ក្រោយហេតុការណ៍គ្រោះថ្នាក់ដោយគ្រាប់មីននេះ បុរសជាម្ចាស់ស្រែបានជួយអន្តរាគមន៍នាំយកជនរងគ្រោះទៅកាន់មន្ទីរពេទ្យមួយក្នុងប្រទេសថៃ ដើម្បីជួយព្យាបាលរបួស។ ចំណែកឯម៉ាស៊ីនច្រូតស្រូវម៉ាកគូបូតា ពណ៌ស ត្រូវសមត្ថកិច្ចឲ្យម្ចាស់ស្រែរក្សាទុកនៅកន្លែងកើតហេតុដើម្បីត្រួតពិនិត្យ។
លោក សារិន ឲ្យដឹងថា ទឹកដីឃុំអូរបីជាន់ គឺជាអតីតតំបន់សមរភូមិប្រយុទ្ធដ៏ខ្លាំងក្លាមួយក្នុងអំឡុងទសវត្សរិ៍ឆ្នាំ ១៩៨០ ដល់ឆ្នាំ ១៩៩០ រវាងកម្លាំងឧទ្ទាមខ្មែរក្រហម និងកម្លាំងកងទ័ពរដ្ឋាភិបាល។ ថ្វីបើបច្ចុប្បន្នតំបន់នេះត្រូវបានប្រែក្លាយពីសមរភូមិប្រយុទ្ធមកជាដីស្រែកសិកម្មក្ដី ប៉ុន្តែប្រជាកសិករនៅតែជួបប្រឈមគ្រោះថ្នាក់ដោយសារគ្រាប់មីន និង គ្រាប់យុទ្ធភណ្ឌមិនទាន់ផ្ទុះ។
លោក សំ វីរៈ ប្រធានអង្គភាពកម្ចាត់មីនកម្ពុជាប្រចាំខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា ក្រុមការងារបោសសម្អាតមីន និងយុទ្ធភណ្ឌមិនទាន់ផ្ទុះបានទៅកាន់ទីតាំងនោះ ក្រោយពីទទួលបានសេចក្ដីរាយការណ៍ពីអាជ្ញាធរមូលដ្ឋាន ហើយនៅពេលនេះក្រុមការងារបានធ្វើការរុករកគ្រាប់មីន និង គ្រាប់យុទ្ធភណ្ឌមិនទាន់ផ្ទុះនៅលើដីស្រែនោះក្នុងទំហំផ្ទៃដី ៥០ ម៉ែត្រ ៤ ជ្រុង ជុំវិញទីតាំងកើតហេតុនោះ ប៉ុន្តែមិនប្រទះឃើញមានសញ្ញាណគ្រាប់មីននោះទេ។
លោក វីរៈ បានថ្លែងឲ្យដឹងទៀតថា៖ «យើងបានសន្និដ្ឋានថា ទីតាំងនេះគ្មានគ្រាប់មីនទៀតទេ»។
លោក វីរៈ ក៏បានអះអាងប្រាប់ឲ្យដឹងផងដែរថា ចាប់តាំងពីឆ្នាំ ២០០៦ មកទល់បច្ចុប្បន្ននេះអង្គភាពរបស់លោកបានបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះនៅលើផ្ទៃដីសរុបចំនួន ៨២៤០០២៦១ ម៉ែត្រការ៉េដោយបានរកឃើញ និងរំដោះចេញពីក្នុងដីនូវគ្រាប់មីនប្រឆាំងមនុស្សចំនួន ៥១ ០៩៤ គ្រាប់, មីនប្រឆាំងរថក្រោះចំនួន ៨៩៩ គ្រាប់ និងយុទ្ធភណ្ឌមិនទាន់ផ្ទុះចំនួន ៧១ ៣៩២ គ្រាប់រួមទាំងគ្រាប់កាំភ្លើងតូចៗចំនួន ៥ ១២៦ គីឡូក្រាមផងដែរ៕