កំពង់ចាមៈ បុរសម្នាក់ ដែលវាយសម្លាប់ប្រពន្ធ ត្រូវបានសមត្ថកិច្ចចាប់បញ្ជូនទៅសាលាដំបូងខេត្តកំពង់ចាម កាលពីថ្ងៃទី ២៥ ខែ មីនា ក្រោយពីបានប្រើហិង្សាលើប្រពន្ធ ដោយវាយនឹងដំបងរហូតនាងស្លាប់ នៅឃុំជយោ ស្រុកចំការលើ កាលពីថ្ងៃទី ២៣ ខែ មីនា។
លោក ចាន់ ហោ អនុប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពង់ចាម ប្រាប់ភ្នំពេញប៉ុស្តិ៍ ពីម្សិលមិញថា ករណីអំពើហិង្សាវាយសម្លាប់ប្រពន្ធខ្លួនឯងនេះជនសង្ស័យឈ្មោះច្រិច ដន អាយុ ៣៥ ឆ្នាំ រីឯស្រ្តីរងគ្រោះស្លាប់ឈ្មោះចន ថា អាយុ ៣៨ ឆ្នាំ ពួកគេទាំង ២ នាក់គ្មានកូនជាមួយគ្នាទេ។
លោក ចាន់ ហោ បញ្ជាក់ថា៖ «ជនសង្ស័យបានប្រើអំពើហិង្សាវាយទៅលើប្រពន្ធរបស់គាត់រហូតស្លាប់ ដូច្នេះគាត់ត្រូវតែប្រឈមចំពោះមុខច្បាប់»។
លោក មួង ម៉ង់ឌី នាយនគរបាលប៉ុស្តិ៍ឃុំជយោ ប្រាប់ដែរថា ស្រ្តីរងគ្រោះមានកូនប្រុសម្នាក់ជាមួយប្តីមុន ហើយបានគ្នាជាមួយប្តីក្រោយ (ជនសង្ស័យ) អត់មានកូនទេ។ ប៉ុន្តែទាំង ២ នាក់ប្តីប្រពន្ធនេះជាមនុស្សប្រមឹកដូចគ្នាហើយនៅពេលពួកគេផឹកស្រាស្រវឹងម្តងៗតែងតែឈ្លោះវាយតប់គ្នាផង។
លោកបញ្ជាក់ថា៖ «រឿងប្រើអំពើហិង្សាក្នុងគ្រួសាររបស់ពួកគេសមត្ថកិច្ចតែងតែហៅអប់រំដែរ តែជនសង្ស័យនៅតែមិនព្រមស្តាប់ ហើយករណីនេះកើតឡើងច្រើនដងតែអត់មានបញ្ហា»។
លោក ម៉ង់ឌី ប្រាប់តាមសម្តីសាក្សីថា មុនកើតហេតុថ្ងៃទី ២៣ ខែ មីនា នេះ ជនសង្ស័យនិងប្រពន្ធរបស់គាត់បានផឹកស្រាសរហូតស្រវឹងរៀងៗខ្លួន។ ដោយជនសង្ស័យស្រវឹងក៏បានរករឿងឈ្លោះជាមួយស្រ្តីរងគ្រោះនិងមានការជេរគ្នាទៅវិញទៅមកផង។ បន្ទាប់មកជនសង្ស័យបានយកដំបងឈើដែលមានទំហំប៉ុនកដៃមនុស្សចាស់មកវាយលើដងខ្លួន និងក្បាលស្រ្តីរងគ្រោះរហូតស្លាប់នៅផ្ទះតែម្តង។
ក្រោយពីវាយប្រពន្ធស្លាប់ហើយ ជនសង្ស័យបានព្យាយាមរត់គេចខ្លួន ដើម្បីកុំឲ្យសមត្ថកិច្ចចាប់។ ប៉ុន្តែដោយសារមានការរាយការណ៍ពីប្រជាពលរដ្ឋទាន់ពេលសមត្ថកិច្ចរបស់លោកក៏ចេញស្ទាក់ចាប់បាននៅយប់ថ្ងៃទី ២៣ ដដែល បន្ទាប់ពីបង្កហេតុបានប៉ុន្មានម៉ោងមក៕