ភ្នំពេញៈ ជនជាប់ចោទម្នាក់ក្នុងចំណោម ៤ នាក់ដែលពាក់ព័ន្ធនឹងករណីប្លន់បាញ់សម្លាប់ស្ត្រីម្នាក់នៅម្តុំពោធិ៍ចិនតុងកាលពីឆ្នាំ ២០១១ បានទទួលកំហុសក្នុងសវនាការតុលាការកំពូលកាលពីម្សិលមិញ ប៉ុន្តែមិនបានសុំឱ្យបន្ថយទោសដល់ខ្លួនទេ ខណៈពួកគេម្នាក់ៗត្រូវតុលាការថ្នាក់ក្រោមផ្តន្ទាទោសដាក់គុក ១ ជីវិត។
តាមកំណត់ហេតុតុលាការបានបង្ហាញថា កាលពីថ្ងៃទី ២៨ ខែសីហា ឆ្នាំ ២០១១ ស្ត្រីរងគ្រោះឈ្មោះ ជួន ធារ៉ា អាយុ ៤៨ ឆ្នាំបានជិះម៉ូតូចេញពីកន្លែងប្តូរលុយមួយនៅម្តុំផ្សារអូឡាំពិក ខណ្ឌចំការមនសំដៅទៅផ្ទះគាត់នៅម្តុំរង្វង់មូលចោមចៅដោយឌុបកូនប្រុសម្នាក់ផង។ ប៉ុន្តែពេលជិះដល់ភូមិព្រៃទា សង្កាត់ចោមចៅ ខណ្ឌដង្កោ ស្រាប់តែក្រុមជនជាប់ចោទបានប្លន់បាញ់ចំនួន ៣ គ្រាប់ តែផ្ទុះ ១ គ្រាប់ត្រូវចំដើមទ្រូងខាងឆ្វេងធ្លាយទៅក្រោយ និងឆក់យកស្បោងលុយជាង ១០០ លានរៀលគេចខ្លួនបាត់ ខណៈកូនប្រុសឈ្មោះ ផុន ឡាទី អាយុ ២១ ឆ្នាំមិនរងរបួស។ រីឯស្ត្រីរងគ្រោះបានស្លាប់នៅមន្ទីរពេទ្យកាល់ម៉ែត។
កំណត់ហេតុបង្ហាញដែរថាប៉ុន្មានថ្ងៃក្រោយមកសមត្ថកិច្ចបានចាប់ខ្លួនក្រុមជនជាប់ចោទ ៣ នាក់រួមមានឈ្មោះ ឡាយ វណ្ណៈ ហៅ វែង ហៅឥណ្ឌា អាយុ ៤២ ឆ្នាំ, សុភ័ក្រ ហៅ យ៉ាន់ ហៅក្របី អាយុ ៣២ ឆ្នាំ និង ផុន ដាទី។ ឯឈ្មោះ លឹម ទ្រី បានគេចខ្លួនបាត់ តែក្រោយតុលាការកាត់ក្ដីឈ្មោះនេះត្រូវបានសមត្ថកិច្ចចាប់ខ្លួននៅខេត្តបន្ទាយមានជ័យពាក់ព័ន្ធនឹងករណីប្លន់ទូមាស។
សំណុំរឿងនេះត្រូវសាលាដំបូងរាជធានីភ្នំពេញផ្ដន្ទាទោសទាំង ៤ នាក់កាលពីថ្ងៃទី ៣ ខែមេសា ឆ្នាំ ២០១២ ដោយដាក់គុកម្នាក់១ជីវិតចោទពីបទឃាតកម្មគិតទុកជាមុនតាមមាត្រា ២០០ នៃក្រមព្រហ្មទណ្ឌ និងបង្គាប់ឲ្យតាមចាប់ខ្លួនឈ្មោះ លឹម ទ្រី [ពេលមិនទាន់ចាប់បាន]។ ប៉ុន្តែរឿងនេះត្រូវបានក្រុមជនជាប់ចោទប្តឹងឧទ្ធរណ៍ តែត្រូវឧទ្ធរណ៍តម្កល់ទោសដដែល។ បន្ទាប់មកឈ្មោះ ឡាយ វណ្ណៈ បានប្ដឹងសារទុក្ខមកកំពូលទៀត។
ឡាយ វណ្ណៈ បានឆ្លើយក្នុងសវនាការតុលាការកំពូលកាលពីម្សិលមិញថា ការប្លន់នេះរូបគេមិនបានផ្ដួចផ្តើមគំនិតទេ ប៉ុន្តែមុនថ្ងៃកើតហេតុ បក្ខពួកគេទាំង ៣ នាក់បានប្រាប់ពីគម្រោងប្លន់។ លុះដល់ថ្ងៃទី ២៨ ខែសីហា ឆ្នាំ ២០១១ រូបគេ និងបក្ខពួកបានតាមស្ត្រីជនរងគ្រោះពីកន្លែងដូរលុយនៅផ្សារអូឡាំពិក មកដល់មុខពោធិ៍ចិនតុងក៏បាញ់ប្លន់ដោយកាំភ្លើងខ្លី រួចឆក់ស្បោងលុយជិះម៉ូតូគេចខ្លួន ប៉ុន្តែប៉ុន្មានថ្ងៃក្រោយមកក៏ត្រូវបានចាប់ខ្លួន។
ជនជាប់ចោទរូបនេះបានប្រាប់ចៅក្រមថា៖ «រឿងនេះខ្ញុំគ្មានចេតនា ឬប៉ងបាញ់សម្លាប់ជនរងគ្រោះទេ ប៉ុន្តែខ្ញុំត្រូវបក្ខពួកបបួលឲ្យចូលរួមជាមួយប៉ុណ្ណោះ។ ខ្ញុំដឹងពីកំហុសរបស់ខ្ញុំហើយ»។
លោកព្រះរាជអាជ្ញា វ៉េង ប៊ុនធឿន តំណាងមហាអយ្យការសន្និដ្ឋានថា យោងតាមការពិនិត្យលើអង្គហេតុបង្ហាញថា ជនជាប់ចោទឈ្មោះ ឡាយ វណ្ណៈ បានសារភាពតាំងពីនៅតុលាការថ្នាក់ក្រោម ហើយការសារភាពនេះវាស៊ីចង្វាក់នឹងចម្លើយរបស់កូនស្ត្រីរងគ្រោះផងដែរ។
លោកបានបញ្ជាក់ថា៖ «ដូច្នេះខ្ញុំយល់ឃើញថាសាលាឧទ្ធរណ៍ដែលបានតម្កល់សាលក្រមរបស់សាលាដំបូងរាជធានីភ្នំពេញនោះជាការត្រឹមត្រូវតាមច្បាប់ ហើយខ្ញុំសូមតម្កល់សាលដីកាសាលាឧទ្ធរណ៍ទុកជាបានការដដែល»។
លោក ពេជ្រ ផល្លាសម្បត្តិ មេធាវីចាត់តាំងការពារក្ដីជនជាប់ចោទបានសន្និដ្ឋានថា កូនក្តីលោកបានសារភាពកំហុសនៅគ្រប់ដំណាក់កាលតុលាការអស់ហើយ។ ហេតុដូច្នេះសូមតុលាការមេត្តាប្តូរបទចោទពីឃាតកម្មគិតទុកជាមុន មកជាបង្កហិង្សាបណ្តាលឲ្យជនរងគ្រោះមរណភាពវិញ។
ក្រោយជំនុំជម្រះលោក ឃឹម ប៉ុណ្ណ ប្រធានក្រុមប្រឹក្សាជំនុំជម្រះថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ៣ ធ្នូ ខាងមុខនេះ៕