ភ្នំពេញៈ បុរសម្នាក់ស្លាប់ភ្លាមៗនៅកន្លែងកើតហេតុ ដោយសារការបាញ់ប្រហារពីសន្ដិសុខដែលយាមធនាគារ ABA ក្នុងជម្លោះដេញវាយគ្នា កាលពីយប់ថ្ងៃទី ៦ មេសា នៅសង្កាត់ទឹកថ្លា ខណ្ឌសែនសុខ ហើយពីម្សិលមិញ មន្ត្រីនគរបាលរូបនោះកំពុងត្រូវបានសមត្ថកិច្ចសួរចម្លើយ និងគ្រោងបញ្ជូនទៅតុលាការថ្ងៃនេះ។
លោក ហួរ ម៉េងវ៉ាង អធិការនគរបាលខណ្ឌសែនសុខប្រាប់ពីម្សិលមិញថា ជនសង្ស័យឈ្មោះ ភឿង ភិរៈ អាយុ ៣៦ ឆ្នាំ ជាមន្ត្រីនគរបាលនៅអង្គភាពតម្រួតបទបញ្ជានៃអគ្គស្នងការដ្ឋាននគរបាលជាតិ។ ជនសង្ស័យជាសន្តិសុខយាមនៅធនាគារ ABA ក្នុងភូមិសាស្ត្រសង្កាត់ទឹកថ្លា ខណ្ឌសែនសុខ រាជធានីភ្នំពេញ។ លោកគ្រោងបញ្ជូនជនសង្ស័យទៅតុលាការថ្ងៃទី ៧ មេសា តែបើនីតិវិធីមិនទាន់ចប់គឺអាចបញ្ជូនជនសង្ស័យទៅតុលាការនៅថ្ងៃទី ៨ មេសា។
លោកថា៖ «ជនសង្ស័យគាត់អង្គុយយាមនៅមុខធនាគារទេ តែជនរងគ្រោះឈ្លោះគ្នាជាមួយបុរសម្នាក់ ហើយដេញវាយបុរសម្នាក់នោះរត់ទៅឱ្យគាត់ជួយ។ បន្ទាប់មកជនរងគ្រោះដកកាំបិតដេញចាក់ ហើយជនសង្ស័យក៏បាញ់ទៅ។ គាត់ បាញ់ត្រូវជនរងគ្រោះ ២ គ្រាប់»។
បើតាមលោកអធិការប្រាប់តាមសម្តីសាក្សី និងតាមរយៈឆែកមើលក្នុងកាមេរ៉ាសុវត្ថិភាពបំពាក់នៅមុខធនាគារ ABA នោះបង្ហាញថា មុនកើតហេតុ បុរសរងគ្រោះបានឈ្លោះគ្នាជាមួយបុរសម្នាក់ទៀត។ បន្ទាប់មកជនរងគ្រោះបានរត់ដេញ បុរសម្នាក់ ហើយបុរសនោះបានរត់ សំដៅមកជនសង្ស័យដែលកំពុងឈរយាមនៅមុខធនាគារ ABA បំណងឱ្យជួយ។ ប៉ុន្តែបន្ទាប់ពីជនរងគ្រោះដេញវាយបុរសដែលជាគូទំនាស់នោះមិនបានក៏បែរមក វាយ និងច្រានជនសង្ស័យវិញ ហើយជនរងគ្រោះបានកាន់កាំបិតចុងស្រួចសំដៅជនសង្ស័យតែម្តង។
លោកថា៖ «ខណៈបុរសរងគ្រោះ ភ្ជង់កាំបិត និងដើរសំដៅទៅជនសង្ស័យ គ្រានោះជនសង្ស័យបានបាញ់ចំនួន ៣ គ្រាប់ ហើយត្រូវចំខ្លួនចំនួន ២ គ្រាប់បណ្តាលឱ្យដួលស្លាប់នៅកន្លែងកើតហេតុតែម្តង»។
លោកបន្តថា ក្រោយកើតហេតុ បាញ់ប្រហារនេះ សមត្ថកិច្ចបានចុះទៅដល់កន្លែងកើតហេតុ ដោយមានលោក ម៉ូវ ម៉ានិត អភិបាលខណ្ឌសែនសុខរួមដំណើរជាមួយលោកផង រីឯជនសង្ស័យក៏មិនបានរត់គេចខ្លួនដែរ។ ជនសង្ស័យប្រាប់សមត្ថកិច្ចថា គាត់គ្មានបំណងបាញ់សម្លាប់ជនរងគ្រោះទេ ដំបូងគាត់គ្រាន់តែភ្ជង់កាំភ្លើងខ្លី ដើម្បីកំញើញជនរងគ្រោះតែប៉ុណ្ណោះ ប៉ុន្តែដោយជនរងគ្រោះស្ទុះមក គាត់ក៏បាញ់ ដើម្បីការពារខ្លួនទៅ។
មន្ត្រីនគរបាលខណ្ឌសែនសុខម្នាក់សុំមិនឱ្យបញ្ចេញឈ្មោះប្រាប់ថា ក្រោយកើតហេតុសមត្ថកិច្ចបានចុះឆែកមើលក្នុងកាមេរ៉ាសុវត្ថិភាពបង្ហាញថា ហេតុការណ៍នេះបង្កឡើងដោយក្មេង ២ ក្រុមឈ្លោះគ្នា។ ប៉ុន្តែអ្វីដែលគេឃើញក្នុងកាមេរ៉ា គឺជនរងគ្រោះ និងយុវជនម្នាក់រត់សំដៅទៅរកសន្តិសុខ [ជនសង្ស័យ] យាមធនាគារឱ្យជួយ ហើយគេឃើញជនរងគ្រោះវាយសន្តិសុខ រួចកាន់កាំបិតដើរចូលទៅបុរសសន្តិសុខនោះមុន។
មន្ត្រីរូបនោះថា៖ «បើតាមអ្វីដែលបានឃើញក្នុងកាមេរ៉ាសុវត្ថិភាព គឺជនរងគ្រោះជាអ្នកបង្កមុនទើបបុរស សន្តិសុខនោះបាញ់គាត់ទៅ»៕