.jpg)
បុរសវ័យចំណាស់ស្លាប់នៅក្នុងរោងជាងដំដែកដោយសារផ្ទុះគ្រាប់។ នគរបាល
ត្បូងឃ្មុំៈ បុរសជាងដំដែកអាយុ ៥៩ ឆ្នាំម្នាក់បានស្លាប់ និងក្មេងប្រុសម្នាក់របួសស្រាល នៅក្នុងភូមិ ៦៧ ឃុំថ្មពេជ្រស្រុកខេត្តត្បូងឃ្មុំ កាលពីថ្ងៃសៅរ៍កន្លងមកនេះដោយសារផ្ទុះគ្រាប់ ១២៥ មិល្លីម៉ែត្រ។
លោក ទឹម នាង នាយនគរបាលប៉ុស្តិ៍រដ្ឋបាលឃុំថ្មពេជ្រប្រាប់ភ្នំពេញប៉ុស្តិ៍ពីម្សិលមិញថា បុរសដែលស្លាប់នោះមានឈ្មោះ ភាព ផល អាយុ ៥៩ ឆ្នាំ បានយកគ្រាប់ ១២៥ មិល្លីម៉ែត្រ មកធ្វើកំណល់ដំដែក ពេលកំពុងដំបណ្ដាលឲ្យផ្ទុះ។
លោក នាង អះអាងថា គ្រាប់បានផ្ទុះត្រូវជនរងគ្រោះបែកសាច់ជាបំណែកៗពីត្រឹមក្បាលពោះមកក្រោមនៅសល់តែកំភួនជើងនិងប្រអប់ជើងប៉ុណ្ណោះ។ ឯចៅប្រុសរបស់គាត់ដែលកំពុងអង្គុយលេងទូរស័ព្ទដែលនៅចម្ងាយប្រហែល ៥ ម៉ែត្រពីកន្លែងកើតហេតុក៏ត្រូវរបួសផ្នែកក្បាលខាងក្រោយដែរតែរបួសស្រាល។
លោកប្រាប់ថា៖ «រឿងស្លាប់ដោយសារផ្ទុះគ្រាប់នេះសមត្ថកិច្ចរបស់ខ្ញុំធ្វើការចុះណែនាំដល់អ្នកភូមិក្នុងឃុំថ្មពេជ្រ ជាប្រចាំប៉ុន្តែនៅតែមានហេតុការណ៍នេះកើតឡើងទៀត»។
លោករំឭកតាមសម្តីប្រពន្ធរបស់ជនរងគ្រោះប្រាប់ថា ប្តីរបស់គាត់បានប្រកបរបរជាជាងដំដែកនេះអស់រយៈពេលជាង ១៥ ឆ្នាំ មកហើយ ហើយជនរងគ្រោះក៏តែងតែយកគ្រាប់ ១២៥ មិល្លីម៉ែត្រនេះធ្វើជាកំណល់ដែរតែមិនដែលជួបបញ្ហាអ្វីដែរ។
លោកប្រាប់ថា ក្រោយកើតហេតុស្នងការដ្ឋាននគរបាលខេត្តត្បូងឃ្មុំ បានស្នើខាងមន្រ្តីអាជ្ញាធរកម្ចាត់មីនប្រចាំខេត្តត្បូងឃុំឲ្យចុះទៅពិនិត្យពីមូលហេតុនៃការផ្ទុះនេះដោយមន្រ្តីជំនាញកម្ចាត់មីនខេត្តបានប្រាប់ថា គ្រាប់បែក ១២៥ មិល្លីម៉ែត្រនេះជាប្រភេទគ្រាប់បែកទម្លាក់ពីលើយន្តហោះកាលពីសម័យសង្គ្រាមហើយវាបានផ្ទុះម្តងហើយក៏ប៉ុន្តែគ្រាប់បែកនេះនៅបន្សល់ជាតិផ្ទុះទៀតនៅពេលមានការប៉ះទង្គិចវាខ្លាំង។
លោក ព្រីង បញ្ញារិទ្ធិ ប្រធានគ្រប់គ្រងអង្គភាពកម្ចាត់មីនប្រចាំខេត្តបាត់ដំបងបានថ្លែងកាលពីម្សិលមិញដែរថា ករណីគ្រាប់មិនទាន់ផ្ទុះនេះអាជ្ញាធរតែងតែធ្វើការផ្សព្វផ្សាយអប់រំដល់ប្រជាពលរដ្ឋនៅតាមសហគមន៍ និងនៅតាមសាលារៀនទៀត តែនៅមានពលរដ្ឋភាគតិចដែលគាត់មិនយកចិត្តទុកដាក់ក្នុងការប្រុងប្រយ័ត្ន។
លោកបានថ្លែងថា៖ «ប្រជាពលរដ្ឋភាគច្រើនបានយល់ដឹងតែភាគតិចដែលពួកគាត់មិនយល់ពីគ្រោះថ្នាក់នេះ។ អ្នកដែលមិនអនុវត្តតាមការផ្សព្វផ្សាយអប់រំគឺច្រើនតែពួកគាត់ធ្លាប់ធ្វើជាទាហាន»៕
