ភ្នំពេញៈ លោក William Guang ដែលរងបណ្ដឹងរបស់កញ្ញា ធី សុវណ្ណថា មានចម្ងល់ លើនីតិវិធីរបស់តុលាការ ខណៈដែលព្រះរាជអាជ្ញា បានស្នើសុំទៅចៅក្រមស៊ើបសួរ ឲ្យដាក់រូបលោកស្ថិតនៅក្រោមការឃុំខ្លួនបណ្ដោះអាសន្ន។
អ្នកប្រើប្រាស់ហ្វេសប៊ុកល្បីម្នាក់ ឈ្មោះ William Guang ត្រូវបានព្រះរាជអាជ្ញាចេញដីកាដាក់ឲ្យស្ថិតក្រោមការឃុំខ្លួនបណ្ដោះអាសន្នពាក់ព័ន្ធនឹងបណ្ដឹងរបស់កញ្ញា ធី សុវណ្ណថា ប៉ុន្តែលោក William និងមេធាវីរបស់លោកមានចម្ងល់លើនីតិវិធីរបស់តុលាការ ក្នុងការសម្រេចដូច្នេះ។
យោងតាមដីកាសន្និដ្នានបញ្ជូនរឿងឲ្យស៊ើបសួរ ចុះថ្ងៃទី ២៨ មីនា ២០១៨ ព្រះរាជអាជ្ញារង នៃអយ្យការអមសាលាដំបូងរាជធានីលោក សឿន មុនីរ័ត្ន បានដាក់ឲ្យឈ្មោះ សុខ សុវណ្ណ វឌ្ឍនាសារពង្សដែលមានហ្វេសប៊ុកឈ្មោះ William Guang ស្ថិតនៅក្រោមការត្រួតពិនិត្យរបស់តុលាការ និងឲ្យស្ថិតនៅក្រោមការឃុំខ្លួនបណ្ដោះអាសន្ន ក្នុងបទចោទបរិហារកេរ្តិ៍ និងញុះញង់ឲ្យមានការរើសអើង។
ការសម្រេចបែបនេះ ធ្វើឡើងតាមបណ្ដឹងរបស់កញ្ញា សុវណ្ណថា ដែលបានប្តឹងកាលពីថ្ងៃទី ៤ ខែធ្នូ ឆ្នាំ ២០១៧ ដោយចោទឈ្មោះ William ថា បានបរិហារកេរ្តិ៍នាង ពាក់ព័ន្ធនឹងការបង្ហោះតាមហ្វេសប៊ុក របស់ William កាលពីពាក់កណ្ដាលឆ្នាំ ២០១៦។
ព្រះរាជអាជ្ញាបានសេរសេរ ឈ្មោះ William បានហៅនាង សុវណ្ណថា ជា «បិសាច ជាមនុស្សអស់តម្លៃ ជាសិស្សគេចពីការប្រឡង» ហើយថា លោក William បានញុះញង់ឲ្យមានការរើសអើង ដោយបានប្រើពាក្យ «សមនឹងត្រូវមួយស្បែកជើង, គាំទ្រទេបើខ្ញុំផ្តាច់ផ្លូវនយោបាយ របស់នាងច្រម៉ក់នេះ? មានតែស្លាប់និងរត់ចោលមាតុភូមិ» ជាដើម។
លោក សឿន មុនីរ័ត្ន សរសេរថា ការនិយាយដូច្នេះ ធ្វើឲ្យប៉ះពាល់ដល់កញ្ញា សុវណ្ណថា និងអំពើញុះញង់ឲ្យមានការរើសអើងតាមបញ្ញត្តិមាត្រា ៣០៥ និង ៤៩៦។
លោក William បានប្រាប់ឲ្យដឹងកាលពីម្សិលមិញថា ក្នុងរយៈពេលមួយខែ ព្រះរាជអាជ្ញា បានកោះហៅលោកទៅបំភ្លឺ ២ ដង ហើយលើកចុងក្រោយ លោកបានដាក់ពាក្យសុំពន្យារការចូលខ្លួននៅថ្ងៃទី ៥ មីនា ដោយស្នើសុំចូលខ្លួនថ្ងៃក្រោយវិញ ដោយសារមានធុរៈទៅក្រៅប្រទេស ប៉ុន្តែតុលាការមិនបានឆ្លើយតបស្រាប់តែបានរុញសំណុំរឿងនេះ ទៅចៅក្រមស៊ើបតែម្តង ដែលធ្វើឲ្យលោកមានការភ្ញាក់ផ្អើល។
ពាក់ព័ន្ធនឹងការបង្ហោះ ហ្វេសប៊ុក ដែលនាំឲ្យមានពាក្យបណ្ដឹងនេះ លោក William បាននិយាយថា អ្វីដែលលោកនិយាយនោះដោយសារតែកញ្ញា សុវណ្ណថា ជាបុគ្គលសាធារណៈ ជាប្រធានអង្គការ និងជាសមាជិកគណបក្សប្រជាជនកម្ពុជា ចុះជួយស្រុកស្អាងខេត្តកណ្ដាល។
លោកថា ក្រោយពេលកញ្ញាសុវណ្ណថា បានដាក់ពាក្យប្តឹង លោកក៏បានដាក់ពាក្យប្តឹងតបដែរ ប៉ុន្តែព្រះរាជអាជ្ញារមិនចាត់ការបណ្តឹងរបស់លោក ប៉ុន្តែបែរជាចាត់ការតែបណ្ដឹងរបស់កញ្ញា សុវណ្ណថា។
លោកនិយាយថា៖«ព្រះរាជអាជ្ញា មិនដើរតាមបណ្ដឹងតបទេ ទទួលបណ្ដឹងហើយ តែដើរតែមួយចំហៀង ហើយចោទតែខ្ញុំ តែកញ្ញាធី សុវណ្ណថា ធម្មតា។ អ៊ីចឹងវាបំពានលើនីតិវិធីច្បាប់»។
ទាក់ទងនឹងការដាក់ឲ្យឃុំខ្លួនលោកបណ្ដោះអាសន្ននោះ លោកថ្លែងថា«ឃុំមិនឃុំស្ថិតនៅលើចៅក្រមស៊ើប ថាតើគាត់មានសុភវិនិច្ឆ័យកម្រិតណា? ថាតើគាត់ឃុំតាមព្រះរាជអាជ្ញា ដែលចាត់ការខុសនីតិវិធីឬយ៉ាងម៉េច?»។
លោក ហ៊ឹង សៅលីញ មេធាវីរបស់លោក William និយាយថា ការកោះហៅកូនក្តីលោក ធ្វើឡើងលឿនពេកហើយលោកបានដាក់ពាក្យពន្យាររួចហើយ។ «ការកោះហៅកូនក្ដីខ្ញុំ ធ្វើឡើងលឿនពេក ដោយមេធាវីទទួលបានការកោះហៅតែ ២ ដងគត់ នឹងបានដាក់ពាក្យពន្យារត្រឹមត្រូវមានភ្ជាប់នឹងឯកសារបញ្ជាក់ ព្រោះកូនក្ដីរវល់ពិនិត្យព្យាបាលសុខភាពនៅបរទេស។ នៅពេលមានបណ្ដឹងតប តុលាការ ត្រូវតែចាត់ការបណ្ដឹងឲ្យស្មើភាពគ្នា»។
លោកបន្តថា៖ «យើងអត់ដឹងថា ដើមបណ្ដឹងមានអ្វីបានជាជំរុញឲ្យតុលាការដំណើរការលឿនយ៉ាងនេះ។ តាមនីតិវិធី មិនសំខាន់ថា តុលាការកោះហៅ ប៉ុន្មានដងទេឲ្យតែភាគីដាក់សុំពន្យារពេលត្រឹមត្រូវតុលាការត្រូវពិចារណាឲ្យគេ»។
លោក William ដែលបានសិក្សាលើផ្នែកវិទ្យាសាស្ត្រនយោបាយ និងជាអ្នកជំនួញអចលនទ្រព្យម្នាក់បាននិយាយថា ការប្តឹងរបស់កញ្ញា ធី សុវណ្ណថា ជាការបង្អាក់សកម្មភាពនយោបាយរបស់លោក ជាពិសេស ធ្វើឡើងក្រោយពេលលោកទាមទារកោះត្រល់មកវិញ។
ភ្នំពេញ ប៉ុស្តិ៍ មិនអាចទាក់ទងសុំការបំភ្លឺពីកញ្ញា ធី សុវណ្ណថា បានទេកាលពីម្សិលមិញ៕