.jpg)
ជនសង្ស័យក្រោយពេលសមត្ថកិច្ចចាប់ខ្លួន។ រូបថត ហ្វេសប៊ុក
មណ្ឌលគិរីៈ បុរសជាជនសង្ស័យម្នាក់ត្រូវនគរបាលក្រុងសែនមនោរម្យ ខេត្ដរតនគិរីចាប់ខ្លួនកាលពីម្សិលមិញបន្ទាប់ពីបានសម្លាប់នារីជាសង្សារមិនស្លាប់ ហើយត្រូវនារីរងគ្រោះងើបពីសន្លប់លើគំនរសំរាមរត់ទៅប្តឹងសមត្ថកិច្ចនៅពេលទៀបភ្លឺម្សិលមិញក្នុងភូមិឡៅការ សង្កាត់សុខដុម ក្រុងសែនមនោរម្យ ខេត្តមណ្ឌលគិរី។
លោក ចេង ម៉ាប់ អធិការរងនគរបាលក្រុងសែនមនោរម្យប្រាប់កាលពីម្សិលមិញថា ជនសង្ស័យឈ្មោះ ឆុំ ដាវិត អាយុ ២៦ ឆ្នាំមានស្រុកកំណើតនៅខេត្តកំពង់ចាម ឯស្ត្រីរងគ្រោះឈ្មោះ ញ៉រ៉ា ស្រីនាង អាយុ ២៣ ឆ្នាំជាជនជាតិព្នង រស់នៅភូមិ-ឃុំខាងលើ។
លោករៀបរាប់ថារវាងជនសង្ស័យ និងនារីរងគ្រោះត្រូវជាសង្សារនឹងគ្នាហើយមុនពេលកើតហេតុនៅថ្ងៃទី ៦ ខែឧសភាជនសង្ស័យបានដឹកនារីរងគ្រោះតាមម៉ូតូទៅភ្នំដោះក្រមុំដែលស្ថិតនៅក្នុង ភូមិ-ឃុំ ខាងលើ។ នៅពេលនិយាយគ្នា នារីរងគ្រោះបានសុំបែកផ្លូវគ្នា ប៉ុន្តែជនសង្ស័យមិនព្រមទើបយកខ្សែកាបូបចេញពីហោប៉ៅខោរឹតកនាងតែម្តង។
លោកបានបន្តថា ជនសង្ស័យស្មានតែនារីរងគ្រោះស្លាប់ក៏ដឹកតាមម៉ូតូយកទៅប្លុងចោលនៅលើគំនរសំរាមមួយកន្លែងរហូតដល់ម៉ោងជាង ៤ ទៀបភ្លឺទើបនារីរងគ្រោះដឹងខ្លួន ហើយបានងើបដើរតាមផ្លូវក៏បានជួបប្រទះកម្លាំងសមត្ថកិច្ចដែលកំពុងល្បាត ក៏ប្ដឹងតែម្តង។
លោកបានបញ្ជាក់ថា៖ «ខ្សែកាបូបនោះបើតាមគេនិយាយប្រាប់គឺគេរើសបាន ហើយទុកសម្រាប់ធ្វើខ្សែចម្ពាមកៅស៊ូ។ តែដោយសារខឹងនឹងនារីរងគ្រោះសុំបែកផ្លូវគ្នា ទើបយកខ្សែនោះរឹតកទៅ។ ជនសង្ស័យស្មានតែនាងស្លាប់ក៏ដឹកទៅចោលនៅគំនរសំរាម»។
ទោះបីយ៉ាងណាលោក ហ៊ូ ប៉ារ៉ា ប្រធានការិយាល័យព្រហ្មទណ្ឌកម្រិតធ្ងន់ខេត្តប្រាប់ថាជនសង្ស័យត្រូវបានចាប់បញ្ជូនដល់ស្នងការដ្ឋាននគរបាលខេត្តមណ្ឌលគិរីហើយ ហើយព្រឹកថ្ងៃទី ៨ ខែឧសភានេះនឹងបញ្ជូនបន្តទៅតុលាការដើម្បីចាត់ការតាមច្បាប់៕
