.jpg)
ភ្នំពេញៈ បុរសជាប់ចោទម្នាក់ បានស្នើសុំចៅក្រមសាលាឧទ្ធរណ៍ឲ្យបន្ថយទោសកាលពីម្សិលមិញពាក់ព័ន្ធករណីលួចម៉ូតូ ១ គ្រឿងនៅភូមិ-ឃុំតាំងដូង ស្រុកបាទី ខេត្តតាកែវ កាលពីឆ្នាំ ២០១១ ខណៈជនរូបនេះមានសំណុំរឿងទាំងអស់ចំនួន ៥ ដែលមានទោសសរុប ១១ ឆ្នាំ រីឯគូកនម្នាក់ត្រូវពលរដ្ឋព្រួតគ្នាវ៉ៃស្លាប់។
ខណៈកំពុងអនុវត្តទោសក្នុងពន្ធនាគារបាន ៨ ឆ្នាំ ក្នុងទោសសរុប ១១ ឆ្នាំពាក់ព័ន្ធ ៥ សំណុំរឿងដែលសុទ្ធតែជាបទល្មើសលួច និងប្លន់នោះ ជនជាប់ចោទឈ្មោះ ហង្ស ចាន់ដារ៉ុង អាយុ ៤១ ឆ្នាំបានឆ្លើយប្រាប់ចៅក្រមនៅក្នុងអង្គសវនាការពីម្សិលមិញថា គាត់ត្រូវបានតុលាការខេត្តតាកែវចោទប្រកាន់ចំនួន ៥ សំណុំរឿងដោយក្នុង ១ សំណុំរឿងផ្តន្ទាទោសដាក់ពន្ធនាគារពី ៣ ទៅ ៤ ឆ្នាំ។ ប៉ុន្តែក្នុង ៥ សំណុំរឿងនោះ គឺគាត់ថា បានប្រព្រឹត្តតែ ១ ករណីទេ គឺពីបទលួចម៉ូតូ។ រីឯ ៤ សំណុំរឿងទៀតគាត់ពុំបានប្រព្រឹត្តដូចការចោទរបស់តុលាការទេ។ ប៉ុន្តែទោះជាយ៉ាងណាក៏គាត់បាននិងកំពុងអនុវត្តទោសក្នុងពន្ធនាគារសម្រាប់ទោសចោទប្រកាន់នោះអស់ជាង ៨ ឆ្នាំទៅហើយ។
បុរសជាប់ចោទបានប្រាប់ចៅក្រមថា កាលពីថ្ងៃទី ៥ ខែ តុលា ឆ្នាំ ២០១១ គាត់ និងមិត្តភក្តិម្នាក់ឈ្មោះខ្នាក់ បានជិះម៉ូតូឌុបគ្នា។ លុះជិះដល់ចំណុច ១ ក្នុងភូមិ-ឃុំតាំងដូង ស្រុកបាទីខេត្តតាកែវ ក៏បានឃើញម៉ូតូ ១ គ្រឿងដែលម្ចាស់បញ្ឈរទុកក្បែរផ្ទះ។ ពេលនោះខ្លួន (ហង្សចាន់ដារ៉ុង) ធ្វើជាឈប់ម៉ូតូជុះនោម ហើយឈ្មោះខ្នាក់ បានទៅលួចម៉ូតូដែលគេបញ្ឈរទុកនោះបម្រុងបញ្ឆេះជិះគេចខ្លួន តែត្រូវម្ចាស់ម៉ូតូឃើញ ហើយក៏ស្រែកឆោឡោផ្អើលដល់ពលរដ្ឋនាំគ្នាដេញឈ្មោះខ្នាក់និងបានវ៉ៃសម្លាប់។ រីឯគាត់ដោយសារភ័យខ្លាចគេវ៉ៃសម្លាប់ ក៏ជិះម៉ូតូចូលប៉ុស្តិ៍នគរបាលទៅ។
ជនជាប់ចោទថា៖ «រឿងនេះត្រូវតុលាការខេត្តតាកែវបើកសវនាការនិងប្រកាសសាលក្រមនៅថ្ងៃទី ២៧ ខែ មិថុនា ឆ្នាំ ២០១១ ផ្តន្ទាទោសខ្ញុំ ២ ឆ្នាំ ចោទបទលួចមានស្ថានទម្ងន់ទោសហើយទោសនេះខ្ញុំព្រមទទួលយក។ ប៉ុន្តែខ្ញុំសុំដល់តុលាការសាលាឧទ្ធរណ៍ឲ្យបន្ថយទោសដល់ខ្ញុំផងព្រោះម្តាយខ្ញុំចាស់ជរាហើយ។ ម្យ៉ាងខ្ញុំក៏ជាប់ឃុំបានជាង ៨ ឆ្នាំ»។
នៅក្នុងសវនាការនេះដែរ លោក ជុំ សែនសទ្ធា តំណាងមហាអយ្យការបានសន្និដ្ឋានថា សំណុំរឿងនេះជនជាប់ចោទបានសារភាពទទួលយកតែ ១ បទល្មើសទេ ឯចំពោះបទល្មើស ៤ ទៀតគាត់មិនទទួលយកទេ។
ហេតុដូច្នេះលោកស្នើសុំដល់ក្រុមប្រឹក្សាជំនុំជម្រះពិនិត្យរាល់ឯកសាររបស់គាត់ដែលពាក់ព័ន្ធបទចោទទាំង ៥ ខាងលើឡើងវិញ។
ដោយឡែកលោក គិន វិបុល ដែលជាមេធាវីការពារសិទ្ធិឲ្យជនជាប់ចោទបានសន្និដ្ឋានថា សំណុំរឿងរបស់កូនក្តីលោក គឺលោកបានការពារតាំងពីនៅសាលាដំបូងខេត្តតាកែវមកម្ល៉េះ។ដូច្នេះមានបទចោទខ្លះ គឺសមត្ថកិច្ចនគរបាលចោទគាត់ ខណៈគាត់កំពុងជាប់ឃុំនៅក្នុងពន្ធនាគារក៏មាន។
លោកបញ្ជាក់ក្នុងអង្គសវនាការដែរថា៖ «រឿងខ្លះដែលតុលាការចោទប្រកាន់កូនក្តីរបស់ខ្ញុំគឺគ្មានភ័ស្តុតាង និងសាក្សីបញ្ជាក់នោះទេហើយក្នុងសំណុំរឿងលួចមានស្ថានទម្ងន់ទោសនេះសូមក្រុមប្រឹក្សាជំនុំជម្រះជួយសម្រាលទោសតាមការស្នើសុំរបស់កូនក្តីខ្ញុំផង»។
ក្រោយជំនុំជម្រះ លោក ចៅក្រម សំរិទ្ធិ សុផល ប្រធានក្រុមប្រឹក្សាជំនុំជម្រះបានថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ៩ ខែមេសា ខាងមុខ៕
