The Phnom Penh Post Search

Search form




Logo of Phnom Penh Post newspaper Phnom Penh Post - បុរស​វៀតណាម បង្ហោះ​ដ្រូន​ត្រូវ​ចាប់​បញ្ជូន​ទៅ​ក្រសួង​មហាផ្ទៃ

បុរស​វៀតណាម បង្ហោះ​ដ្រូន​ត្រូវ​ចាប់​បញ្ជូន​ទៅ​ក្រសួង​មហាផ្ទៃ

Content image - Phnom Penh Post
ស្លាកបម្រាមបង្ហោះ្រដូន នៅម្ដុំវិមានឯករាជ្យជិតភូមិគ្រឹះលោកនាយករដ្ឋមន្ត្រី។ ហុង មិនា

បុរស​វៀតណាម បង្ហោះ​ដ្រូន​ត្រូវ​ចាប់​បញ្ជូន​ទៅ​ក្រសួង​មហាផ្ទៃ

ភ្នំពេញៈ នគរបាល​ខណ្ឌ​ដូនពេញ​រាជធានី​ភ្នំពេញ​បាន​ឃាត់​ខ្លួន​បុរស​ជនជាតិ​វៀតណាម​ម្នាក់ ​បន្ទាប់​ពី​បាន​បង្ហោះ​ឧបករណ៍​ដ្រូន​ បំពាក់​ដោយ​កាំមេរ៉ា​ថត​រូប​ មាន​បញ្ជា​​តេឡេ​កុម្ម៉ង់ កាលពី​ថ្ងៃ​អាទិត្យ​លើ​ភូមិគ្រឹះ​លោក​នាយក​រដ្ឋមន្ត្រី ហ៊ុន សែន ​ដែល​ជា​តំបន់​ហាម​ឃាត់ ​និង​បាន​បញ្ជូន​ឲ្យ​នាយកដ្ឋាន​ប្រឆាំង​បទ​ល្មើស​បច្ចេកវិទ្យា​ដើម្បី​ស៊ើប​អង្កេត​បន្ត​។

តាម​សេចក្តី​រាយការណ៍​នៅ​លើ​គេហ​ទំព័រ​អគ្គ​ស្នងការ​នគរបាល​ជាតិ​បាន​ឲ្យ​ដឹង​ថា ជន​សង្ស័យ​មាន​ឈ្មោះ ​LE NGOC TU ​អាយុ​ ២៧ ឆ្នាំ ជនជាតិ​វៀតណាម​ជា​អ្នក​ទេសចរ​កាន់​លិខិត​ឆ្លងដែន​លេខ​ N ​ស្នាក់-​នៅ​សណ្ឋាគារ LE BOO HOTEL ស្ថិត​នៅ​ផ្លូវ ​១៧៤​ សង្កាត់​ផ្សារ​ថ្មី​ទី​៣ ខណ្ឌ​ដូនពេញ ​រាជធានី​ភ្នំពេញ។

លោក ជួប សុគន្ធ នាយ​ប៉ុស្តិ៍​នគរបាល​សង្កាត់​ចតុមុខ​ក្នុង​ខណ្ឌ​ដូនពេញ​បាន​ប្រាប់​ភ្នំពេញ​ប៉ុស្តិ៍​កាល​ពី​ម្សិលមិញ​ថា ជន​សង្ស័យ​ត្រូវ​បាន​ឃាត់​ខ្លួន​នៅ​វេលា​ម៉ោង​ជាង ​១ ​រសៀល​ហើយ​ត្រូវ​​បាន​បញ្ជូន​​ភ្លាមៗ​ទៅ​នាយកដ្ឋាន​ប្រឆាំង​បទ​ល្មើស​បច្ចេក​វិទ្យា ដើម្បី​​ស៊ើប​អង្កេត​បន្ត។ លោក​បន្តថា យើង​នៅ​មិន​ទាន់​ដឹង​ថា ​រូប​គេ មាន​ជាប់​ពាក់ព័ន្ធ​នឹង​បទ​ល្មើស ​និង​មាន​ចេតនា​អ្វី​ក្នុង​ការ​បង្ហោះ​ដ្រូន​នោះ​ទេ ដោយ​រង់ចាំ​ការ​ស៊ើប​អង្កេត​របស់​ជំនាញ​។

លោក​បញ្ជាក់​ថា៖ «គាត់​ឈរ​បញ្ជា​នៅ​កែង​វត្ត​លង្ការ ហើយ​ដ្រូន​ហ្នឹង​វា​មក​សំកាំង​នៅ​លើ​ផ្ទះ​សម្តេច ដែល​យើង​បាន​ដាក់​ស្លាក​ហាម​ឃាត់​រួច​ហើយ។ នៅ​ពេល​សួរ​គាត់ៗ​ឆ្លើយ​ថា​អត់​ដឹង ព្រោះ​ទើប​នឹង​មក​កម្ពុជា មិន​បាន​មើល​ស្លាក​សញ្ញា។
បើ​តាម​លោក សុគន្ធ នៅ​ពេល​ឃាត់​ខ្លួន​ជន​សង្ស័យ​រូប​នោះ ពុំ​មាន​ភាគី​ពាក់ព័ន្ធ​ណា​ផ្សេង​នោះ​ទេ។

ភ្នំពេញ​ប៉ុស្តិ៍​មិន​អាច​សុំ​ការ​អត្ថាធិប្បាយ​ពី​លោក ជា ពៅ ប្រធាន​នាយកដ្ឋាន​ប្រឆាំង​បទល្មើស​បច្ចេកវិទ្យា​នៃ​អគ្គ​ស្នងការដ្ឋាន​នគរបាល​ជាតិ​បាន​ទេ កាលពី​ម្សិលមិញ ព្រោះ​ទូរស័ព្ទ​ចូល​គ្មាន​អ្នក​ទទួល។

ប៉ុន្តែ​លោក សោម ស៊ីនីន អនុ​ប្រធាន​នាយកដ្ឋាន​ប្រឆាំង​បទ​ល្មើស​បច្ចេកវិទ្យា បាន​ប្រាប់​ភ្នំពេញ​ប៉ុស្តិ៍​ថា បុរស​វៀតណាម​រូប​នេះ ត្រូវ​បាន​បញ្ជូន​មក​ដល់​នាយកដ្ឋាន​ហើយ និង​ស្ថិត​ក្នុង​ការ​ស៊ើប​អង្កេត តែ​លោក​មិន​អាច​បញ្ជាក់​អ្វី​បន្ថែម​បាន​ទេ ព្រោះ​មាន​តែ​ប្រធាន​អង្គភាព​ប៉ុណ្ណោះ​ទើប​អាច​បង្ហាញ​បាន។

លោក​បាន​បញ្ជាក់​ថា៖ «ជា​ទូទៅ​នៅ​តំបន់​ហាម​ឃាត់ ​យើង​បាន​ដាក់​ស្លាក​ហើយ ​ហាម​បង្ហោះ​ដ្រូន​ដល់​ពេល​មាន​បង្ហោះ​ អ៊ីចឹង​ខាង​មូលដ្ឋាន​គាត់​ឃាត់​ដើម្បី​យក​មក​ជំនាញ។ ជំនាញ​នឹង​ពិនិត្យ​មើល​​កោសល្យ​វិច័យ តើ​គាត់​មាន​បាន​ប្រព្រឹត្ត​អ្វី​ខ្លះ?»។

តាម​របាយការណ៍​របស់​អគ្គ​ស្នងការ​នគរបាល​ជាតិ បាន​ឲ្យ​ដឹង​ថា ​ក្រោយ​ឃាត់​ខ្លួន​ជន​សង្ស័យ​រូប​នេះ បាន​រក​ឃើញ​វត្តុតាង​មួយ​ចំនួន ដូច​ជា​ដ្រូន ម៉ាក dJI ពណ៌​ប្រផេះ​បិទ​ស្កុត ចំនួន ​១ ​គ្រឿង (មិន​មាន​មេម៉ូរី) ​ទូរស័ព្ទ​ដៃ ​Mi ពណ៌​ខ្មៅ​ ១ គ្រឿង កាមេរ៉ា​មាន​ដង GoPro 7 ពណ៌​ខ្មៅ ១ គ្រឿង​មាន​ដង ថ្ម​ចំនួន ៣ ដុំ ជើង​ទម្រ​កាមេរ៉ា ១ តេឡេ​សម្រាប់​បញ្ជា​ម៉ាក dji ពណ៌​ប្រផេះ​ ១ គ្រឿង លេន ៦ គ្រាប់ មេក្រូ​ចំនួន ១ ពណ៌​ប្រផេះ Camara Sony ចំនួន ១ គ្រឿង​ពណ៌​ខ្មៅ ដុំ​សាក​ថ្ម​ចំនួន ១ ពណ៌​ខ្មៅ​ ម៉ាក AUKEY កាបូប​សម្រាប់​ដាក់​ឧបករណ៍​ដ្រូន​ពណ៌​ខ្មៅ ១ លិខិត​សម្គាល់​ទោចក្រ​យានយន្ត ​១ ​សន្លឹក​ និង​លិខិត​ឆ្លងដែន​ចំនួន ​១ ​ដែល​​មាន​លេខ​ N៕

អត្ថបទគួរចាប់អារម្មណ៍