.jpg)
បុរសជនជាតិឡាវ ២ នាក់ ត្រូវបានចាប់ខ្លួនជាមួយវត្ថុតាងគ្រឿងញៀន។ រូបថត នគរបាល
ស្ទឹងត្រែង/ស្វាយរៀង៖បុរសជនជាតិឡាវ ២ នាក់ ត្រូវបានបញ្ជូនទៅកាន់សាលាដំបូងខេត្តស្ទឹងត្រែងនៅថ្ងៃអាទិត្យនេះក្រោយពីចាប់ខ្លួន កាលពីថ្ងៃទី ១១ ខែកក្កដា នៅក្នុងឃុំអូរស្វាយ ស្រុកបុរីអូស្វាយសែនជ័យ ខេត្តស្ទឹងត្រែងព្រមទាំងរឹបអូសវត្ថុតាងគ្រឿងញៀនប្រភេទមេតំហ្វេតាមីនជិត ៦ គីឡូក្រាម។ ករណីគ្រឿងញៀនដូចគ្នានេះដែរបុរសជនជាតិវៀតណាមម្នាក់ក៏ត្រូវបានជាប់ឃុំនៅពន្ធនាគារខេត្តស្វាយរៀងពាក់ព័ន្ធគ្រឿងញៀនជាង ១១គីឡូក្រាម។
លោក ចែម ផានិត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តស្ទឹងត្រែងបានឲ្យដឹងនៅថ្ងៃនេះដែរថា ជនសង្ស័យ ទី១-ឈ្មោះ ស៊ូ បាន់ ភេទប្រុស អាយុ ៣២ ឆ្នាំ ជនជាតិ ឡាវ មានលំនៅ ភូមិណាស៊ែងខាំ ស្រុកសៃ ខេត្តឧត្តមសៃ ប្រទេសឡាវ និងឈ្មោះ ចាន់ ឌី ភេទប្រុស អាយុ ៣១ ឆ្នាំ ជនជាតិឡាវ មានទីលំនៅ ភូមិភាងញ៉ា ស្រុកហ៊ុន ខេត្តឧត្តមសៃប្រទេសឡាវ។
លោក ផានិត ថ្លែងថា៖ «ទាំងជនសង្ស័យទាំងវត្ថុតាងគ្រឿងញៀនខាងសមត្ថកិច្ចរបស់ខ្ញុំបញ្ជូនទៅតុលាការខេត្តហើយនៅរសៀលថ្ងៃនេះ (ថ្ងៃអាទិត្យ) ដើម្បីឲ្យច្បាប់ចាត់ការបន្តទៀត»។
ពាក់ព័ន្ធនឹងបទល្មើសគ្រឿងញៀននេះដែរកាលពីថ្ងៃទី ១១ ខែ កក្កដា ឆ្នាំ ២០២០ តុលាការខេត្តស្វាយរៀងបានចោទប្រកាន់និងឃុំខ្លួនបុរសជនជាតិវៀតណាមម្នាក់ករណីជួញដូរគ្រឿងញៀនមេតំហ្វេតាមីន និងថ្នាំញៀនប្រភេទកេតាមីនសរុបចំនួនជិត ១១ គីឡូក្រាម។
លោក កាន កេន ប្រធានការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តស្វាយរៀង បានឲ្យដឹងនៅថ្ងៃនេះថា ជនសង្ស័យឈ្មោះ ង្វៀង ហុងហ្វុក អាយុ ៣១ ឆ្នាំ ត្រូវចៅក្រមស៊ើបសួរលោក ឌីន ស៊ីវុទ្ធី ចោទប្រកាន់និងឃុំខ្លួននៅពន្ធនាគារខេត្តស្វាយរៀងហើយពីថ្ងៃទី ១១ កក្កដា បន្ទាប់ពីត្រូវបានបចាប់ខ្លួននៅចំណុចវាលស្រែក្នុងភូមិតាបឹប សង្កាត់-ក្រុងបាវិត ខេត្ត ស្វាយរៀង កាលពីវេលាម៉ោងជាង ១០ យប់ថ្ងៃទី ៨ កក្កដា ដែលជនសង្ស័យដឹកគ្រឿងញៀនតាមម៉ូតូ ១ គ្រឿង បម្រុងឆ្លងដែនចូលប្រទេសវៀតណាម។
លោក កេន បានឲ្យដឹងថាក្រោយឃាត់ខ្លួនជនសង្ស័យ សមត្ថកិច្ចឆែកឆេរឃើញដុំប្លាស្ទិកបិទជិតចំនួន ១១ ដុំ ដែលមានថ្នាំញៀនប្រភេទមេតំហ្វេតាមីនទម្ងន់ ៥.៨៤៦ ក្រាម និងថ្នាំញៀនប្រភេទកេតាមីនទម្ងន់ ៥.០០៧ ក្រាម៕
