.jpg)
បុរសអាមេរិកដែលត្រូវបានតុលាការចោទប្រកាន់ និងត្រូវបានឃុំខ្លួន។ នគរបាល
សៀមរាបៈ បុរសទេសចរណ៍ជនជាតិអាមេរិកម្នាក់ឈ្មោះ Cline Rugh James ត្រូវបានសាលាដំបូងខេត្តសៀមរាប សម្រេចចោទប្រកាន់ និងបានបញ្ជូនទៅឃុំខ្លួនបណ្តោះអាសន្ននៅពន្ធនាគារកាលពីល្ងាចម្សិលមិញ ពីបទប្រព្រឹត្តអំពើអាស ប្រឆាំងនឹងអនីតិជនអាយុក្រោម ១៥ ឆ្នាំ។ នេះបើតាមលោក យិន ស្រាង អ្នកនាំពាក្យសាលាដំបូងខេត្តសៀមរាប។
សមត្ថកិច្ចបានចាប់ឃាត់ខ្លួនជនជាតិអាមេរិករូបនេះ កាលពីថ្ងៃទី ២០ ខែ ឧសភា និងបានបញ្ជូនទៅតុលាការ កាលពីថ្ងៃម្សិលមិញ ដោយសមត្ថកិច្ចអះអាងថា ជនបរទេសរូបនេះ បានប្រព្រឹត្តអំពើអនាចាលើអនីតិជនអាយុក្រោម ១៥ ឆ្នាំ ចំនួន ៤ នាក់។
លោក យិន ស្រាង បានប្រាប់ភ្នំពេញប៉ុស្ដិ៍ កាលពីម្សិលមិញថា ជនសង្ស័យត្រូវបាននគរបាលបញ្ជូនមកដល់តុលាការ ដើម្បីឱ្យព្រះរាជអាជ្ញាធ្វើការសាកសួរនៅព្រឹកថ្ងៃម្សិលមិញ ហើយបានសម្រេចធ្វើការចោទប្រកាន់ និងបញ្ជាឲ្យសមត្ថកិច្ចបញ្ជូនយកទៅឃុំខ្លួននៅពន្ធនាគារបណ្តោះអាសន្ននៅពេលល្ងាច។
ចំណែកលោក ជា ហេង ប្រធានការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តសៀមរាបក៏បានថ្លែងកាលពីម្សិលមិញដែរថា តាមចម្លើយរបស់កុមារីរងគ្រោះ គឺជនជាតិអាមេរិករូបនេះ បានប្រព្រឹត្តបទល្មើសតាំងពីឆ្នាំ ២០១៨ នៅពេលរូបគេមកដើរទេសចរណ៍នៅកម្ពុជា។
លោកថា៖ «មានក្មេងស្រី ៤ នាក់ មានអាយុចាប់ពី ១២ ដល់ ១៤ ឆ្នាំ ដែលគាត់រំលោភបំពាន។ ទោសទណ្ឌ វាអាចជាប់ពី ១ ឆ្នាំទៅ ៣ ឆ្នាំ និងពិន័យជាប្រាក់ពី ២ លានរៀលទៅ ១០ លានរៀល»។
ជាមួយគ្នានេះ តាមគេហទំព័រអគ្គស្នងការដ្ឋាននគរបាលជាតិ បានចុះផ្សាយនៅថ្ងៃទី ២១ ឧសភា ថា ការឃាត់ខ្លួនជនបរទេសរូបនេះ គឺធ្វើឡើងបន្ទាប់ពីនគរបាលប្រឆាំងការជួញដូរមនុស្ស និងការពារអនីតិជន បានទទួលពាក្យបណ្ដឹងពីឪពុក ម្ដាយរបស់កុមារីរងគ្រោះចំនួន ២ នាក់ ហើយបើតាមការឆ្លើយបំភ្លឺពីកុមារីទាំង ២ នាក់នោះ បានបញ្ជាក់ថា ជនសង្ស័យបាននាំពួកគេពីតំបន់ផាប់ស្ទ្រីតទៅកាន់កន្លែងស្នាក់នៅរបស់ជននេះ រួចហើយបានឱ្យពួកគេប្រើដៃ ដើម្បីជួយសម្រេចកាម និងក្រោយមកបានផ្ដល់ប្រាក់ចំនួន ១២០ ដុល្លារ ឲ្យពួកគេ។ កុមារីទាំង ២ នាក់ បានអះអាងថា ជនជាតិអាមេរិករូបនេះ បានឱ្យពួកគេប្រើដៃដើម្បីសម្រេចកាមនេះបានចំនួន ៣ ដង។
ទោះជាយ៉ាងណា បើតាមរបាយការណ៍ពីការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តសៀមរាប ដែលបានកោះហៅជនបរទេសរូបនេះមកសួរនាំឱ្យដឹងថា ជនសង្ស័យបានឆ្លើយបដិសេធ ចំពោះការចោទ ប្រកាន់ពីកុមារីទាំង ២ នាក់នេះ និងបានអះអាងថា រូបគេគ្រាន់តែស្គាល់ក្មេងស្រីទាំងនេះធម្មតា និងធ្លាប់ឱ្យលុយចាយប៉ុណ្ណោះ ៕
