ភ្នំពេញ: បុរសម្នាក់ដែលមានអាយុប្រមាណ ៤០ ឆ្នាំរងរបួសដាច់ប្រអប់ជើងឆ្វេង ដោយសារជាន់មីនពេលកំពុងកាប់ព្រៃក្នុងចម្ការកាលពីថ្ងៃទី ២១ ខែវិច្ឆិកា ស្ថិតនៅភូមិស្រះទឹក សង្កាត់អូរស្មាច់ ក្រុងសំរោង ខេត្តឧត្ដរមានជ័យ។
លោក ហម ភិរម្យ អធិការនគរបាលក្រុងសំរោងបានថ្លែងពីម្សិលមិញថា បុរសដែលរងរបួសធ្ងន់នោះ គាត់ធ្វើចម្ការក្បែរផ្ទះគាត់ជារៀងរាល់ឆ្នាំ ប៉ុន្ដែមិនដែលមានបញ្ហាអ្វីកើតឡើងទេ ហើយក៏មិនបានដឹង ឬសង្ស័យថា មានគ្រាប់មីននៅសេសសល់ពីសម័យសង្គ្រាមនោះដែរ។
លោក ភិរម្យ បានថ្លែងថា៖ «នៅតំបន់យើងនេះកន្លងមកមិនដែលមានបញ្ហាផ្ទុះគ្រាប់មីនគ្រោះថ្នាក់បែបនេះទេ ទើបលើកទី១ ព្រោះអាជ្ញាធរយើងធ្លាប់បានផ្សព្វផ្សាយអំពីគ្រោះថ្នាក់នៃការប៉ះពាល់គ្រាប់មីនជាច្រើនលើកហើយ»។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានឱ្យដឹងផងដែរថា រយៈចុងក្រោយនេះជនរងគ្រោះដោយសារគ្រាប់មីនបានកើតមានជាបន្តបន្ទាប់នៅតាមបណ្ដោយព្រំដែនកម្ពុជា និងថៃ បណ្ដាលឱ្យមានជនរងគ្រោះស្លាប់ និងពិការដៃជើង បើទោះបីសកម្មភាពធ្វើការផ្សព្វផ្សាយវិធានការពីតំបន់ងាយរងគ្រោះថ្នាក់ដោយសារគ្រាប់យុទ្ធភណ្ឌមិនទាន់ផ្ទុះជាច្រើនមកហើយក៏ដោយ។
ទោះយ៉ាងណាក៏ដោយលោក ហេង រតនា បានបញ្ជាក់ថា ទីភ្នាក់ងារសហប្រតិបតិ្តការអន្តរជាតិជប៉ុន (JICA) បានឱ្យដឹងកាលនៅក្នុងជំនួបមួយកាលពីពេលថ្មីៗនេះថា JICA នឹងបន្តគាំទ្រអង្គភាពស៊ីម៉ាក់តាមរយៈការជួយជំនួយបច្ចេកទេសទាក់ទងការរៀបចំផែនការកាត់បន្ថយគ្រាប់មិនទាន់ផ្ទុះរហូតដល់ឆ្នាំ ២០២៥។
លោកបញ្ជាក់ថា៖ «ខ្ញុំបានជជែកជាមួយភាគីជប៉ុនច្រើនគឺក្នុងគោលបំណង យើងឱ្យគាត់ជួយផ្ដល់ជាគ្រឿងបន្លាស់គ្រឿងចក្ររាវមីនបន្ថែមទៀត ដើម្បីប្ដូរគ្រឿងបន្លាស់ថ្មី ព្រោះកន្លងមកគ្រឿងចក្រយើងបានប៉ះជាមួយមីន ហើយក៏ខូចខាត បាក់បែក អ៊ីចឹងយើងត្រូវការគ្រឿងបន្លាស់ថ្មីមកផ្លាស់ប្ដូរ ដើម្បីអាចប្រតិបត្តិការទៅមុខទៀត»។
តាមរបាយការណ៍អាជ្ញាធរមីនបានឱ្យដឹងថាក្នុងរយៈពេល ១០ ខែចុងក្រោយនេះជនរងគ្រោះស្លាប់ដោយសារមីន និងសំណល់ជាតិផ្ទុះពីសង្គ្រាមមាន ៤១ ករណីបណ្តាលឱ្យមនុស្សស្លាប់ និងរបួស ៥៥ នាក់។ តួលេខនេះមានការថយចុះ បើធៀបកាលពីឆ្នាំមុនក្នុងរយៈពេលដូចគ្នាមាន ៤៨ ករណី មនុស្សស្លាប់ និងរបួសចំនួន ៧១ នាក់៕