.jpg)
ព្រៃវែងៈ មន្ត្រីនគរបាលបានឲ្យដឹងថា បុរសអាយុ ៧៣ ឆ្នាំម្នាក់បានស្លាប់នៅពេលដែលគាត់កំពុងដុតស្មៅសម្អាតចម្ការស្វាយរបស់គាត់ស្ថិតនៅភូមិព្រែកតារ័ត្ន ឃុំកំពង់ប្រាំង ស្រុកពារាំង ខេត្តព្រៃវែងកាលពីម៉ោង ៤ រសៀលថ្ងៃទី ២៤ ខែមីនា ឆ្នាំ ២០២០។
លោក ពៅ ដានី នាយនគរបាលប៉ុស្តិ៍កំពង់ប្រាំងបានប្រាប់ភ្នំពេញប៉ុស្តិ៍នៅព្រឹកថ្ងៃពុធថា បុរសរងគ្រោះឈ្មោះ ចាន់ អឿន អាយុ ៧៣ ឆ្នាំជាប្រជាកសិករ រស់នៅភូមិព្រែកតារ័ត្ន។
លោក ដានី បានថ្លែងដោយយោងតាមការបញ្ជាក់ពីស្ត្រីជាប្រពន្ធជនរងគ្រោះ ឈ្មោះ ផែង មឺន អាយុ ៦៨ ឆ្នាំបានឲ្យដឹងថា ជនរងគ្រោះនៅមុនពេលកើតហេតុបានជិះកង់ទៅចម្ការស្វាយរបស់គាត់ដែលមានចម្ងាយប្រមាណជិត ២ គីឡូម៉ែត្រពីផ្ទះរបស់គាត់ ដើម្បីមើលថែទាំបូមទឹក និង កាប់ឆ្ការ ដុតស្មៅដែលដុះក្នុងចម្ការស្វាយនោះ ហើយក៏ជួបគ្រោះថ្នាក់ភ្លើងឆេះស្លាប់ក្នុងចម្ការស្វាយនោះតែម្ដងទៅ។
លោក ដានី ថ្លែងថា៖ «យោងតាមលទ្ធផលនៃការធ្វើកោសល្យវិច័យទៅលើសាកសពជនរងគ្រោះ និងនៅកន្លែងកើតហេតុ ដោយក្រុមមន្ត្រីនគរបាលជំនាញមកពីថ្នាក់ខេត្តបានបង្ហាញថា ជនរងគ្រោះមុននឹងត្រូវភ្លើងឆេះបានដួលសន្លប់ដោយសារការពុលនឹងផ្សែងភ្លើង ព្រោះនៅកន្លែងកើតហេតុ សមត្ថកិច្ចបានរកឃើញស្បែកជើងម្ខាងឆេះអស់មួយកំណាត់ និងដងរនាស់មួយកំណាត់ត្រូវបានឆេះ ខណៈសពជនរងគ្រោះឆេះរោលខ្លួនប្រាណ និងដៃជើង និងនៅក្បែរសាកសពគេបានប្រទះឃើញមានកម្ទេចក្រណាត់អាវ និងខោ ព្រមទាំងស្មៅ និង ដើមបន្លាយួនមួយចំនួនដែលឆេះមិនទាន់អស់»។ លោក អឿន ឆាត កូនជនរងគ្រោះបានរកឃើញឪពុកស្លាប់ក្នុងចម្ការ៕
