.jpg)
ជនជាប់ចោទជាតិអូស្ត្រាលីនៅតុលាការកំពូលពីម្សិល។ រូប សារុំ
ភ្នំពេញៈ បុរសវ័យចំណាស់ជនជាតិអូស្ត្រាលីម្នាក់កាលពីម្សិលមិញបានស្នើសុំឲ្យតុលាការកំពូលដោះលែងខ្លួនវិញពាក់ព័ន្ធបទចោទជួញដូរគ្រឿងញៀនមេតំហ្វេតាមីនជាង ៤០ ក្រាម ប្រព្រឹត្តនៅខេត្តព្រះសីហនុកាលពីឆ្នាំ ២០១៧។
ជនជាប់ចោទឈ្មោះ DINOROSSETTO អាយុ ៥១ ឆ្នាំ ជាជនជាតិអូស្ត្រាលីបានប្រាប់ចៅក្រមក្នុងបន្ទប់សវនាការថា គាត់និងក្រុមគ្រួសារជាមួយនឹងកូន ៤ នាក់ បានមកកម្ពុជាបើកអាហារដ្ឋាន ១ កន្លែង នៅក្រុងព្រះសីហនុ។
ក្នុងអំឡុងពេលប្រកបរបររកស៊ីនោះគឺគាត់បានស្គាល់បុរសខ្មែរម្នាក់ឈ្មោះ ថៃហ្គឺ ហើយបុរសរូបនេះបានឲ្យគាត់ទិញម៉ូតូឲ្យ ១ គ្រឿង ដោយសន្យាបង់រំលស់ឲ្យគាត់ជារៀងរាល់ខែ។
ជនជាប់ចោទបន្តថាក្នុងពេលស្គាល់គ្នានោះ ឈ្មោះថៃហ្គឺ ក៏បានណែនាំឲ្យគាត់ស្គាល់នារីខ្មែររកស៊ីផ្លូវភេទម្នាក់ ហើយពួកគាត់តែងតែបបួលគ្នាជក់ថ្នាំញៀនក្នុងបន្ទប់ជួលរបស់គាត់។ ប៉ុន្តែស្រាប់តែនៅថ្ងៃទី ៤ ខែ កញ្ញា ឆ្នាំ ២០១៧ គាត់ត្រូវបាននគរបាលប្រឆាំងបទល្មើសគ្រឿងញៀនខេត្តព្រះសីហនុចាប់ខ្លួននៅសួនច្បារ ១ នៅក្រុងព្រះសីហនុហើយនគរបាលប្រាប់គាត់ថា គេបានរកឃើញម្សៅក្រាមពណ៌សថ្លា ១ កូនថង់តូចនៅលើដីក្បែរកន្លែងគាត់ឈរនោះ។
លោក DINO ROSSETTO បានបញ្ជាក់ថា៖ «ពេលនោះខ្ញុំបានស្នើឲ្យប៉ូលិសបង្ហាញគ្រឿងញៀនដល់ខ្ញុំ ប៉ុន្តែប៉ូលិសមិនឲ្យខ្ញុំបានឃើញទេ»។
លោក DINOROSSETTO បន្តថា បន្ទាប់ពីចាប់ខ្លួន សមត្ថកិច្ចក៏បាននាំលោកទៅបន្ទប់ស្នាក់នៅ ក្នុងភូមិ ២ សង្កាត់ ៣ ក្រុងព្រះសីហនុ ហើយសមត្ថកិច្ចបានឆែកឆេរក្នុងបន្ទប់នោះនិងបានរកឃើញម្សៅក្រាមពណ៌សថ្លា ១ កញ្ចប់ធំទៀត មានទម្ងន់ ៤០,៨៧ ក្រាម ហើយសមត្ថកិច្ចប្រាប់គាត់ថា ជាគ្រឿងញៀនទៀតផង។ ប៉ុន្តែ គាត់បានប្រាប់ចៅក្រមថា ក្នុងបន្ទប់ស្នាក់នៅនោះ មិនមានលាក់គ្រឿងញៀនទេ ប៉ុន្តែគាត់សន្និដ្ឋានថា អាចឈ្មោះ ថៃហ្គឺ ទម្លាក់កញ្ចប់គ្រឿងញៀននៅទីនោះ ព្រោះមុនចាប់ខ្លួនគាត់ គឺបុរសឈ្មោះ ថៃហ្គឺ និងមិត្តស្រីរបស់គាត់ជានារីរកស៊ីផ្លូវភេទដែលជាភ្នាក់ងារសម្ងាត់របស់នគរបាលបានមកផ្ទះរបស់គាត់ដើម្បីសងលុយបង់រំលស់ម៉ូតូដែលឈ្មោះ ថៃហ្គឺ បានសន្យាសងគាត់ ១០០ ដុល្លារក្នុង ១ ខែ ផ្ទុយទៅវិញឈ្មោះ ថៃហ្គឺ បានឲ្យគាត់តែ ១០ ដុល្លារទេក្នុង ១ ខែ។ ប៉ុន្តែពេលនោះ គាត់ក៏បបួលគ្នាជក់គ្រឿងញៀនជាមួយមិត្តស្រីរបស់ឈ្មោះ ថៃហ្គឺ។
ជនជាប់ចោទបន្តថា ក្រោយពីជក់ថ្នាំញៀនរួច គាត់បានឲ្យឈ្មោះ ថៃហ្គឺ និងមិត្តស្រីចេញតាមទ្វារក្រោយ ហើយប្រហែលពេលនោះហើយដែលឈ្មោះ ថៃហ្គឺ ទម្លាក់គ្រឿងញៀនដែលធ្វើឲ្យសមត្ថកិច្ចរកឃើញ និងចោទប្រកាន់មកលើគាត់។
ជនជាប់ចោទជាតិអូស្ត្រាលីរូបនេះ ត្រូវបានសាលាដំបូងខេត្តព្រះសីហនុប្រកាសសាលក្រមកាលពីថ្ងៃទី ២៣ ខែមករាឆ្នាំ ២០១៨ ផ្តន្ទាទោសដាក់ពន្ធនាគារ ៥ ឆ្នាំ ចោទពីបទជួញដូរគ្រឿងញៀនតាមមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន។ប៉ុន្តែជនជាប់ចោទបានប្តឹងឧទ្ធរណ៍ ហើយត្រូវបានសាលាឧទ្ធរណ៍តម្កល់សាលក្រមរបស់សាលាដំបូងខេត្តព្រះសីហនុនៅដដែល ហើយបន្ទាប់មក ជនជាប់ចោទបានពឹងមេធាវីឈ្មោះ លី ហេង និងមេធាវី ឈ្មោះ មិន បូរ៉ា ប្តឹងសារទុក្ខមកតុលាការកំពូលទៀត។
ជនជាប់ចោទថា៖ «ករណីនេះខ្ញុំស្នើសុំឲ្យតុលាការកំពូលដោះលែងខ្ញុំឲ្យមានសេរីភាពវិញ ព្រោះខ្ញុំមិនបានជួញដូរគ្រឿងញៀនដូចការចោទប្រកាន់របស់ប៉ូលិសទេ»។
ទោះយ៉ាងណា បើតាមកំណត់ហេតុរបស់តុលាការ បង្ហាញថាដោយសារតែមានទំនាក់ទំនងគ្នាពីបញ្ហាគ្រឿងញៀននេះហើយ ទើបឈ្មោះ ថៃហ្គឺ ក៏ត្រូវបានសមត្ថកិច្ចចាប់ខ្លួនផងដែរ តែចាប់ខ្លួនក្នុងថ្ងៃខុសគ្នា ហើយបច្ចុប្បន្នកំពុងជាប់ឃុំនៅពន្ធនាគារ ខេត្តព្រះសីហនុ។
លោក ឈួន ចាន់ថា តំណាងមហាអយ្យការ សន្និដ្ឋានថា ក្រោយពីបានពិនិត្យមើលសំណុំរឿងគឺជនជាប់ចោទត្រូវបានតុលាការជម្រះលើអង្គសេចក្តីដោយចោទប្រកាន់ពីបទជួញដូរគ្រឿងញៀនដែលផ្អែកតាមការចោទប្រកាន់នេះ លោកយល់ថា ការសម្រេចរបស់តុលាការថ្នាក់ក្រោមគឺត្រឹមត្រូវហើយ។
លោកថ្លែងថា៖ «ដូច្នេះខ្ញុំ សូមតម្កល់សាលដីការបស់សាលាឧទ្ធរណ៍ទុកជាបានការ»។
លោក លី ហេង ជាមេធាវីការពារសិទ្ធិឲ្យលោក DINO ROSSETTO បានសន្និដ្ឋានថា កូនក្តីលោក បានស្គាល់គ្នាជាមួយឈ្មោះ ថៃហ្គឺ ហើយបើតាមកូនក្តីលោកថា រឿងរ៉ាវនេះគឺឈ្មោះថៃហ្គឺជាអ្នកបង្កើតទាំងអស់។ ព្រោះថា ឈ្មោះថៃហ្គឺបានជំពាក់លុយកូនក្តីលោកដែលមានមុខរបររកស៊ីត្រឹមត្រូវ ហេតុអីកូនក្តីរបស់លោកទៅរកស៊ីគ្រឿងញៀននោះ?
លោកថា៖ «ខ្ញុំសុំឲ្យតុលាការលើកលែងបទចោទ និងដោះលែងកូនក្តីខ្ញុំឲ្យមានសេរីភាពវិញព្រោះកូនក្តីខ្ញុំមានជំងឺផ្លូវចិត្ត ហើយក៏មានលិខិតបញ្ជាក់ពីគ្រូពេទ្យនៅប្រទេសអូស្ត្រាលីដែរ»។
ក្រោយជំនុំជម្រះ លោក ឃឹម ប៉ុណ្ណ ប្រធានក្រុមប្រឹក្សាជំនុំជម្រះថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ៨ ខែកក្កដា ខាងមុខ៕
