ភ្នំពេញៈ ផលិតករភាពយន្តជនជាតិអូស្ត្រាលីលោក James Ricketson ត្រូវបានសួរអំពីការជាប់ពាក់ព័ន្ធនឹងអតីតគណបក្សសង្គ្រោះជាតិ និងលោក សម រង្ស៊ី ដែលជាថ្ងៃទី ៦ នៃសវនាការពីបទចារកម្មនៅសាលាដំបូងរាជធានីភ្នំពេញកាលពីម្សិលមិញ ប៉ុន្តែបានបដិសេធថាមិនបានជាប់ពាក់ព័ន្ធគណបក្សនេះទេ បើទោះជាចៅក្រមលើកឡើងអំពីអ៊ីមែលពាក់ព័ន្ធជាច្រើនដែលលោកបានទាក់ទងជាមួយមេដឹកនាំអតីតគណបក្សសង្គ្រោះជាតិក្ដី។
ចៅក្រម កុយ សៅ ដំបូងបានសួរលោក Ricketson អំពីអ៊ីមែលមួយចំនួនដែលលោកបានសរសេរទៅអតីតនាយករដ្ឋមន្ត្រីអូស្ត្រាលី Malcolm Turnbull និងមិត្តភក្តិគាត់ម្នាក់នៅប្រទេសអូស្ត្រាលី។ ចៅក្រម កុយ សៅ បានថ្លែងថា អ្វីដែលលោក Ricketos បានសរសេរគឺមិនមែនជាភាសាអ្នកកាសែត ឬភាសាភាពយន្តទេ ប៉ុន្តែជា «ការញុះញង់»។
ចៅក្រមរូបនេះបានសួរថា៖ «តើការសរសេររបស់អ្នកមានលក្ខណៈជាអ្នកកាសែត ភាពយន្ត ឬការញុះញង់ជាការងារចារកម្ម ឬដើម្បីឲ្យគេស្អប់កម្ពុជា?» «នៅក្នុងអ៊ីមែលនោះ អ្នកថែមទាំងបរិហារកេរ្តិ៍សម្តេច ហ៊ុន សែន ដោយថ្លែងថា គាត់សម្លាប់មនុស្សជាលក្ខណៈប្រព័ន្ធ និងអ្វីដទៃៗទៀតជាពិសេសនិយាយអាក្រក់អំពីគណបក្សប្រជាជនកម្ពុជា ហើយដូចជាគាំទ្រគណបក្សសង្គ្រោះជាតិ។ ការសរសេរប្រភេទនេះមិនមែនជាការងារអ្នកកាសែតទេ វាជាការញុះញង់។ តើការសរសេររបស់អ្នកមានគោលបំណងអ្វី?»។
តាមរយៈអ៊ីមែលព្រីនចេញ និងអានដោយចៅក្រម កុយ សៅ លោក Ricketson បានថ្លែងថាលោកនាយករដ្ឋមន្ត្រី ហ៊ុន សែន បានរំលោភបំពានសិទ្ធិមនុស្សដូចជា ការលួចយកដីធ្លីប្រជាជន បំផ្លាញផ្ទះសំបែង បំភិតបំភ័យ និងដាក់ពន្ធនាគារអ្នកដែលប្រឆាំងនឹងលោក។ លោកបានថ្លែងបន្តតាមអ៊ីមែលថា លោកនាយករដ្ឋមន្ត្រី ហ៊ុន សែន កំពុងរៀបចំឲ្យកូនប្រុសរបស់គាត់ធ្វើមេដឹកនាំកម្ពុជា។ ជាមួយនោះអ៊ីមែលរបស់លោក Ricketson ក៏ជំរុញអតីតនាយករដ្ឋមន្ត្រី Turnball មិនឲ្យស្វាគមន៍ដំណើរទស្សនកិច្ចទៅអូស្ត្រាលីរបស់លោកនាយករដ្ឋមន្ត្រី ហ៊ុន សែន និងកាត់ជំនួយដល់កម្ពុជា។ លោកក៏បានអះអាងផងដែរថា លោកនាយករដ្ឋមន្ត្រី ហ៊ុន សែន មានអង្គរក្សប្រដាប់ដោយអាវុធធុនធ្ងន់ជាង ១០ ០០០ នាក់។
ជាការឆ្លើយតបនឹងសំណួររបស់ចៅក្រមលោក Ricketson បានថ្លែងថា អ្វីដែលលោកបានសរសេរទៅមិត្តភក្តិអូស្ត្រាលីម្នាក់ និងលោក Turnball គឺជាអ៊ីមែលឯកជន និងគ្រាន់តែបង្ហាញអំពីមតិយោបល់របស់លោកដែលត្រូវបានការពារដោយច្បាប់។
លោកបានសួរទៅចៅក្រមវិញថា៖ «នេះជាអ៊ីមែលឯកជន។ គោលបំណងរបស់ខ្ញុំគឺដើម្បីបង្ហាញអំពីមតិយោបល់របស់ខ្ញុំ ប្រសិនបើអ្នកចូលទៅក្នុង google អ្នកនឹងឃើញមតិយោបល់បែបនេះ ហើយប្រសិនបើវាសម្រាប់ចារកម្ម តើផ្នែកណាមួយនៃអ៊ីមែលនោះរំលោភមាត្រា ៤៤៦?»។
លោក Ricketson បានថ្លែងថានៅក្នុងអ៊ីមែលនោះ «គណបក្សដែលតំណាងឲ្យក្តីសង្ឃឹម តំណាងឲ្យការផ្លាស់ប្តូរគឺគណបក្សសង្គ្រោះជាតិ»។ នៅក្នុងរបាយការណ៍នគរបាលដែលអាចនៅក្នុងតុលាការលោក Ricketson បានថ្លែងថា ប្រសិនបើលោកមានសិទ្ធិបោះឆ្នោតខ្ញុំនឹងបោះឆ្នោតឲ្យគណបក្សសង្គ្រោះជាតិ។
ក្នុងអ៊ីមែលមួយទៀតលោក Ricketson បានសរសេរទៅភរិយាលោក សម រង្ស៊ី លោកស្រី ជូឡុង ស៊ូម៉ារ៉ា សុំឲ្យលោកស្រីផ្ទៀងផ្ទាត់ការសរសេររបស់លោកពេលលោកផ្ញើទៅអូស្ត្រាលី។ ចៅក្រម កុយ សៅ បានសួរថា ហេតុអ្វីបានជាលោកត្រូវការលោកស្រី ស៊ូម៉ារ៉ា កែការសរសេរនោះ? ប៉ុន្តែលោក Ricketson ឆ្លើយថាវាគ្រាន់តែដើម្បីផ្ទៀងផ្ទាត់ថា តើមានកំហុសអំពីការពិតណាឬអត់? លោកបានបន្តថាលោកមិនមានការជាប់ពាក់ព័ន្ធជាមួយគណបក្សសង្គ្រោះជាតិទេក្រៅពីការងារជាអ្នកកាសែត។
លោកបានបំភ្លឺថា ក្រៅពីផ្ញើរូបភាពវីដេអូដែលថតដោយយន្តហោះដ្រូនរបស់លោកទៅគណបក្សសង្គ្រោះជាតិ លោកធ្លាប់ផ្ញើរូបថតមួយចំនួនដោយស្ម័គ្រចិត្ត។ ប៉ុន្តែលោកបានថាមិនបានផ្តល់ដំបូន្មានដល់អតីតគណបក្សប្រឆាំងនោះទេ។
ប្រធានចៅក្រម លោក សេង លាង បានសួរថា៖ «ចន្លោះពីថ្ងៃទី ២១ ដល់ថ្ងៃទី ២២ ខែកុម្ភៈ ឆ្នាំ ២០១៤ មានអ៊ីមែលចំនួន ៥ ដែលលោកបានទាក់ទងជាមួយលោក សម រង្ស៊ី តើនោះពិតឬអត់? តើវីដេអូអ្វីដែលអ្នកបានផ្ញើទៅលោក សម រង្ស៊ី?»។
លោក Ricketson បានថ្លែងថាលោក សម រង្ស៊ី បានស្នើសុំបង្ហោះវីដេអូនោះលើហ្វេសប៊ុករបស់លោក។ ប៉ុន្តែលោកគ្រាន់តែផ្ញើឲ្យលោក សម រង្ស៊ី នូវ YouTube line ប៉ុណ្ណោះ។
ចៅក្រម សេង លាង បានសួរថា តើលោក Ricketson បានទទួលអ្វីជាថ្នូរពីការស្នើសុំឲ្យនាយករដ្ឋមន្ត្រីអូស្ត្រាលីមិនជួបជាមួយលោកនាយករដ្ឋមន្ត្រី ហ៊ុន សែន ឬកាត់ជំនួយដល់កម្ពុជា?
លោក Ricketson ថ្លែងថា៖ «ខ្ញុំមិនបានទទួលអ្វីពីវាទេ។ យើងរិះគន់រដ្ឋាភិបាលចំពោះកិច្ចព្រមព្រៀងបញ្ជូនជនភៀសខ្លួន ៣១ នាក់ជាមួយប្រាក់ ៥០ លានដុល្លារ។ ការសរសេរទៅនាយករដ្ឋមន្ត្រីគឺជារឿងធម្មតានៅអូស្ត្រាលី»។
ចៅក្រម សេង លាង បានបញ្ជាក់ថាការជំនុំជម្រះនឹងបញ្ចប់នៅថ្ងៃពុធនេះ៕ PS