ភ្នំពេញៈ ផលិតករភាពយន្តជាតិអូស្ត្រាលីបានផ្តល់សក្ខីកម្មនៅសាលាដំបូងរាជធានីភ្នំពេញ កាលពីម្សិលមិញ ប្រឆាំងនឹងការចោទរូបលោកពីបទចារកម្មដោយថា ការចាប់ខ្លួននោះអាចមកពីច្រឡំលោកជាមួយបុរសម្នាក់ទៀតឈ្មោះ James ដូចគ្នាដែលឈ្មោះនោះត្រូវបានគេរាយការណ៍ថាជាប់ពាក់ព័ន្ធនឹងកូនស្រីលោក កឹម សុខា គឺកញ្ញា កឹម មនោវិទ្យា ហៅ ម៉ូណា។
លោក James Ricketson អាយុ ៦៩ ឆ្នាំបានឆ្លើយនៅតុលាការនាថ្ងៃទី ៥ ថា គាត់ត្រូវបានចោទពីបទចារកម្មចាប់ពីឆ្នាំ ១៩៩៥ រហូតដល់ថ្ងៃចាប់ខ្លួននៅថ្ងៃទី ៣ ខែមិថុនាឆ្នាំមុន។
លោកថា៖ «ក្នុងអំឡុងឃុំខ្លួនខ្ញុំៗបានឮថាមានបុរសម្នាក់ទៀតឈ្មោះ James ដូចខ្ញុំដែរដែលមានទំនាក់ទំនងជាមួយកូនស្រីលោក កឹម សុខា ឈ្មោះ ម៉ូណា ។ ពួកគេអាចគិតថា ខ្ញុំគឺជាចារកម្មជនជាតិអាមេរិក ដូច្នេះទើបគេចាប់ខ្លួនខ្ញុំ»។
លោកបានឆ្លើយនឹងមេធាវីការពារក្តីឱ្យលោកគឺលោក គង់ សំអុន ថា៖ «វាគឺជាកំហុសមួយហើយខ្ញុំគិតថា កំហុសនោះនឹងត្រូវបានកែតម្រូវក្នុងប៉ុន្មានសប្ដាហ៍ ប៉ុន្តែវាមិនទាន់ត្រូវបានកែទេរហូតមកទល់ពេលនេះ»។
លោក Ricketson ថាគាត់គ្មានទំនាក់ទំនងអ្វីជាមួយរដ្ឋាភិបាល ឬយោធាទេ ហើយថាការចាប់ខ្លួន៖ «គ្មានដីកាទេ»។
លោកបន្តថារូបលោកមិនត្រូវបានចាប់ខ្លួន ខណៈកំពុងបង្ហ្រោះដូនពីលើក្បួនប្រមូលផ្តុំគណបក្សសង្គ្រោះជាតិទេ ប៉ុន្តែចាប់ពេលលោកកំពុងអង្គុយជាមួយកូនស្រីចិញ្ចឹមឈ្មោះ ចាន់ ធី និងក្មេងស្រីម្នាក់ទៀតឈ្មោះ រ៉ូសា ខាងជើងសួនព្រះបរមរាជវាំងនៅម៉ោង ៥ ល្ងាច។
លោក Ricketson ថា៖ «ពេលនោះបុរសម្នាក់ដែលស្លៀកពាក់ស៊ីវិលបានមកនិយាយជាមួយខ្ញុំក្នុងលក្ខណៈរាក់ទាក់។ គាត់ថាគាត់មកពីនាយកដ្ឋានអន្តោប្រវេសន៍។ បន្ទាប់មកប៉ូលិសក្នុងឯកសណ្ឋាន ១២ នាក់បានមកសួររកលិខិតឆ្លងដែនខ្ញុំ។ ខ្ញុំបានប្រាប់ពួកគេថា ខ្ញុំបានទុកវានៅផ្ទះសំណាក់។ ពួកគេក៏និយាយថា ក្នុងនាមជនបរទេសខ្ញុំត្រូវតែយកលិខិតឆ្លងដែនតាមខ្លួនគ្រប់ពេល»។
លោក Ricketson បញ្ជាក់ថា ខណៈគាត់ត្រូវបានចាប់ខ្លួនប៉ូលិសបានឱ្យគាត់ទៅការិយាល័យកណ្តាលដើម្បីសួរដោយមិនបង្ហាញដីកាទេ។
លោកថានៅព្រឹកថ្ងៃ ៤ មិថុនា ២០១៧ ប៉ូលិសបានយកទ្រព្យសម្បត្តិលោកទាំងអស់ចេញពីផ្ទះសំណាក់។ លោក Ricketson ថាគាត់បានយល់ព្រមឱ្យប៉ូលិសពិនិត្យទូរស័ព្ទ ប៉ុន្តែមិនឲ្យឆែកកុំព្យូទ័រយួរដៃទេ។ ទោះជាយ៉ាងណា លោកថា ១១ ខែក្រោយមកតុលាការបានបង្ហាញឯកសារ ១៦០០ ទំព័រដែលព្រីនចេញពីកុំព្យូទ័ររបស់គាត់។
យ៉ាងណាចៅក្រមថា សវនាការត្រូវពន្យារពេល ហើយនឹងបន្តនៅថ្ងៃនេះទៀត៕ NS