.jpg)
បុរសអូស្ត្រាលីលោក James Ricketson កាលពីមិនទាន់ដោះលែង ។ ផា លីណា
ភ្នំពេញៈ អ្នកផលិតខ្សែភាពយន្តជនជាតិអូស្ត្រាលី James Ricketson បានអះអាងថានឹងបន្តគម្រោងជួយជនក្រីក្ររើសអេតចាយនៅកន្លែងចាក់សំរាមជើងឯក ក្រោយពេលត្រឡប់ទៅដល់អូស្ត្រាលីវិញ ដោយគ្រោងរៃអង្គាសថវិកាឲ្យបានជាងកន្លះលានដុល្លារ ខណៈដែលលោកនិងសហការី៣នាក់ទៀតបានដាក់ដំណើរការគេហទំព័រមួយឈ្មោះថា «Family by Family»។
លោក Ricketson បានថ្លែងនៅថ្ងៃទី១៥ ខែតុលានេះថា លោកព្យាយាមរៃអង្គាសថវិកាដំបូងឲ្យបាន៥ម៉ឺនដុល្លារដើម្បីជួយគ្រួសារទាំងនេះ ហើយនឹងបន្តរៃអង្គាសបន្តបន្ទាប់ទៀត។ លោកថ្លែងថាលោកបានជួយគ្រួសារជាច្រើនរួចមកហើយ ដោយអ្នកខ្លះបានត្រឡប់ទៅរស់នៅស្រុកកំណើតរបស់ពួកគេ ហើយបោះបង់មុខរបបរើសអេតចាយ។
លោកបានបញ្ជាក់ថា៖ «ខ្ញុំបានជួយគ្រួសារក្រីក្រនៅកម្ពុជាអស់រយៈពេល២២ឆ្នាំហើយ ពីព្រោះខ្ញុំស្រឡាញ់ប្រទេសកម្ពុជានិងប្រជាជនកម្ពុជា ជាពិសេសអ្នកក្រីក្រ។ ពួកគេសមតែទទួលបាននូវឱកាសធ្វើឲ្យជីវិតរបស់ពួកគេប្រសើរជាងនេះ ជាពិសេសពួកក្មេងៗ»។
លោក Ricketson ដែលមានអាយុ៦៩ឆ្នាំត្រូវបានសលាដំបូងរាជធានីភ្នំពេញផ្តន្ទាទោសកាលពីខែសីហាដោយកំណត់ដាក់ពន្ធនាគារ៦ឆ្នាំពីបទចារកម្មនិងប្រមូលព័ត៌មានជាអាទិ៍ធ្វើឲ្យអន្តរាយដល់ការការពារជាតិ។ប៉ុន្តែលោកទទួលបានការលើកលែងទោសហើយត្រូវបានបណ្ដេញចេញពីកម្ពុជាកាលពីខែកញ្ញា ត្រឡប់ទៅប្រទេសអូស្ត្រាលីវិញ។
លោកបានថ្លែងថា៖«ពេលវេលារបស់ខ្ញុំនៅក្នុងគុក មិនបានប៉ះពាល់ដល់អារម្មណ៍របស់ខ្ញុំអំពីប្រទេសកម្ពុជាទេ។ ខ្ញុំគិតអំពីប្រទេសនេះដូចជា ជម្លោះក្នុងរឿងស្នេហាមួយ។អ្នកខ្លះនៅក្នុងជួររដ្ឋាភិបាលគិតថាខ្ញុំស្អប់ប្រទេសកម្ពុជា។ពួកគេយល់ខុសហើយ។ខ្ញុំស្រឡាញ់ប្រទេសកម្ពុជា»។
គ្រួសារមួយក្នុងចំណោមគ្រួសារដែលលោក Ricketson បានជួយគឺឪពុកម្តាយរបស់នាង នូវ ស្រីពេជ្រ។ លោក Ricketson និយាយថា លោកបានចំណាយប្រាក់ ៧ពាន់ដុល្លារ ដើម្បីជួយឲ្យគ្រួសារនេះបានវិលទៅរស់នៅស្រុកកំណើតរបស់ពួកគេវិញនៅខេត្តព្រៃវែង។
ស្រីពេជ្រ បានថ្លែងប្រាប់នៅថ្ងៃទី១៥ខែតុលានេះដែរថា នាងនិងគ្រួសារនាងបានស្គាល់លោក Ricketson រយៈពេលប្រហែល៧ឆ្នាំហើយ ដោយនាងនៅចាំបានថា លោក Ricketson បានជួយដល់គ្រួសារចំនួន ១៧ ដែលរើសសំរាមនៅកន្លែងចាក់សំរាមជើងឯក។
ស្រីពេជ្រ និយាយថា៖ «គាត់ជួយទិញរបស់ឲ្យ ធ្វើឲ្យគាត់អាចត្រឡប់ទៅរស់នៅភូមិវិញ។ គាត់ឲ្យដូចជាអង្ករ និងថិវកា ហើយគាត់ជួយគ្រួសារដែលចង់ទៅរស់នៅស្រុកកំណើតវិញ ប្រសិនបើពួកគេចង់ទៅ»។
នាងថ្លែងថា នាងចង់ឃើញក្មេងៗដែលរស់នៅក្បែរកន្លែងចាក់សំរាម និងរើសអេតចាយអាចមានលទ្ធភាពទៅរៀនដូចក្មេងដទៃទៀត។
យ៉ាងណាក្ដី យោងតាមច្បាប់កម្ពុជា លោក Ricketson មិនអាចត្រឡប់មកកម្ពុជាវិញបានទេ ក្រោយពេលលោកត្រូវបានផ្តន្ទាទោសពីបទឧក្រិដ្ឋ។ ប៉ុន្តែ លោកថ្លែង ថា លោកមានសុទិដ្ឋិនិយមអំពីការត្រឡប់មកកម្ពុជាវិញ ហើយនិងបន្តការងារមនុស្សធម៌របស់លោក។
លោកបានបន្ថែមថា៖ «ខ្ញុំមិនត្រូវបានគេហាមមិនឲ្យមកទស្សនាប្រទេសកម្ពុជាទេ។ បើរដ្ឋាភិបាលចង់បញ្ឈប់ខ្ញុំមិនឲ្យធ្វើការងារមនុស្សធម៌នៅកម្ពុជា នោះគឺជាការសម្រេចចិត្តរបស់គាត់។ ខ្ញុំនឹងបន្តជួយដល់គ្រួសារក្រីក្រនៅកម្ពុជា បើទោះបីជារដ្ឋាភិបាលកម្ពុជាមិនឱ្យ
ខ្ញុំទៅទស្សនាកម្ពុជាក៏ដោយចុះ»៕
