The Phnom Penh Post Search

Search form

Logo of Phnom Penh Post newspaper Phnom Penh Post - បុរស​ម្នាក់​នៅ​កំពង់ចាម​ជាប់​សង្ស័យ​ករណី​ផ្តាសាយ​បក្សី​ទី៨




បុរស​ម្នាក់​នៅ​កំពង់ចាម​ជាប់​សង្ស័យ​ករណី​ផ្តាសាយ​បក្សី​ទី៨

បុរស​ម្នាក់​នៅ​កំពង់ចាម​ជាប់​សង្ស័យ​ករណី​ផ្តាសាយ​បក្សី​ទី៨

130218_07
ការចរាចរសត្វមាន់ ចូលមករាជធានីភ្នំពេញ របស់ក្រុមឈ្មួញសត្វបក្សី ម៉ៃ វីរៈ

កំពង់ចាមៈ បុរស​អាយុ ៣៥​ឆ្នាំ​ម្នាក់​ មក​ពី​ខេត្ត​កំពង់ចាម ត្រូវ​សង្ស័យ​ថា បាន​ឆ្លង​ជំងឺ​គ្រុន​ផ្តាសាយ​បក្សី នឹង​អាច​ក្លាយ​ជា​មនុស្ស​ទី៨ ដែល​រងគ្រោះ​ដោយ​ជំងឺ​គ្រុន​ផ្តាសាយ​បក្សី( H5N1) នៅ​ក្នុង​ប្រទេស​កម្ពុជា​ក្នុង​ឆ្នាំ​នេះ  ​ប្រសិន​បើ​ការ​ធ្វើ​តេស្ត​នៅ​វិទ្យាស្ថាន​ប៉ាស្ទ័រ​បញ្ជាក់​ថា មាន​មេ​រោគ​វិជ្ជមាន​។ ​នេះ​បើ​យោង​តាម​មន្រ្តី​សុខាភិបាល​ដែល​បាន​ថ្លែង​ឲ្យ​ដឹង​កាល​ពី​ម្សិលមិញ។

លោក លី សុវណ្ណ អនុប្រធាន​នាយកដ្ឋាន​ប្រយុទ្ធ​នឹង​ជំងឺ​ឆ្លង​នៃ​ក្រសួង សុខាភិបាល បាន​ថ្លែង​ថា បុរស​ម្នាក់​ត្រូវ​បាន​យក​ទៅ​មន្ទីរ​ពេទ្យ​ខេត្ត​កំពង់ចាម​ដោយ​សារ​មាន ​បញ្ហា​ពាក់ព័ន្ធ​នឹង​ផ្លូវ​ដង្ហើម បន្ទាប់​ពី​គាត់​បាន​ទទួល​ទាន​សត្វ​ទា​ចំនួន​ពីរ ដែល​បាន​ងាប់​នៅ​ក្នុង​ភូមិ​របស់​គាត់​ ដែល​ជា​កន្លែង​សត្វ​បក្សី​មួយ​ចំនួន​បាន​ងាប់​ក្នុង​ពេល​ថ្មីៗ​នេះ។

លោក សៀង ណាត ប្រធាន​មជ្ឈ​មណ្ឌល​សុខភាព​ក្នុង​ឃុំ​មេ សជ្រៃ ដែល​ជា​ឃុំ​ជន​រង​គ្រោះ​រស់​នៅ បាន​ប្រាប់​ឲ្យ​ដឹងពី​ម្សិលមិញ​ថា លោក​បាន​បញ្ជូន​​ជន​រង​គ្រោះ​ទៅ​មន្ទីរ​ពេទ្យ​បង្អែក​ភ្លាម​ៗ​ បន្ទាប់​ពីបាន​ដឹង​ថា គាត់​អាច​មាន​រោគ​សញ្ញា​ផ្តាសាយ​បក្សី H5N1 ​កាល​ពី​ថ្ងៃ​ទី៦ ខែ​កុម្ភៈ។

លោក​បាន​ថ្លែង​ថា បើ​ទោះ​បី​ជា​មាន​កិច្ច​ខិតខំ​ប្រឹង​ប្រែង​អប់រំ​ណែនាំ​ពី​រាជរដ្ឋាភិបាល​ក៏​ដោយ ក៏​«អ្នក​ភូមិ​មួយ​ចំនួន​នៅ​តែ​ទទួល​ទាន​សត្វ​បក្សី​ ដែល​មាន​ជំងឺ​ឬ​ងាប់​ដដែល​»។​

លោក Lotfi Allal នៅ​អង្គការ​កសិកម្ម​ និង​ស្បៀង​អាហារ​អង្គការ​សហប្រជាជាតិ​ប្រចាំ​កម្ពុជា ​បាន​ថ្លែង​ថា ការ​គ្រប់គ្រង​វិរុស ​គឺ​ពិបាក នៅ​ក្នុង​ប្រទេស​មួយ​ដែល ៨០​ភាគ​រយ​នៃ​សត្វ​បក្សី​​ត្រូវ​បាន​ដាក់​នៅ​ជិត​ផ្ទះ​ឬ​គ្មាន​សណ្តាប់ ធ្នាប់​ត្រឹមត្រូវ។

គួរ​រំឭកថា ក្រសួង​សុខាភិបាល និង​អង្គការ​សុខភាព​ពិភពលោក បាន​ចេញ​សេចក្តី​ប្រកាស​ព័ត៌មាន​រួម​គ្នា​មួយ​កាល​ពី​ថ្ងៃ​ទី​១៣ កុម្ភៈ បាន​បង្ហាញ​ថា​កុមារី​អាយុ​៣​ឆ្នាំ ម្នាក់​ដែល​បាន​ប៉ះ​ពាល់​សត្វ​មាន​ឈឺងាប់ នៅ​ស្រុក​អង្គរ​ជ័យ ខេត្ត​កំពត​ បាន​កើត​គ្រុន​ក្តៅ​ខ្លួន និង​ឡើង​កន្ទូល ហើយ​ចូល​ដេក​សម្រាក​នៅ​មន្ទីរ​ពេទ្យ​គន្ធ​បុប្ផា​តាំង​ពី​ថ្ងៃ​ទី ៣ ខែ កុម្ភៈ  ​បាន​ស្លាប់​នៅ​ថ្ងៃ ១៣​កុម្ភៈ ដោយ​សភាព​ជំងឺ​ធ្ងន់ធ្ងរ​មិន​អាច​សង្គ្រោះ​បាន​។

លោក Sonny Krishnan ​មន្រ្តី​ទំនាក់​ទំនង​នៅ​អង្គការ​សុខភាព​ពិភពលោក​នៅ​កម្ពុជា បាន​បញ្ជាក់​ថា៖ «នេះ​ជា​តួ​លេខ​ខ្ពស់​បំផុត យើង​បាន​ជួប​ប្រទះ បើ​គិត​ពី​ករណី​ប្រចាំ​ខែ»។​ លោក​បាន​កត់​សម្គាល់​ថា មនុស្ស​ ៦ នាក់​បាន​ស្លាប់​ដោយ​សារ​ជំងឺ​ផ្តាសាយ H5N1 តែ​ក្នុង​៣​សប្តាហ៍​ចុង​ក្រោយ​ក្នុង​ឆ្នាំ​នេះ។

លោក​បន្ត​ថា ថ្វី​បើ​មាន​ការ​ព្យាបាល​ដោយ​ប្រើ​ថ្នាំ tamiflu ក្នុង​៤៨ ម៉ោង​ចាប់​ពី​មាន​រោគ​សញ្ញា ដើម្បី​ការពារ​កុំ​ឲ្យ​អ្នក​ជំងឺ​គ្រុន​ផ្តាសាយ​បក្សី​ស្លាប់ ប៉ុន្តែ នៅ​កម្ពុជា​មាន​អត្រា​ស្លាប់​ខ្ពស់ ដោយ​សារ​តែ​អ្នក​ជំងឺ​ភាគ​ច្រើន​មក​ដល់​មន្ទីរពេទ្យ នៅ​ដំណាក់​កាល​ចុង​ក្រោយ​នៃ​ជំងឺ​។

ចាប់​ពី​មេរោគ H5N1 លេច​ឡើង​១​ទសវត្ស​មុន កម្ពុជា​ជួប អ្នក​មាន​ជំងឺ​នេះ​២៨ ករណី ក្នុ​ង​ចំណោម ៦១៩ ករណី​នៅ​លើ​ពិភពលោក ហើយ​ក្នុង​នោះ ២៥ នាក់​បាន​ស្លាប់​ដែល​អ្នក​រង​គ្រោះ ភាគ​ច្រើន​ជា​ក្មេង​ស្រី៕  PS

អត្ថបទគួរចាប់អារម្មណ៍