.jpg)
ភ្នំពេញៈ អយ្យការអមសាលាដំបូងរាជធានីភ្នំពេញកាលពីម្សិលមិញបានសាកសួរស្ត្រី និងបុរសចំនួន ១៥ នាក់ដែលពាក់ព័ន្ធនឹងការស៊ីឈ្នួលពពោះជំនួសអ្នកផ្សេង ក្រោយពីអាជ្ញាធរប្រឆាំងការជួញដូរមនុស្សបានចាប់ខ្លួនពួកគេនៅក្នុងខណ្ឌសែនសុខកាលពីថ្ងៃទី ៨ ខែវិច្ឆិកា។
នៅពេលទាក់ទងពីម្សិលមិញលោក លី សុផាន់ណា អ្នកនាំពាក្យអយ្យការអមសាលាដំបូងរាជធានីភ្នំពេញមិនធ្វើអត្ថាធិប្បាយលម្អិតទេ ដោយលោកគ្រាន់តែបញ្ជាក់ថា៖ «អយ្យការកំពុងពិនិត្យ និងចាត់ការសំណុំរឿងនេះ»។
លោក កែវ ធា នាយនគរបាលប្រឆាំងការជួញដូរមនុស្សរាជធានីភ្នំពេញប្រាប់ភ្នំពេញ-ប៉ុស្តិ៍ថាអយ្យការអមសាលាដំបូងរាជធានីភ្នំពេញបានធ្វើការសាកសួរស្ត្រីចំនួន ១៣ នាក់ និងបុរស ២ នាក់ដែលស៊ីឈ្នួលពពោះជំនួសអ្នកផ្សេងនោះ។
លោកឲ្យដឹងថារហូតមកដល់ថ្ងៃម្សិលមិញនេះអយ្យការអមសាលាដំបូងរាជធានីភ្នំពេញនៅមិនទាន់ធ្វើការចោទប្រកាន់នៅឡើយទេដោយសារតែអ្នកពាក់ព័ន្ធមានចំនួនច្រើន។
លោក កែវ ធា បញ្ជាក់ថា៖ «អយ្យការអមសាលាដំបូងរាជធានីភ្នំពេញបានផ្ញើ [ជនសង្ស័យទាំងនោះ] នៅកន្លែងខ្ញុំវិញ ហើយស្អែកបានគេបន្តសួរទៀត គេសួរម្តងមួយៗ»។
កាលពីថ្ងៃទី ១១ ខែវិច្ឆិកាលោក ទូច សារ៉េន នាយរងការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលរាជធានីភ្នំពេញប្រាប់ភ្នំពេញប៉ុស្តិ៍ផងដែរថា ក្នុងប្រតិបត្តិការនេះកម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលរាជធានីភ្នំពេញបានឃាត់ខ្លួនមនុស្ស ១៥ នាក់ក្នុងនោះមានប្រុស ២ នាក់ និងស្រី ១៣ នាក់ដែលក្នុងនោះមានស្ត្រី ១១ នាក់បាននិងកំពុងមានផ្ទៃពោះ តែលោកពុំអាចផ្តល់ព័ត៌មានថា តើនរណានៅពីក្រោយនៃការពពោះនេះ ហើយថា តើស្ត្រីទាំងនោះពពោះឲ្យនរណានោះទេ ដោយសារតែករណីនេះបាននិងកំពុងតែស្ថិតក្រោមការសួរនាំរបស់សមត្ថកិច្ច។
កាលពីថ្ងៃទី ១១ នោះដែរលោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍នៃគណៈកម្មាធិការជាតិប្រយុទ្ធប្រឆាំងការជួញដូរមនុស្សបានឲ្យដឹងដែរថា កម្លាំងអាជ្ញាធរបាននិងកំពុងស្វែងរកមេខ្លោងដែលពាក់ព័ន្ធករណីស៊ីឈ្នួលពពោះ។
កាលពីចុងខែតុលាឆ្នាំ ២០១៨ លោកស្រី ជូ ប៊ុនអេង ឲ្យដឹងថាមេធាវីការពារឲ្យស្ត្រីពពោះចំនួន ៣២ នាក់ផ្សេងទៀតដែលកំពុងជាប់ឃុំបានរៀបចំឯកសារដាក់ទៅតុលាការដើម្បីស្នើសុំឲ្យតុលាការធ្វើការពិចារណាដោះលែងពួកគេឲ្យនៅក្រៅឃុំបណ្តោះអាសន្នដើម្បីឲ្យពួកគេបានចិញ្ចឹមកូនៗដែលពួកគេស៊ីឈ្នួលបង្កើតឲ្យអ្នកផ្សេងនោះដោយពួកគេមិនបញ្ជូនកូនៗទៅឲ្យអ្នកដែលជួលពួកគេនោះឡើយ៕
