មណ្ឌលគិរី៖ បុរស-ស្ត្រី ៣ នាក់ ត្រូវបានតុលាការខេត្តមណ្ឌលគិរី សម្រេចឃុំខ្លួនក្នុងពន្ធនាគារជាបណ្ដោះអាសន្ន ពីបទកាប់រុករាន និងទន្រ្ទានដីព្រៃនៅក្នុងតំបន់ដែនជម្រកសត្វព្រៃកែវសីមា។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរី បានប្រាប់ ភ្នំពេញ ប៉ុស្តិ៍ នៅល្ងាចថ្ងៃទី ១៥ ខែមេសានេះថា ជនត្រូវចោទឈ្មោះ ឌី សាឃុន ភេទប្រុស អាយុ ៤៧ ឆ្នាំ និងប្រពន្ធរបស់គាត់ឈ្មោះ ផាត់ ធិ អាយុ ៣៩ ឆ្នាំ មានទីលំនៅភូមិថ្មគ្រែលើ សង្កាត់ថ្មគ្រែ ក្រុងក្រចេះ ខេត្តក្រចេះ ព្រមទាំងសាច់ញាតិរបស់គាត់ម្នាក់ទៀត ឈ្មោះ យន់ ឃុន អាយុ ៤៩ ឆ្នាំ មានទីលំនៅភូមិឆ្នែង ឃុំស្រែខ្ទុម ស្រុកកែវសីមា ត្រូវបាន កម្លាំងបញ្ជាការកងឯកភាពខេត្តមណ្ឌលគិរីចាប់ឃាត់ខ្លួននៅថ្ងៃទី ១២ ខែ មេសា ឆ្នាំ ២០២១ ខណៈកំពុងធ្វើសកម្មភាពកាប់រានដីព្រៃក្នុងតំបន់ដែនជម្រកសត្វព្រៃកែវសីមា។
លោកបានថ្លែងថា៖ "ជនសង្ស័យ និងសំណុំរឿងប្រព្រឹត្តបទល្មើសត្រូវបានមន្ត្រីជំនាញបញ្ជូនមកតុលាការនៅរសៀលថ្ងៃទី ១៤ ខែ មេសា ហើយត្រូវបានតុលាការចោទប្រកាន់ពីបទ កាប់ទន្រ្ទានដីព្រៃក្នុងតំបន់ការពារធនធានធម្មជាតិ តាមបញ្ញត្តិមាត្រា ៦២ និងមាត្រា ៥៦ នៃច្បាប់ស្ដីពីតំបន់ការពារធម្មជាតិ"។
លោកបានបន្ថែមថា បន្ទាប់មកតុលាការក៏បានបង្គាប់ឲ្យមន្ត្រីនគរបាលយុត្តិធម៌នាំខ្លួនពួកគេទៅឃុំខ្លួនជាបណ្ដោះអាសន្នក្នុងពន្ធនាគារខេត្តមណ្ឌលគិរី។
បើតាមសម្ដីលោក ព្រំ វិបុលរតនៈ ប្រធានដែនជម្រកសត្វព្រៃកែវសីមា ជនត្រូវចោទទាំង ៣ នាក់ ធ្លាប់ត្រូវបានមន្រ្តីឧទ្យានុរក្សចុះបង្ក្រាបចាប់មកធ្វើការអប់រំឱ្យធ្វើកិច្ចសន្យាបញ្ឈប់សកម្មភាពល្មើសច្បាប់ក្នុងទម្រង់រុករាន និងទន្រ្ទានដីព្រៃ ដើម្បីយកដីធ្វើជាកម្មសិទ្ធិបែបនេះនៅចំណុចនេះម្ដងរួចមកហើយ។ ប៉ុន្តែពួកគេមិនរាងចាល។
លោកបានថ្លែងថា៖ "ពួកគេបានចូលកាប់រុះរានដីព្រៃក្នុងតំបន់ដែនជម្រកសត្វព្រៃកែវសីមា និងបានសង់រោងស្នាក់នៅអនាធិបតេយ្យខុសច្បាប់ម្ដងហើយម្ដងទៀត ក្នុងគោលបំណងកាន់កាប់ដីរដ្ឋខុសច្បាប់"។
លោកបានបន្តថា នៅក្នុងប្រតិបត្តិការចុះបង្ក្រាបក្រុមជនសង្ស័យខាងលើនេះ ក្រុមសមត្ថកិច្ចចម្រុះនៃគណៈបញ្ជាការខេត្តមណ្ឌលគិរី បានរឹបអូសវត្ថុតាងរណារយន្ត ២ គ្រឿង និងរុះរើរោងអនាធិបតេយ្យសរុបចំនួន ៩៕