.jpg)
មនុស្សចំនួន១៤នាក់ ជួបជុំលេងល្បែងសុីសង និងផឹកសុី ល្មេីសនឹងវិធានការសុខាភិបាល ត្រូវបានសមត្ថកិច្ចនៃអធិការនគរបាលខណ្ឌជ្រោយចង្វារ បានធ្វេីការឃាត់ខ្លួន នៅថ្ងៃទី២៦ ខែមេសា ឆ្នាំ២០២១។ រូបថត Police
ភ្នំពេញៈ សមត្ថកិច្ចខណ្ឌជ្រោយចង្វារឃាត់ខ្លួនមនុស្ស ១៤ នាក់ ដែលកំពុងលេងបៀ និងសេពគ្រឿងស្រវឹង នៅភូមិសាស្ត្រខណ្ឌជ្រោយចង្វារកាលថ្ងៃទី ២៦ មេសា យកទៅធ្វើចត្តាឡីស័កមុនពេលបញ្ជូនពួកគេទៅតុលាការ។ យោងតាមការឱ្យដឹងពី លោក សៀម សុត្ថាវុធ អធិការនគរបាលខណ្ឌជ្រោយចង្វារ។
លោក សៀម សុត្ថាវុធ ថ្លែងថា៖ «ពួកគេកំពុងប្រជុំគ្នាលេងបៀ និង ផឹកស៊ី ដែលល្មើសនឹងវិធានក្រសួងសុខាភិបាល ដើម្បីការពារការឆ្លងរាលដាលនៃជំងឺកូវីដ១៩។ ជនទាំង ១៤ នាក់នោះកម្លាំងសមត្ថកិច្ចខ្ញុំបានឃាត់ពួកគាត់តែខ្ញុំបានប្រគល់ទៅសាលាខណ្ឌជ្រោយចង្វារហើយ»។
មន្ត្រីនៃអធិការដ្ឋាននគរបាលខណ្ឌជ្រោយចង្វារមួយរូបសុំមិនឱ្យបញ្ចេញឈ្មោះបានប្រាប់ឱ្យដឹងនៅរសៀលថ្ងៃទី ២៧ ខែមេសាថា មនុស្សទាំង ១៤ នាក់នោះត្រូវបាននគរបាលខណ្ឌជ្រោយចង្វារឃាត់ខ្លួននៅព្រលប់ថ្ងៃទី ២៦ មេសាស្ថិតនៅ ចំណុចផ្លូវ កែវចិន្តា ក្នុង ភូមិ ៣ សង្កាត់ ជ្រោយចង្វារ ខណ្ឌ ជ្រោយចង្វារ។
មន្ត្រីរូបនេះបានឱ្យដឹងថា៖ «ក្រោយឃាត់ខ្លួនត្រូវបានសមត្ថកិច្ចរបស់ខ្ញុំកសាងសំណុំរឿងបញ្ជូនទៅសាលាដំបូងរាជធានីភ្នំពេញហើយ។ ចំណែកឯមនុស្សបានប្រគល់ជូនសាលាខណ្ឌជ្រោយចង្វារ ដើម្បីយកទៅមណ្ឌលចត្តាឡីស័ក ១៤ ថ្ងៃសិន បន្ទាប់មកទើបបញ្ជូនទៅតុលាការជាក្រោយ»។
មនុស្សចំនួន១៤នាក់ ជួបជុំលេងល្បែងសុីសង និងផឹកសុី ល្មេីសនឹងវិធានការសុខាភិបាល ត្រូវបានសមត្ថកិច្ចនៃអធិការនគរបាលខណ្ឌជ្រោយចង្វារ បានធ្វេីការឃាត់ខ្លួន នៅថ្ងៃទី២៦ ខែមេសា ឆ្នាំ២០២១។ រូបថត Police
ពាក់ព័ន្ធករណីនេះ ភ្នំពេញប៉ុស្តិ៍មិនអាចទាក់ទងមន្ត្រីខណ្ឌជ្រោយចង្វារណាម្នាក់បានទេនៅរសៀលថ្ងៃទី ២៧ មេសា។
ករណីដោយឡែកមួយទៀត កាលពីយប់ថ្ងៃទី ២៦ មេសា នគរបាលខណ្ឌសែនសុខបានឃាត់ខ្លួនយុវជនចំនួន ៤ នាក់នៅតាមទីសាធារណៈក្នុងភូមិ-សង្កាត់គោកឃ្លាង ខណ្ឌសែនសុខ ខណៈពួកគេកំពុងអង្គុយប្រមូលផ្តុំគ្នាដែលល្មើសនឹងវិធានរបស់ក្រសួងសុខាភិបាល។
លោក ហួ ម៉េងវ៉ាង អធិការនគរបាលខណ្ឌសែនសុខប្រាប់ភ្នំពេញប៉ុស្តិ៍នៅល្ងាចថ្ងៃទី ២៦ មេសាថា ក្រុមយុវជនទាំង ៤ នាក់នោះត្រូវបានសមត្ថកិច្ចឃាត់ខ្លួន និង ពិន័យទៅតាមច្បាប់ប៉ុណ្ណោះតែមិនបានបញ្ជូនទៅតុលាការទេ។
លោកបញ្ជាក់ថា៖ «ពួកគាត់យើងបានពិន័យជាប្រាក់ដោយអនុវត្តតាមវិធានការរបស់រដ្ឋបាលរាជធានីភ្នំពេញ ហើយបានដោះលែងពួកគេទៅវិញ»៕
